Ferizaj

Mungesa e sallave kulturore cënon integritetin e Teatrit

Published

7 years ago

16 February, 2019

Salla e teatrit të qytetit ”Adriana” në Ferizaj, si hapësirë e vetme publike për kulturë që funksionon në qytet, nuk po shfrytzohet vetëm destinimin kryesor të saj, por pothuajse për të gjitha aktivitetet kulturore e artistike që organizohen në këtë komunë. Madje, skena teatrale nuk po kursehet as nga tubimet politike e organizimet e ndryshme institucionale nga rajoni ynë.
Drejtori i teatrit, Fatmir Hyseni, thotë se ky fakt po e vështirëson mjaft shumë realizimin e denjë të shfaqjeve teatrale.

“Një teatër në komunën e Ferizajt duhet së paku të ketë tri salla , ne kemi vetëm këtë sallë dhe kjo paraqet një ngarkesë të shtuar dhe pengesë në realizimin e shfaqjeve teatrale. Ne jemi munduar që të bëjmë kompromise të ndryshme, por kërkesat e qytetit janë shumë të mëdha. Pasi ka shumë grupe të ndryshme kulturore tani nuk e kemi edhe qendrën rinore, dhe ky kapacitet dhe vullnet për punë nuk mund të realizohen në këtë objekt. Ka raste kur janë 4-5 aktivitete në ditë dhe është një ngarkesë e jashëtzakonshme por dhe një ngarkesë për punëtorët kur duhet prej orës 8-12 të punojë “ tha Hyseni.

Drejtori i teatrit kërkon që të bëhet një zgjidhje për këtë problem, sepse salla e teatrit ka filluar edhe të dëmtohet prej aktiviteteve të njëpasnjëshme që mbahen brenda një dite.

“I plotëson shumicën e kushteve në aspektin profesional por është vetëm një sallë, dhe dëmtohet shumë, në fakt duhet të jetë salla për ushtrime e vecantë kurse salla për premiera duhet të ruhet, këto janë ato problem, madje nuk ka sallë të punëtorisë ku punohet skenografia, ndodhë që ne duhet mbrenda ditës ta largojmë skenografinë për një program tjetër dhe prapë ta vendosim dhe kjo është shumë e vështirë, është një gjendje e vështirë që kemi kaq pak objekte të kulturës dhe rinisë dhe besoj se duhet të mendohet që sa më shpejtë të bëhet e mundur që të kemi një infrastrukturë sa më të mirë për aktivitetet kulturore”,tha Hyseni.

Në drejtorinë e kulturës thonë se ky problem do të merr fund shumë shpejtë. Drejtoresha e kulturës, rinisë dhe sportit, Xhemile Murati-Shabani, thotë se këtë vit do të fillojë të ndërtohet pallati i kulturës dhe këto telashe do të marrin fund.

“Në Ferizaj shumë shpejt do të nisë projekti I ndërtimit të pallatit të kulturës një projekt mjaft madhor ku do të përfshihen pos sallës së koncerteve, salla e teatrit, muzeut, galerisë dhe kemi menduar që me një projekt të përbashkët të përfshihen shumë salla ndihmëse, dhe poashtu planifikohet të jetë edhe muzeu i kujtesës aty. Me realizimin e këtij projekti do të jetë një lehtësi shumë e madhe për teatrin, pasi do të mund te realizojë reportoarin e vet pa pasur pengesa nga aktivitete të tjera, poashtu në të njejtin vend në pallatin e kulturës do ti lëmë hapësirë edhe teatrit”, tha Murati-Shabani.

Ndryshe, salla e teatrit “Adriana” ne Ferizaj, ka kapacitet të pranojë rreth 200 spekatorë.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

4 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

5 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim