Ferizaj

Rruga “Madeleine Albright” do të jetë e mbyllur gjatë dy muajve

Published

7 years ago

27 October, 2018

Rruga “Madeleine Albright”, e cila lidh qendrën e qytetit me rrugën ”12 Qershori” dhe ”Epopeja e Jezercit”, do të qëndroj e mbyllur gjatë dy muajve për shkak të punimeve të cilat po realizohen në kuadër të projektit ”Bashkimi i Qytetit”. Drejtori i Urbanizmit në Ferizaj Lulzim Aliu, tha se vështirësi në kryerjen e punimeve po u paraqet infrastruktura nëntokësore në atë pjesë të qytetit.

“Problemi më i madh është që në këtë pjesë përafërsisht dy metërshe janë të gjitha instalimet e mundshme të cilat janë të padefinuara mirë, nuk e dinë as ujësjellësi saktë ku i ka gypat, mandej janë furnizimet private që janë bërë kudo, nuk ka saktësi të KEDS-it ku janë kabllot dhe kjo sjellë vështirësi më të madhe, sepse puna shkon ngadalë derisa të definohen saktë, mandej shihet që është gypi kryesor i furnizimit të ujit dhe ky duhet me u zhvendos për me u zhvillu punimet dhe këto e vështirësojnë dinamikën e punimeve, përndryshe për dy ditë është kry shumë punë, nuk është çështja e vështirësive për me kry punën sa është problematika e infrastrukturës nëntokësore, tuneli këtu ka me u gropu 7-8 metra dhe ka me u heq krejt ky dhe që nuk kthehet më këtu dhe më pas kanë me fillu me betonime edhe pjesa e poshtme dhe anësore, kanë me u marrë masat anash për me vendos pilota mos me u rrëzu dheu, kur të vendosen pilotat kanë me u vendos mbrojtjet statike të forta që me qenë siguria për punëtorë dhe unë kujtoj që është çdo gjë në rregull”, tha Aliu.

Sa i përket dëmtimeve që bëhen gjatë punimeve, drejtori Aliu tha se ato iu faturohen kompanivë punëkryese.

“Asnjë ndërmarrje publike nuk ka shënime të sakta se ku i kanë gypat e kabllot dhe normalisht që këtu ka edhe dëmtime nga punimet, por sigurisht gjatë realizimit të punimeve kompania i meremeton, nuk i kemi llogaritur kush i bën por sigurisht që këto dëmtime janë të parapara me sa e di unë në projekt kur është bërë tenderimi, i bartë kompania që është duke i bërë punimet ose duhet me pas kujdes të shtuar dinamika më e vogël, ose më pak kujdes e me i bë riparimet vet, por unë kujtoj se dy kompanitë kanë treguar një seriozitet të jashtëzakonshëm, por defektet në ndërtimtari janë normale”, tha Aliu.

Projekti ”Bashkimi i Qytetit” parasheh ndërtimin e nënkalimit për automjete që do të lidh rrugët “Vëllezërit Gërvalla” me “Latif Hasani”, deri te rrethrrotullimi afër Shtëpisë së Pensionistëve. Ky projekt i cili ka një kosto prej 4 milionë eurosh është planifikuar të zgjas 2 vite.

Art & Showbiz

Nis edicioni i 55-të jubilar i Festivalit të Teatrove Ferizaj

Published

2 weeks ago

01 September, 2025

Redaksia

Nga sot deri më 7 shtator 2025, në Ferizaj do të mbahet Festivali i Teatrove, i cili sivjet shënon edicionin e 55-të jubilar.

Hapja zyrtare e festivalit bëhet nga ora 19:00 me shfaqjen “13” me regji të Sulejman Rushitit, në teatrin “Adriana”, derisa ditëve në vijim, para publikut ferizajas,do të prezantohen disa shfaqje të prodhuara dhe ngjarje të veçanta nga konceptet “Retroteatri” dhe “FTF Skena”.

Festivali i Tetarove Ferizaj, është prej festivaleve më të vjetra në Kosovë, i cili që nga viti 1970, përmes shfaqjeve nga vende të ndryshme jo vetëm vendore por edhe ndërkombëtare, bashkon profesionistë të teatrit dhe artdashës.

Hapjes zyrtare të festivalit do t’i paraprijë shfaqja për të rinj “Black Box” të cilën artdashësit mund ta shohin në Galerinë e qytetit të Ferizajt.

Këtë vit, në programin zyrtar të festivalit, do të jenë shfaqjet: “13” (më 1 shtator), “Bëje ose vdis” (2 shtator), “Djali” (3 shtator), “Hijet e Kohës” dhe “Komedia e zezë” (4 shtator), “God blesh America” (5 shtator), “Kjo është rinia jonë” dhe “PRISHTINA. Vrasja e paralajmëruar e një ëndrre” (6 shtator) si dhe shfaqja “Të vërtetat tona” (7 shtator).

Ky edicion jubilar i festivalit do të përmbyllet më 7 shtator, me shfaqjen jashtë konkurrence “Të bardhët”.

Tradicionalisht, çdo ditë të festivalit organizohen edhe debate për teatrin, punëtori krijuese me artistë ndërkombëtar dhe ndeja pas çdo shfaqjeje në oborrin e Teatrit.

Ferizaj

Arrestohet për vjedhje të trotineteve dhe biçikletave në Ferizaj

Published

3 weeks ago

23 August, 2025

Redaksia

Hetuesit e stacionit policor në Ferizaj, kanë arrestuar të dyshuarin B. T, 28 vjeç, i cili gjatë periudhës 01.07.2025 – 19.08.2025 ka kryer disa raste të vjedhjeve në banesa dhe objekte banesore në qytetin e Ferizajt.

Sipas policisë, nga hetimet është vërtetuar se i dyshuari ka vjedhur dy trotinete elektrike dhe dy biçikleta, me vlerë totale prej rreth 4.220 €, të cilat më pas i kishte shitur personave tjerë, duke iu treguar se ishin të vjedhura.

Me urdhër të prokurorit të shtetit, i dyshuari B. T. është ndaluar për 48 orë për procedura tjera hetimore.

Sendet e vjedhura janë sekuestruar dhe do t’u kthehen pronarëve ligjorë.

Ndërsa ndaj dy personave të tjerë, G .B, 33 vjeç dhe B. H.,25 vjeç, është iniciuar rasti penal “Blerja, pranimi ose fshehja e sendeve të përfituara nga vepra penale”, pasi kanë pranuar se ishin në dijeni për origjinën e tyre.

Ferizaj

Digjen rreth 13 hektarë me të mbjella dhe mal në Lloshkobare të Ferizajt

Published

3 weeks ago

21 August, 2025

Redaksia

Në fshatin Lloshkobare të Ferizajt, nga zjarri janë djegur disa hektarë me të mbjella të ndryshme. Viktimat dyshojnë për zjarrëvënie të qëllimshme nga persona të panjohur.

Në raportin 24-orësh të Policisë së Kosovës, thuhet se të mërkurën pasdite, viktimat kanë raportuar se nga zjarri atyre u janë djegur 5 hektarë mjedër, 3 hektarë të mbjella me dredhëza, 1 hektar me arra dhe 3 hektarë mal.

“Ferizaj 20.08.2025-16:30. Raportohet se persona të panjohur i kanë vënë zjarrin pronës se dy viktimave meshkuj kosovarë, ku janë djegur rreth 3 hektarë me mal, 5 hektarë mjedër, 4 hektarë me dredhëza dhe 1 hektar me arra, që janë djegur në tërësi”, njoftoi Policia e Kosovës.