Ferizaj

Mungesa e rrymës ankth për qytetarët

Published

8 years ago

12 October, 2018

Fshatrat Bibaj, Fshat i Vjetër, Sojevë, Mirosalë, Dardani e Zllatar, çdo ditë po përballen me ndërprerje të energjisë elektrike, të cilat zgjasin me orë të tëra. Banorët thonë se kjo gjendje e cila ka filluar që disa muaj, u ka ardhur në majë të hundës, meqë po u paralizohet jeta. Të mllefosur për këtë gjendje shprehen edhe pronarët e bizneseve që operojnë në këtë pjesë, të cilët thonë se përveç pengesave në punë që ua shkakton ndërprerja e rrymës, ajo po ua dëmton edhe pajisjet.

“Që 6-7 muaj e ndalin rregullisht nga ora 10-16, 8-14, çdo ditë kemi probleme me rrymë, çdo ditë detyrohem me ble benzinë për gjenerator që kushton mjaftë shumë, por përveç kësaj edhe kur ka rrymë është shumë e dobët, jam detyru me ble përforcues për me funksionu pajisjet si në shtëpi ashtu edhe në lokal, ka problem shumë, ndërsa fatura më vjen 300 euro si pati rrymë si jo, ndonjëherë paralajmërojnë, por më shumë jo, kemi bërë ankesa, mandej kemi bërë edhe kërkesë për sjelljen e një trafo për ta përforcuar rrymën, por jo nuk ka asgjë”, tha Burim Kçiku, pronar i restorantit “So Grill”në Sojevë.

“Kemi probleme që nga paslufta, shumë shepsh po ndalet, kah 8 orë s’kemi rrymë, po duhet me gjenerator me punu, nuk e di pse po e ndalin kështu, faturat krejt i paguajmë, po ashtu po na shkatërrohen edhe pajisjet, ndalet në 8 kur të vjen 4 pasdite, unë nuk e di se çka po ndodhë, s’po kemi as ku me u anku”, tha Isuf Kçiku, banor i fshatit Sojevë.

“Dy herë në ditë po ndalet, ne jemi taksapagues të rregullt dhe është e pabesueshme që në këtë shekull mos me pas rrymë është katastrofë, unë e kam një lokal ka ndodhë shumë herë më janë prishur produktet shkaku i rrymës, unë nuk e di se çka është duke ndodhë, nuk po e dimë a jemi duke shkuar drejt zhvillimit apo duke shku veç prapa, që 20 vite pas çlirimit është katastrofë në këtë vend”, tha Basri Bytyqi, banor i fshatit Mirosalë.

Kurse, Xhevat Sallahu, përfaqësues i fshatit Zllatar, njëherit asamblist në Kuvendin Komunal të Ferizajt nga radhët e Vetëvendosjes, thotë se rrjeti elektrik në këtë pjesë është shumë i dobët për shkak të mungesës së investimeve.

“Nga një erë e vogël, apo ndonjë shi i vogël këto 6 fshatra mbesin pa rrymë me orë të tëra dhe kjo është për shkak se nuk janë bërë investimet e nevojshme në rrjetin e energjisë, këtu kanë bërë investime pjesë pjesë dhe këtu nëse në njërin fshat ka ndonjë defekt ne mbesim pa rrymë shumë fshatra. Edhe në rastet kur ka paralajmërime ndodhë që të tejkalohen paralajmërimet, mua më brengos fakti që nuk po bëhen investime në Ferizaj, KEDS-i bën investime edhe nëntokë nëpër komuna të tjera, ndërsa në komunën tonë gjendja është e mjerueshme, ka raste kur qytetarët detyrohen t’i rregullojnë vetë telat e rrymës që mos të qëndrojnë në tokë, siç një rast në Sojevë”, tha Sallahu.

Për të kuptuar arsyen e këtyre ndërprerjeve në këta fshatra të Ferizajt, gjatë ditës Televizioni Tema kontaktoi me drejtorin e distriktit të KEDS-it në Ferizaj Ramadan Jaha dhe zëdhënësin Viktor Buzhala, por asnjëri nuk u shprehën të gatshëm të na përgjigjen për këtë problem.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

3 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”