Ferizaj

Prindërit renovojnë shkollën e Sojevës gjatë pushimit dimëror

Published

8 years ago

14 January, 2019

Klasët e shkollës fillore “Ramadan Rexhepi”, në fshatin Sojevë kanë marrë një pamje tjetër, falë angazhimit të prindërve, mësimdhënësve dhe drejtuesve të kësaj shkolle, të cilët gjatë kohës sa nxënësit ishin në pushim, renovuan shumicën e klasave.
“Unë i kam tre fëmijë këtu, dhe e kam ndje një përgjegjësi morale që të jap një kontribut për shkollë. Unë e kam bërë më shumë punën teknike me ato mundësi që i kemi, megjithatë gatishmëria e jonë është që ta ndihmojmë shkollën sa herë të është nevoja”,tha Shaqir Zeqiri.

“Është kënaqësi të punosh për shkollat, dhe u bashkangjitem çdoherë inciativave të tilla. Kam realizuar disa vizatime në mur që më është dukur se janë të dëshirueshme nga fëmijët”, tha Lulzim Asllani,mësues.
Nga të gjitha klasat më së shumti ka ndryshuar klasa e parashkollorëve, për të cilën ka investuar një prind, i cili e siguroi komplet invertarin e nevojshëm.
Edukatorja e kësaj klase thotë se tani kushtet janë shumë më të mira për parapërgatitjen e fatosave të ardhshëm .
“Falenderoj prindin Fidan Rexhepi, që e ka marrë inciativën për me i sjellë karriget, tavolinat, dyshemenë tabelën. Tani është bërë më bukur, dhe kur të vijnë fëmijët, besoj që do të befasohen dhe do të jenë shumë të kënaqur, por edhe për mua është shumë më lehtë me këto kushte”, tha Melihate Rexhepi, edukatore.
Krahas grevës e cila po mbahet në arsim, drejtoresha e këtij institucioni arsimor Arta Tahiri, thotë se pas grevës, gjysmëvjetori i dytë do të vazhdojë në një ambient më të mirë.
“Në shkollën tonë po funksionon trekëndëshi prind, mësimdhënës dhe institucione. Ka pasur nevojë për disa renovime, dhe kemi bashkëpunuar me prindërit, kemi ndërruar disa klasa. Kemi bërë ngjyrosjen, kemi ndryshuar bankat, karriget, dyshemenë dhe krejt në fund e kemi rreguluar klasën e parashkollorëve ku është sjellur një invertar i kompletuar. Pavarsisht se filloi greva, ne mezi kemi pritur që kur të vijnë nxënësit e parafillorëve të vijnë në një ambient të ri”, tha drejtoresha Tahiri.
Banorët e Sojevës tradicionalisht investojnë në shkollën ku mësojnë 300 fëmijë të tyre. Vlen të theksohet se para dy vitesh, Sojevasit kishin pajisur shkollën e tyre edhe me një karrige stomatologjike.

Ferizaj

Bëhet i ditur identiteti i viktimave të aksidentit tragjik në Gjermani

Published

3 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

3 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

5 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.