Kryetari i
komunës së Ferizajt Agim Aliu, ka paraqitur punën e qeverisë që ai drejton para
qytetarëve të cilët nuk ishin të shumtë në numër. Ndër të arriturat e
ekzekutivit të këtushëm, Aliu veçoi vendimin për heqjen e taksës komunale për
biznese, nënshkrimin e marrëveshjes për ndërtimin e fabrikës së ujit në Talinoc
të Muhaxherëve, asfaltimin e dhjetërave rrugëve, fillimin e ndërtimit të 5
shkollave, nënshkrimin e memorandumit për ndërtimin e Qendrës Kryesore të Mjekësisë
Familjare, hapjen e Qendrës së Inovacionit, e të tjera.
Padyshim,
Aliu nuk la pa përmendur projektin kryesor të tij, ”Bashkimi i Qytetit”, për
të cilin tha se grupe të ndryshme janë shqetësuar kot për këtë projekt.
“Ka vazhduar dhe po vazhdon me dinamikë të
lartë, siç e shihni projekti “Bashkimi i Qytetit” dhe ju e dini atë që e
kam deklaruar edhe më herët si një lloj shqetësimi apo si një lloj ndjenje e
disa njerëzve për t’u kënaqur me dështimin e dikujt, por u kemi thënë edhe
atëherë, u themi edhe sot që qeverisja ime nuk e njeh dështimin dhe nuk do ta
njeh asnjëherë, përkundrazi do ta njeh vetëm suksesin dhe zhvillimin e
projekteve më identitare për të gjithë Republikën e Kosovës. Çdo ditë e kalur e
projektit do të jetë heshtje e zërave
skeptik, pavarësisht propagandave që i kanë zhvilluar për gjoja lloj ndalesash
për atë projekt, ky projekt do të përfundoj para përfundimit të kontratës, pra
është më mirë sesa vet plani dinamik. Veçova këtë projekt pasi ka pasur shumë
zhurmë, por ajo që do duhej të ndryshonte tek pjesa e politikës që mos të luten
për fatkeqësinë dhe dështimin e tjetrit, sepse fatkeqësia e tjetrit është
dështim edhe për ata”, tha Aliu.
Arritje
tjetër Aliu e cilësoi pezullimin e lejeve ndërtimore, duke thënë se shumë
shpejt do të paraqesin një projekt, i cili, sipas tij, do të jetë model i
ndërtimit në Ferizaj.
“Ne këtë vit kemi marrë një vendim për pezullimin
e lejeve ndërtimore, e dimë që nga shumëkush është parë në mënyra të ndryshme,
por duhet ta keni të qartë se ne dëshirojmë që të japim edhe shembuj konkret se
pse është bërë pezullimi dhe se çka do të pasoj pas këtij pezullimi. Pra, shton
masën e kujdesit, mbi të gjitha tregon për vizionin që kemi ne se si do të
duket Ferizaj nesër, pavarësisht problematikës së dokumenteve ligjore dhe
strategjike që nuk kanë qenë të miratuara nga ne, por që ne jemi qeveri kontinuiteti
dhe duhet vazhduar t’i zbatojmë ato plane që janë miratuar nga legjislacionet e
mëhershme, ne do të paraqesim para qytetarëve projekte konkrete se çfarë do të
bëhet me Ferizajn. Shumë shpejtë jemi në përfundim e sipër të një projekti për
një zonë të caktuar të qytetit për të dëshmuar se Ferizaj mund të dëshmohet,
mund të bëhet më i mirë dhe Ferizaj mund të bëhet më modern dhe projekti ynë
është ai që i përmbledh këto komponente” ,tha Aliu.
Aliu, lavdëroi
qeverinë e tij për përmbyllje të proceseve të hapura prej kohësh.
“Ne kemi qenë qeverisje që kemi përmbyllur tema
të hapura për dekada, pavarësisht vështirësive të caktuara, kemi thënë për
spitalin, varrezat dhe së fundmi e kemi përfunduar edhe projektin e emërtimit
të rrugëve dhe shesheve”, theksoi Aliu.
Më pas fjala
iu dha qytetarëve të pranishëm, të cilët u ankuan për probleme në fusha të
ndryshme.
“Shëndetësia nuk është në rregull, në Ferizaj nuk
është bërë asgjë, kam shku me marrë infuzion, 50 centë nuk ka pas mundësi me e
pru një gjilpërë, është dashur me shku me ble mandej me marrë, që tri vite nuk
kam marrë barna për diabet këtu në Ferizaj”, tha Rasim Çerkini.
”Mbi 70% të buxhetit të paraparë për shëndetësi ne e
kemi bërë për furnizim me barna dhe po të krahasohet me vitet e kaluara ky vit
me furnizm është shumë më mirë se vitet paraprake. Sa i përket infuzioneve ne
nuk e kemi obligim me dhënë infuzione ai jepet në spitale dhe kompetente është
ministria, por ne ua kemi ofruar qytetarëve këtë shërbim”, tha Bekim Ademi, drejtor i
Shëndetësisë në Ferizaj.
“Çka është duke ndodhur që ka ngecur projekti i kinemasë dhe Qendra e Inovacionit nuk është duke funksionuar”, pyeti Florina Ujupi.
“Problemi i kinemasë është se ka filluar në vitin
2015 dhe është projekt i pashfrytëzuar, por ne në ndërkohë jemi munduar me adaptu
atë objekt“, tha
Lulzim Aliu, drejtor i Urbanizmit.
“Që sa kohë fshati Greme nuk ka ujë, që është gjë
elementare, duhet disa kilometra me shku me u furnizu me ujë, mos na thuani sot
ose nesër, por të paktën ta dimë një afat kur’‘, tha Rexhep Ademi nga fshati Greme.
“Sa i përket ujit në fshatin Greme me kërkesë të
banorëve ne e kemi ndryshuar lokacionin e rezervuarit të ujit, tashmë është
vetëm i tenderuar, në ditët në vijim do të zgjedhet kompania dhe me fillim të
vitit ky problem do të zgjidhet”, tha Arbër Bytyqi, drejtor i Infrastrukturës.
Aliu, qeverisjen
e tij e quajti kampion sa i përket shqiptimit të gjobave mandatore kundër ndotësve
të ambientit, ku gjatë këtij viti tha se janë shqiptuar më shumë se 250 të
tilla.
Lidhur me
projektet të cilat parashihen të realizohen, Aliu theksoi ndërtimin e Pallatit
të Kulturës.