Ferizaj

LDK Ferizaj – Ekzekutivi ka shkelur ligjin e prokurimit

Published

7 years ago

16 April, 2019

Më 23 mars të ketij viti, Komuna e Ferizajt kishte inauguruar dy pllaka përkujtimore, për të nderuar inciativën e grave të fshatit Balaj te cilat kishin nisur protestat kunder suprimimit të institucioneve te Kosovës para 30 vitesh. Mirëpo, opozita e Ferizajt thotë se ka gjetje se për vendosjen e pllakave “ Guximi i Gruas”, ekzekutivi i Ferizajt ka shkelur procedurat e prokurimit. Në një konferencë për media, Valon Halimi nga LDK-ja, tha se ekzekutivi kishte shpallur tender për vendosjen e kësaj pllake, por se nuk i pritën deri në fund procedurat e prokurimit duke nënshkruar kështu kontratën per nje punë qe ishte kryer 12 ditë me herët.

“Se Komuna e Ferizajt është bërë fenomen i paradokseve, tregon edhe rasti i fundit i inaugurimit të projektit “Guximi i Gruas “, që u bë pikërisht me 23 mars në sheshin “Adem Jashari” në Ferizaj në shënimin e përvjetorit të kësaj date të rëndësishme te vitit 1989. Inaugurimi solemn u bë për projektin të cilin e kreu disa ditë më parë ai që do të duhej ta fitonte tenderin, i cili ishte ende i hapur, madje deri me 26 mars në orën 12. Sipas njoftimit ishte caktuar edhe data e planifikuar e nënshkrimit të kontratës me fituesin, me datën 4 prill, ani se projekti tashmë ishte kryer 12 ditë para se të dihej se kush do të ishte fituesi. Dhënia e tenderëve, e me ketë edhe e parasë publike, para përfundimit të procedurave, apo deri sa tenderi është ende i hapur për konkurrim, është diçka e pazakonte dhe në kundërshtim me Ligjin e prokurimit dhe me atë te menaxhimit të financave publike”,- tha Halimi.

Ndërsa në përgjegjen e vet, pushteti lokal thotë se për këtë projekt, kur është kuptuar se janë duke u vonuar procedurat e tenderimit, ky tender ishte anuluar, për tu vazhduar pastaj me procedura të veçanta. Albion Sherifi , zyrtar për marrëdhënie me publikun tha se nuk është nënshkruar asnjë kontratë për këtë projekt, dhe nuk është asgjë në kundërshtim me ligjin.

“Opozita për fatin e keq është lëshuar në gjuhën e propagandës, është një shkollë propaganduese për të afektuar qytetarët, mirëpo këto teza opozitare tregojnë shterpësinë që ka argumentimin për temat politike nga ana e opozitës. Pllaka përkujtimore dedikuar grave të Balajve dhe demonstratave që kanë zhvilluar ato, është nisur fillimisht konform porcedurave të ligjit të prokurimit publik dhe pastaj për faktin se nuk është kryer me kohë, është anuluar e gjithë procedura e gjithë dhënja e kontratës dhe për këtë janë përdorur shërbime të tjera të kontraktuara nga ana e komunës në mënyrë që të përfundohen këto dy pllaka. E dini që Komuna e Ferizajt ka disa kontrata me operatorë të ndryshëm përmes së cilave është përfunduar edhe kjo vepër publike”,- tha Sherifi.

Sipas njoftimit per kontratë te shpallur ne KRPP, vendosja e këtyre pllakave përkujtimore komunës i ka kushtuar afro 3 mijë euro. Në konferencën e sotme për shtyp, dega e LDK-se në Ferizaj i ka bërë thirrje prokurorisë dhe gjykatës që ky rast të hetohet nga keto institucione.

Ferizaj

Aktakuzë ndaj tre të dyshuarve për mashtrim me kriptovaluta në Ferizaj

Published

3 days ago

22 May, 2026

Redaksia

Prokuroria Themelore në Ferizaj, Departamenti i Përgjithshëm, ka ngritur aktakuzë kundër të pandehurve me inicialet: A.L., R.J. dhe V.N., për shkak të dyshimit në bashkëkryerje kanë kryer veprën penale”Mashtrimi” sipas Kodit Penal të Republikës së Kosovës

Të pandehurit dyshohen se më 17 Prill 2026, në Ferizaj, rruga, “Cen Dugolli” me dashje dhe në bashkëveprim, me anë të paraqitjes së rreme të fakteve dhe duke përdor emra të rreme, i vënë në lajthitje të dëmtuarit E.F., A.F., dhe Rr.K, duke ua marrë 12,000 euro si kundërpagesë për kriptovaluta të llojit USDT të cilat do t’ua transferonin përmes portofolit digjital “wallet”.

Pasi të dëmtuarve ua marrin shumën prej 12 mijë eurove, të pandehurit i fusin paratë në një çantë të gjelbër dhe i vendosin në një dollap brenda lokalit të cilin e kishin marrë me qira. Ata kishin hapur një vrimë në pjesën e pasme të dollapit, nga ku i morën paratë pa u vërejtur dhe u larguan në drejtim të panjohur.

Pas hetimeve, u zbulua se të dyshuarit e njëjtë, duke përdorur të njëjtën skemë, kishin organizuar një transaksion fiktiv në rrugën “Ismail Reka” në Kaçanik. Edhe aty kishin siguruar një lokal me qira për t’u takuar me persona të interesuar, të cilëve u kishin ofruar transferimin e USDT-ve në vlerë prej 50 mijë Euro.

Aktakuza ngarkon gjithashtu dy nga të pandehurit, A.L. dhe R.J., për një rast të ndodhur më 18 Gusht 2024 në rrugën “Agim Prodani” në Ferizaj ku të dëmtuarit G.A. ia kishin marrë me mashtrim 2 mijë euro duke i premtuar transferimin e kriptovalutave në portofolin e tij. Me të marrë paratë nga viktima, dy të pandehurit largohen me vrap në drejtim të panjohur.

Për të gjitha këto veprime, tre të pandehurit akuzohen për veprën penale “Mashtrimi” nga neni 323 paragrafi 1, lidhur me nenin 31 të Kodit Penal të Republikës së Kosovës.

“Prokurori i çështjes, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtor për veprën penale për të cilën akuzohen dhe të dënohen sipas ligjit”, thuhet mes tjerash në njoftimin e Prokurorisë Themelore të Ferizajt.

Ferizaj

Punëtori që ra nga kulmi i një objekti në Babush u dërgua në QKUK

Published

4 days ago

21 May, 2026

Redaksia

Një 27-vjeçar ka pësuar lëndime të rënda trupore pasi ka rënë nga kulmi i një objekti në fshatin Babush, në magjistralen Ferizaj-Prishtinë.

Në raportin 24 orësh të policisë bëhet e ditur se rasti u raportua të mërkurën, 20.05.2026 rreth orës 15:00.

“Është raportuar se viktima )mashkull kosovar) derisa kishte qenë duke punuar në kulmin e një objekti ishte rrëzuar dhe kishte pësuar lëndime trupore. Viktima fillimisht është dërguar në emergjencën e Ferizajt, por për shkak të gjendjes së rëndë shëndetësore është dërguar në QKUK” thuhet në njoftim.

Në vendin e ngjarjes kanë dalë njësitë relevante të policisë dhe inspektorët e punës derisa rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Ferizaj

Policia godet një rrjet të kontrabandës së kafshëve në Ferizaj

Published

5 days ago

20 May, 2026

Redaksia

Policia kufitare ka realizuar një operacion në fshatin Rakaj të Ferizajt, nën dyshimin për kontrabandë të dhe mbajtje të paligjshme të kafshëve.

Në njoftimin e policisë bëhet e ditur se gjatë kontrollit të njësive policore dhe inspektorit të Agjencisë së Ushqimit dhe Veterinës (AUV), në pronën e të dyshuarit L.K dhe dy lokacione tjera, janë gjetur 100 krerë dele pa numra matrikulli dhe pa asnjë dokumentacion përcjellës mbi origjinën apo kontrollin veterinar.

Me vendim të Prokurorit të Shtetit rasti po trajtohet si “Kundërvajtje doganore” dhe i është dorëzuar Doganës së Kosovës në Han të Elezit për procedim të mëtutjeshëm.