Kosovë

MPJD kërkon sqarime nga ambasada maqedonase për incidentin diplomatik ndaj presidentes së Kosovës

Published

10 months ago

02 August, 2024

Ministria e Punëve të Jashtme dhe Diasporës ka nisur të mbledhë informacione dhe ka kërkuar edhe sqarime zyrtare nga Ambasada e Maqedonisë së Veriut në Prishtinë, lidhur me incidentin diplomatik që i ndodhi presidentes Vjosa Osmani në Aeroportin e Shkupit.

Sipas informacioneve të deritanishme, incidenti ka ndodhur më 1 gusht 2024 para udhëtimit të planifikuar të Osmanit drejt Sllovenisë.

“Ministria e Punëve të Jashtme dhe Diasporës me shqetësim ka mësuar rreth incidentit të shkaktuar në Aeroportin e Shkupit në raport me trajtimin jodinjitoz të Presidentes së Republikës së Kosovës, Dr. Vjosa Osmani. Ministria e Punëve të Jashtme dhe Diasporës, përmes Ambasadës së Kosovës në Shkup, ka nisur mbledhjen e informatave dhe që në orët e hershme të mbrëmjes ka kërkuar sqarime zyrtare nga ambasada e Maqedonisë së Veriut në Prishtinë dhe nga Ministria e Punëve të Jashtme të Maqedonisë së Veriut. MPJD do të mbajë publikun të informuar për veprimet e mëtejshme, për të sqaruar këtë situatë dhe për t’u siguruar që incidente të tilla të mos ndodhin në të ardhmen në raport me krerët e shtetit tonë”, thuhet në njoftimin e plotë të publikuar në Facebook.

Në reagimin për këtë incident, Presidenca e Kosovës ka akuzuar autoritetet e Maqedonisë së Veriut për shkelje të praktikave ndërkombëtare dhe Konventën e Vjenës për Marrëdhënie Diplomatike, duke thënë se, gjatë 1 gushtit, presidentes Vjosa Osmani është tentuar t’i merret telefoni personal nga një pjesëtar i sigurimit të Aeroportit të Shkupit (TAV).

“Presidentja nuk ka lejuar një gjë të tillë, sepse do të ishte shkelje e rëndë”, tha Bekim Kupina, këshilltar politik i presidentes, duke shtuar se përkundër se i janë bërë të ditura rregullat diplomatike, “sigurimi ka tentuar fizikisht ta shtyjë presidenten me ç’rast është detyruar që të reagojë Policia e Kosovës për ta hapur rrugën. Kjo sjellje e zyrtarit maqedonas të aeroportit është në kundërshtim me çdo praktikë ndërkombëtare, sipas të cilave kur krerët e shtetit udhëtojnë, ata mbrohen me privilegje e imunitete diplomatike.

Presidenca e konsideron çdo sulm dhe trajtim të parregullt e në kundërshtim me konventat ndërkombëtare të zyrtarëve të lartë shtetërorë si sulm ndaj vetë shtetit të Kosovës”, ka thënë Kupina.

Ministria maqedonase e Punëve të Brendshme ka njoftuar se ka filluar hetimin për këtë incident.

Kosovë

Burgim të përjetshëm vëllezërve Vllasaliu për vrasjen e Bedri Rexhepit

Published

4 days ago

28 May, 2025

Redaksia

Jeton dhe Nexhat Vllasaliu janë dënuar me burgim të përjetshëm për vrasjen Bedri Rexhepit.

Gjatë shpalljes së dënimit në Gjykatën Themelore në Prishtinë, kryetarja e trupit gjykues Medie Bytyqi, tha se të pandehurit u gjetën fajtorë për veprat penale vrasje e rëndë dhe dëmtim i varrezave apo kufomave.

Dy vëllezërit Vllasaliu akuzohen se kanë vrarë në bashkëkryerje e më pas e kanë zhdukur trupin e Rexhepit derisa motivi i kësaj vrasje është cilësuar të jetë përfitimi pasuror në vlerë prej 30 mijë euro.

Sipas aktakuzës, më 08.04.2021, Jeton Vllasaliu e dërgon Bedri Rexhepin në fshatin Vllasali, në shtëpinë e të pandehurit të dytë Nexhat Vllasaliu.

Me të mbërritur në shtëpi, Jeton Vllasaliu e vret në mënyrë tinëzare Bedri Rexhepin duke menduar që ky i fundit ka shumën e caktuar të parave për blerjen e dy veturave për të cilat ishin pajtuar më herët.

Sipas aktakuzës, tek viktima ishin gjetur 8 mijë euro. Më pas, të pandehurit kishin varrosur viktimën në vendin e quajtur Mali i Madh në Vllasali të Novobërdës, ku pas rreth 17 muajve, më 30 shtator 2022, prokuroria gjen mbetjet mortore të Rexhepit.

Vetura e të ndjerit ishte gjetur disa ditë pas vrasjes në arat e fshatit Shushicë të Janjevës, ku e kishte dërguar Jeton Vllasaliu. Nga aty, Jetonin e merr me veturë personale i pandehuri Nexhati, i cili për të gjitha këto veprime është gjetur fajtor pasi kishte ndihmuar në kryerjen e veprës penale.

Kosovë

Nga nesër fillon punën pikë kalimi i përbashkët kufitar Glloboçicë – Jazhincë

Published

5 days ago

27 May, 2025

Redaksia

Ministria e Punëve të Brendshme ka njoftuar se nesër (28 maj 2025) në ora 14:00, do të fillojë implementimi i parimit të kontrollit “Hyrje – Hyrje” në Pikë Kalimin e Përbashkët Kufitar Glloboçicë – Jazhincë.

Në inaugurim do të marrin pjesë Ministri i Punëve të Brendshme i Republikës së Kosovës Xhelal Sveçla, Zëvëndëskryeministri i parë i Republikës së Maqedonisë së Veriut Izet Mexhiti dhe Ministri i Brendshëm i Republikës së Maqedonisë së Veriut Pançe Toshkovski.

Pika e parë e përbashkët e kalimit kufitar, Hani i Elezit – Bllacë, nisi punën më 12 prill të këtij viti.

Të dyja këto pikë kalime të përbashkëta kufitare ishin paraparë sipas Protokollit të Implementimit të Marrëveshjes ndërmjet Qeverisë së Republikës së Kosovës dhe Qeverisë së Republikës së Maqedonisë së Veriut, të nënshkruar në nëntor 2024 në mbledhjen e përbashkët të dy qeverive.

Kosovë

Pas bastisjeve intervistohet edhe ministri në detyrë i Bujqësisë, Faton Peci

Published

5 days ago

27 May, 2025

Redaksia

Njësiti për Krimet Ekonomike i Policisë së Kosovës, në koordinim me Prokurorinë Speciale, kanë zhvilluar bastisje në Ministrinë e Bujqësisë dhe në disa lokacione të tjera, mbi dyshimet për rastin e fabrikës së përpunimit të mbetjeve shtazore.

Gjatë bastisjes, janë konfiskuar një sasi dokumentesh, të cilat pritet të analizohen për prova lidhur me procedurat e dyshuara të keqpërdorimit të fondeve publike.

Lidhur me këtë rast nga organet e hetuesisë është intervistuar edhe ministri në detyrë i Bujqësisë, Faton Peci, transmeton Koha.net

Prokurori i rastit, Admir Shala, u tha mediave se përveç Ministrisë së Bujqësisë dhe Agjencisë së Ushqimit dhe Veterinës, kontrolle janë kryer edhe në Agjencinë për Zhvillim Bujqësor, si dhe te lokacioni i kompanisë përfituese të kontratës për përpunim të mbetjeve shtazore.,

“Prokuroria Speciale ka filluar një hetim lidhur me dhënien në shfrytëzim të fabrikës për përpunimin e nënprodukteve shtazore. Hetimi është duke u zhvilluar lidhur me dyshimet për dhënien me qira të kësaj fabrike. Jemi duke i zhvilluar bastisjet dhe kontrollet në bazë të urdhrit të Gjykatës Themelore në Prishtinë, me kërkesë të Prokurorisë Speciale, me qëllim të sigurimit të informacioneve të nevojshme, drejt zbardhjes së rastit konkret,” ka thënë prokurori Shala.