Ferizaj

Shoqëria civile e pakënaqur me punën e kryetarit Aliu

Published

7 years ago

20 November, 2018

U bë një vit që kur Ferizaj zgjodhi për kryetar komune Agim Aliun, ndërkaq shoqëria civile e këtushme, po vlerëson se ndryshimi i premtuar nga zotëri Aliut ende nuk ka ndodhur. Madje, sipas organizatave joqeveritare të Ferizajt, nga kjo qeveri qytetarët janë zhgënjyer dhe dëshpëruar edhe më shumë. Arbenita Topalli nga organizata ”INPO”, tha se zotimi i kryetarit Aliu se do të bashkëqeverisë me qytetarin e Ferizajt, ka dështuar qysh në vitin e parë të udhëheqjes së tij. Madje, sipas saj, transparenca dhe llogaridhënia e pushtetit lokal gjatë kësaj periudhe kohore, ka shkuar pothuajse në nivelin më të ulët.

“Gjatë kësaj periudhe një vjeçare kryetari Agim Aliu nuk është që ka sjellur përmirësime, ai nuk ka arritur të bashkëpunoj me qytetarët ashtu siç kishte premtuar gjatë fushatës së tij, po ashtu s’ka bashkëpunuar as më shoqërinë civile, madje as me Kuvendin Komunal, ku aprovimet për projektet në interes të qytetarëve bëhen pikërisht nga ky institucion i rëndësishëm. Ne si ”INPO” jemi përherë në monitorim të ekzekutivit dhe legjislativit të Ferizajt dhe konsiderojmë se sa i përket transparencës këto institucione nuk po e kryejnë obligimin e duhur ligjor. Faqja e komunës nuk i publikon shumë dokumente të rëndësishme, aty s’ka asnjë plan të punës së drejtorëve komunal, po ashtu kemi raste kur qytetarët kanë bërë kërkesa zyrtare për projekte të ndryshme, apo për përfshirje të tyre në buxhetin e vitit që vjen e ato kërkesa as nuk janë përfillur e as çfarë është më e keqja nuk u kanë kthyer përgjigje, kështu që kemi parë që i pari i komunës bashkë me udhëheqësit e tjerë komunal nuk po shprehin gatishmëri për të qenë më llogaridhënës”, tha Topalli.

Për keqqeverisje, pushteti aktual po kritikohet edhe nga rrjeti i organizatave joqeveritare ”Avonet” në Ferizaj. Kenan Gashi nga ky rrjet, ka vlerësuar se për gati një vit të qeverisjes, i pari i Ferizajt Agim Aliu ka dëshpëruar në masë të madhe qytetarët e komunës së tij.

“Kemi rritje të dëshpërimit të jashtëzakonshëm brenda një viti. Shoqëria civile mund t’i identifikoj problemet dhe mund t’i hulumtoj rastet më lehtë, por nëse i takon qytetarët shumica prej tyre po i përmendin të njëjtat të meta dhe problemet shqetësuese që ka sjellur kjo qeverisje dhe e sheh që ky pushtet s’ka arritur të bëj ndryshime e as përmirësime, thjeshtë këtu po vlerësohen rezultatet ku çdo ditë po kemi ankesa dhe kërkesa të cilat po hasin në vesh të shurdhër. Shikoni vetëm përmbaruesit çfarë janë duke bërë e sa po humb komuna për shkak të keqmenaxhimit të parasë publike”, tha Gashi.

Këto dy OJQ në Ferizaj, po konsiderojnë se ndërtimet pa kriter dhe investimet pa planifikim, janë disa nga të këqijat që ky pushtet po i bën, madje duke u thirrë si parti guximtare.

“Qysh nga paslufta nuk e kemi parë këtë tmerr urbanistik në qytetin tonë. Për fat të keq po vazhdon trendi i ndërtimit pa kurrfarë kriteri, madje duke krijuar frikë tek qytetarët për të lëvizur lirshëm. Për fat të keq s’ka as vullnet tek institucioni për të punuar në mënyrë të barabartë, pasi që shumë lehtë vërehet që ky pushtet po diskriminon dhe favorizon individ që po merren me këto ndërtime”, tha Gashi.

“Kryetari i tanishëm më tepër iu ka shmangur dokumenteve më strategjike për zhvillimin e Ferizajt, duke i vënë në prioritet projektet e tij të premtuara e që në fakt s’kanë pasur bazë ligjore të mjaftueshme për t’u realizuar. Është ndërtimi i Spitalit Rajonal dhe ndërrimi i lokacionit të tij, pastaj edhe projekti ”Bashkimi i Qytetit” për të cilin njohësit e fushës përkatëse, por edhe qytetarët janë shumë skeptik në përfundimin e tij dhe zgjidhjen e ndonjë problemi urban”, tha Arbenita Topalli nga ”INPO”.

Ndër të tjera, shoqëria civile në Ferizaj keqmenaxhim të qeverisë lokale po e konsideron edhe rekrutimin e të punësuarve pa kurrfarë kriteri, madje një numër të madh me kontrata mbi vepër, e që në fakt, sipas tyre, ata as që janë duke kryer punë si punëtorë për shërbime të veçanta apo profesionale siç e parasheh ligji.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”