Shtetet e Bashkuara të Amerikës e kanë mirëpritur vendimin e Qeverisë së Kosovës që t’i pranojë përkohësisht 50 shtetas të vendeve të treta në kuadër të marrëveshjes me SHBA-në.

“Ne jemi mirënjohës ndaj partneres sonë, Kosovës, për pritjen e shtetasve të vendeve të treta të larguar nga SHBA-ja dhe për lehtësimin e kthimit të sigurt të këtyre të huajve në vendet e tyre të origjinës”, ka thënë Departamenti Amerikan i Shtetit në një përgjigje për CBS News, transmeton Koha.net.

Një ditë më parë, Qeveria e Kosovës njoftoi se ka marrë vendim për pranimin e 50 emigrantëve, për siç ka thënë, lehtësimin e kthimit të tyre në vendlindje. Kryeministri në detyrë, Albin Kurti, ka thënë se strehimi i tyre do të bëhet brenda një periudhe njëvjeçare dhe se ky proces do të menaxhohet dhe koordinohet nga Ministra e Punëve të Brendshme.

Në Kuvendin e Kosovës po bëhen homazhe me rastin e vdekjes së ish-kryeministrit në ekzil të Kosovës, Bujar Bukoshi, i cili ndërroi jetë të martën, në moshën 78 vjeçare.

Homazhet që kanë nisur nga ora 10:00 në hollin e Kuvendit do të zgjasin deri në orën 13:00.

Dr. Bujar Bukoshi, mjek – urolog, profesor universitar, u lind në Suharekë në vitin 1947.

Më 1971 mbaroi Fakultetin e Mjekësisë në Beograd, ndërsa u specializua dhe u doktorua në Gjermani.

Dr. Bukoshi ishe ndër themeluesit e LDK-së dhe Kryeministër i Qeverisë së Kosovës në ekzil, nga viti 1991 deri në atë 1999, ndërsa pas luftës ka qenë edhe deputet në Kuvendin e Kosovës dhe Ministër i Shëndetësisë.

Komuna e Vitisë ka shpallur një ditë zie më 11 qershor 2025, në nderim të tre të rinjve që humbën jetën tragjikisht, njoftoi kryetari komunës,  Sokol Haliti.

Gjatë kësaj dite, flamujt do të ulen në gjysmështizë dhe do të pezullohen të gjitha aktivitetet kulturore, sportive e festive.

”Të nderuar qytetarë të Komunës së Vitisë,

Me pikëllim të thellë dhe zemër të rënduar ju njoftoj se këto ditë, komuna jonë është tronditur nga tri humbje të mëdha. Brenda vetëm tre ditësh, kemi humbur tre të rinj vitias – bij e bija të kësaj toke, që u ndanë nga jeta në mënyrë të parakohshme dhe tragjike.

Kjo dhimbje është e papërshkrueshme dhe ka prekur thellë secilin prej nesh. Në nderim të jetës së tyre dhe për të shprehur solidaritetin e institucioneve dhe të gjithë qytetarëve me familjet që po përballen me këtë dhembje të madhe, shpall të mërkurën, 11.06.2025 DITË ZIE në Komunën e Vitisë.

Gjatë kësaj dite:

• Flamujt në të gjitha institucionet komunale do të ulen në gjysmështizë;

• Aktivitetet kulturore, sportive dhe festive do të pezullohen;

• Institucionet dhe qytetarët do të nderojnë kujtimin e të rinjve tanë me heshtje dhe respekt të thellë.

I ftoj të gjithë qytetarët e Vitisë të bashkohen në këtë ditë zie, për të nderuar kujtimin e të ndjerëve dhe për të qëndruar pranë familjeve të tyre, duke ndarë dhembjen me solidaritet dhe dashuri njerëzore.

Ngushëllimet më të sinqerta familjeve të prekura. Zoti ua lehtësoftë dhimbjen dhe i pastë të ndjerët në mëshirën e Tij. Me respekt dhe dhembje të thellë”, ka shkruar Haliti në Facebook.