Ferizaj

Banorët e Dubravës ankohen për probleme me kanalizimin

Published

7 years ago

11 November, 2019

Bllokimi i kanalizimit në fshatin Dubravë të Ferizajt, po ua vështirëson jetën banorëve të kësaj ane. Nga dëmtimi i gypave, ujërat e zeza po ua vërshojnë oborret e shëpive. Ata thonë se përveç erës së rëndë, uji i grumbulluar po ua pamundëson qarkullimin normal.

“Janë mbyllur kanalizimet, shikoje aty kanalizimin, gypat nuk po e marrin ujin. Kjo lidhet me lumë të madh andej, askush nuk merr parasysh këtë punë. Të gjithë bllokohemi këtu, jemi 10 shtëpi, duan fëmijët të shkojnë në shkollë, ndonjë të sëmurë diçka, kur del uji nuk kemi nga të shkojmë, dalim nga anë tjera, disi të bëhet ndonjë zgjidhje. Kanë thënë që vijnë, e premtojnë, por askush akoma nuk na ka marrë parasysh. Ne më shumë në hall jemi këtë gyp të na e rregullojnë, të hapet kanalizimi nëse mundet ndokush”, tha Bejtullah Kadrolli.

“Kemi dëshirë këtë të na e pastrojnë. Nëse vdes ndokush, na duhet kufomën ta mbajmë një javë, dy javë, derisa të pushon uji këtu, sepse përndryshe nuk mund të dalim askund. Uji vjen afër 30 metra, 40, nga ky kanalizim këtu, nuk kemi nga të shkojmë”, u shpreh Aziz Ahmeti.

Një pjesë tjetër e këtij fshati po kanë probleme me erën e rëndë që kundërmon nga kanalizimi. Ata frikësohen se era e rëndë do t’ua dëmtoj shëndetin.

“Këtu është problemi me kanalizim, ka shpërthyer gypi, askush nuk merr masa, vjen këtu uji, era e rëndë, plus hedhin edhe rroba si mbeturina këtu pa masë, çkado, hedhin natën, nuk e dimë çka bëjnë. Kjo është keq për të gjithë, për të gjithë vlen e kështu që nëse munden të marrin masa ndokush”, theksoi Muhamet Bakolli.

“Është prishur gypi, uji e ka bartur gypin edhe më nuk kanë ardhur ta rregullojnë fare. Kanë qenë të komunës e kanë shikuar, kanë thënë për ta rregulluar por jo nuk janë duke ardhur. Në mbrëmje, gjatë verës nuk mundemi të rrimë jashtë nga era e keqe”, tha Elez Guriqi.

Ndërsa, zyrtari për marrëdhënie me publikun të komunës së Ferizajt, Albion Sherifi, thotë se projekti për rregullimin e kanalizimit në fshatin Dubravë do të nis vitin e ardhshëm, pa treguar se në cilin muaj.

“Në kuadër të investimeve kapitale që po ndodhin në gjithë territorin e Ferizajt, komuna e Ferizajt fillimisht ka bërë evidentimin e të gjitha efekteve apo mangësive, sfidave që paraqiten në terren, ndër to edhe në fshatin Dubravë. Ju tashmë e dini që ka një gamë projektesh të cilat do të zhvillohen dhe janë planifikuar për fshatin Dubravë ku jeton një pjesë e madhe e komunitetit joshumicë në Ferizaj. Edhe kjo sfidë besoj që do të tejkalohet me intervenimin e instuticioneve lokale, në këtë rast thashë ka projekte konkrete të cilat synojnë të zgjidhin problemin e kanalizimit që është në atë zonë”, tha Albion Sherifi.

Shumicën e popullsisë së fshatit Dubravë e përbëjnë komunitetet joshumicë.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.