Ferizaj

Shkollës ”Besim Rexhepi” në Komogllavë i dhurohet një piano

Published

7 years ago

04 December, 2018

Nga sot, nxënësit e shkollës fillore “Besim Rexhepi” në Komogllavë, orën e lëndës së muzikës do të zhvillojnë pak më ndryshe. Përveç teorisë që këta nxënës kanë mësuar vazhdimisht, një instrument muzikor do t’ua bëj më atraktive këtë orë. Është kjo një piano e dhuruar nga bashkatdhetari Garip Shabani.

Babai i donatorit, Gani Shabani, tha se kjo është piano e dhjetë që ia kanë dhuruar shkollave të këtushme.

“Kjo piano në fillim është dhënë nga një vendase zvicërane, ajo ia ka dhuruar djalit tim pasi ishte për shkollë që e falënderoj edhe atë që ka menduar për nxënësit tanë, pasi muzika është e lënë anash në vendin tonë, po ashtu është edhe mungesë e tyre, unë falënderoj edhe atë bamirëse dhe djalin tim që ka menduar ta bëj këtë gjest, por edhe kompaninë “Eliot Trans” që na e ka sjellë gratis pianon nga Zvicra deri këtu, po besojmë se të gjitha shkollat në komunën e Ferizajt do t’i pajisim me piano, besoj dalëngadalë”, tha Gani Shabani.

Drejtoresha e shkollës ”Besim Rexhepi”, Dajete Qazimi, tha se instrumentet muzikore në këtë shkollë janë shumë të nevojshme.

“Sot shkolla jonë e pranoi këtë piano si donacion, një gjest shumë bujar dhe diçka shumë e mirëpritur për shkollën tonë, falënderoj së pari inciatorin Gani Shabani dhe donatorin kryesor djalin e tij Garip Shabani për këtë donacion që është shumë i vlefshëm për shkollën tonë, dihet se mungesa e mjeteve qoftë muzikore apo edhe e lëndëve të tjera është shumë e ndjeshme në shkollën tonë dhe tani e tutje besoj se arsimtarja e muzikës dhe nxënësit që kanë prirje për muzikë do të kenë mundësinë për të zhvilluar talentin e tyre”, tha Qazimi.

Këtë donacion e mirëpritën edhe nxënësit e kësaj shkolle.

“Nuk kemi pasur piano në shkollë, orën muzikore e kemi mbajtur me libra e me shënime në tabelë, ndërsa tani e kemi pianon. Unë jam edhe në shkollën e muzikës ushtroj për klarinet, por tani që është edhe piano në shkollën tonë do t’i bie edhe pianos”, tha Meriton Latifi.

Kjo piano u tha se ka një vlerë mbi 2 mijë euro.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

1 week ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim