Ferizaj

Përkujtohen dëshmorët Ahmet Kaçiku e Vezir Jashari

Published

7 years ago

19 January, 2019

Në 20 vjetorin e rënies në altarin e Lirisë, qytetarë të shumtë dhe institucione të Ferizajt përkujtuan dëshmorët Ahmet Kaçiku dhe Vezir Jashari.
Në nderim të jetës dhe veprës së tyre, udhëheqës të institucioneve komunale, të shoqatave të dala nga lufta, familjarë dhe bashkëluftëtarë bënë homazhe tek varrezat e Dëshmorëve të Ushtrisë Çlirimtare të Kosovës në Ferizaj, në vendin ku edhe prehen këta dy dëshmorë, të rënë heroikisht në Reçak të Shtimes në betejë me forcat serbe.
E bija e heroit Ahmet Kaçiku, Festina Kaçiku, u shpreh se në këtë përvjetor të rënies së babait të saj, ndjehet edhe më krenare, duke ditur se shteti ynë tani ka edhe ushtrinë e vet.

“Është një ndjenjë shumë e mirë përkundër mërzisë dhe mungesës së tij më vie mirë që kanë ardhur shumë qytetarë të na nderojnë, ndërsa ndryshe nga vitet e tjera tani kemi edhe ushtrinë që është formuar tani dhe është një ndjenjë edhe më e mirë. Me këtë, një amanet është plotësuar shpresoj edhe amanetet e tjera të plotësohen dalëngadalë”, u shpreh bija e Heroit Ahmet Kaçiku.

Kryetari i Shoqatës së Familjeve të Dëshmorëve në Ferizaj, Gafurr Bytyqi tha se këta dy dëshmorë ishin ushtarë dhe trima të pashembullt të historisë më të re të kombit shqiptar.
“Këta dy dëshmorë që ne sot po bëjm homazhe janë të vlerave të veçanta dhe madhore për kombin tonë. Falë trimërisë e guximit të Ahmetit dhe Vezirit dhe të tjerëve që ranë për mbrojten e kufomave të masakrës nga forcat serbe, u zbardh e vërteta në botë dhe ndodhi mrekullia ku aleat të UÇK-së u bënë Amerika dhe miqtë e saj dhe pasojë e kësaj sot jemi të lirë”,tha Bytyqi.

Për figurën dhe heroizmin e dëshmorëve Ahmet Kaçiku dhe Vezir Jashari foli edhe gjenerali Imri Ilazi.
“19 janari është një ditë shumë e rëndësishme pasi lidhet me dy figura mjaft embelmatike të UÇK-së, siç ka qenë Veziri prej orëve të para dhe Ahmet Kaçiku komandant i brigadës që ka qenë i angazhuar që në fillet e 98-së. Por mbi të gjitha roli i komandantit të brigadës është i jashtëzakonshëm, dhe Ahmet Kaçiku gjithmonë ka qenë i pregaditur për një akt final. Por mbi të gjitha ai gjithmonë ka dashur të del faqebardhë dhe këtë gjithmonë e ka potencuar se liria pa sakrificë nuk vie. Për këtë mund të them se roli i UÇK-së ka dalluar pasi një komandant në rregulla ushtarake nuk duhet të bie në vijë të frontit, por megjithatë dallimi i UÇK-së është këtu, sepse gjithmonë udhëheqësit është dashur të prijnë dhe të sakrifikohen që të tjerët ta vazhdojnë luftën”,tha Ilazi.

Të veshur me uniformën ushtarake, bashkëluftëtarët raportuan pranë varrit të ish- komandatit Heroit Ahmet Kaçiku, duke u shprehur se pikëpamjet e tyre asnjëherë nuk kanë ndryshuar.
“Ne të gjithë si luftëtar kemi ardhur të bëjmë një raportim para komandantit se edhe pas 20 viteve jemi me të njejtën ndjenjë dhe të njejtin motiv dhe asnjëherë nuk jemi përkulur pavarsisht situatave të vështira që 20 vite. Lavdia e tij dhe të gjithë dëshmorve të UÇK-së ka fjetur në shpirtin tonë dhe në asnjë çast ne nuk e kemi ndërruar mendjen. Unë sot po i raportoj komandanit të brigadës se të gjithë luftëtarët e kompanisë së parë të krahut të djathtë të fshatit Mollopolc kemi qëndruar stoik në porositë e komandantit pas rëniës së tij”, tha Afrim Mehmeti, bashkëluftëtar.
Gjatë ditës së sotme, përveç homazheve që u bënë në Kompleksin e Varrezave të Dëshmorëve në Ferizaj, me inciativë të bashkëlufëtarëve është organizuar edhe një marsh i rastit, për të përkujtuar sakrificën dhe heroizimin e dëshmorëve të rënë 20 vite më parë në betejat e Reçakut, Mollopolcit dhe Rancës.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

3 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

5 days ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”

Ferizaj

Sekuestrohet një revole me municion dhe shurdhues në Ferizaj

Published

1 week ago

04 May, 2026

Redaksia

Një person është shoqëruar në stacionin policor në Ferizaj pas një kontrolli në shtëpinë e tij, ku janë gjetur dhe sekuestruar një pistoletë me gaz, pesë fishekë dhe një shurdhues i armës së zjarrit.

Në raportin 24 orësh të policisë bëhet e ditur se rasti ka ndodhur mëngjesin e së dielës, më 3 maj 2026, rreth orës 8:30 në rrugën “Gucia” në Ferizaj .

Me vendim të prokurorit pas intervistimit, rasti vazhdon të hetohet në procedurë të rregullt.