Deri para dy vitesh ky objekt shfrytëzohej nga Gjykata Themelore e Ferizajt, mirëpo pas kalimit të këtij institucioni në një objekt të ri, dalëngadalë aty kaluan edhe disa drejtori komunale si ajo e Arsimit, e Infrastrukturës dhe e Urbanizmit, ndërkaq së fundmi atyre iu bashkua edhe Zyra e kryetarit të komunës Agim Aliu.

Zyrtari për marrëdhënie me publikun pranë zyrës së kryetarit Aliu, Albion Sherifi, tha se në objektin aktual ka më shumë hapësirë, që gjë sipas tij, do të ndikojë në shtimin e efikasitetit në punë.

 “Zhvendosja e disa drejtorive në këtë rast edhe Zyra e Kryetarit të komunës është një proces që ka nisur kohë më parë, tash së fundmi edhe Zyra e Kryetarit u është bashkuar drejtorive të ndryshme të cilat funksionojnë në këtë objekt me të vetmin qëllim që të rritet efikasiteti i punës, që të ketë një dinjitet për pritjen e qytetarëve, të ketë hapësira të mjaftueshme dhe kushte të punës që do të ndihmonin të qojmë përpara agjendën tonë qeverisëse dhe të rritet kualiteti i shërbimeve për qytetarë, në këtë objekt tashmë funksionojnë tri drejtori komunale, sic është Drejtoria e Arsimit, e Infrastrukturës dhe Drejtoria e Urbanizmit dhe Mjedisit dhe tash së fundmi u është bashkuar edhe Zyra  e Kryetarit të komunës me disa nga zyret e saj.  Ju e dini se objekti i vjetër i komunës nuk përmbush nevojat e kushtet e nevojshme të punës për zyrtarët që shërbejnë aty, por edhe për shërbimet që u ofrohen qytetarëve duke pasur parasysh që është një objekt i amortizuar”, tha Sherifi.

Megjithatë, nuk përjashtohen mundësitë që drejtoritë komunale të jenë  përsëri në një vend. Sherifi thotë se ende qëndron idea që objekti i vjetër i komunës të rrënohet dhe aty të ndërtohet një objekt i ri përmes partneritetit publiko-privat.

 “Ju e dini që kryetari Aliu ka pasur një plan dhe ka ende  një vizion të tillë për ndërtimin e një objekti të ri të komunës  së Ferizajt për të cilin duhet të bëhen studimet fillestare për nevojat që do të përmbush ky objekt, por të sigurohet edhe fondi investiv në mënyrë që të kemi përfundimisht një objekt  dinjitoz të institucionit të Ferizajt, Kuvendit të Komunës, si dhe në përgjithësi duke rrumbullakësuar këtë investim dhe të kemi ambiente më dinjitoze për qytetarë dhe për shërbyesit civilë”, tha Sherifi.

 Në objektin e vjetër të komunës që gjendet pranë sheshit “Adem Jashari”, kanë mbetur nënkryetari i komunës, Drejtoria e Shëndetësisë,  e Financave, e Bujqësisë, Drejtoria e Pronës, Gjeodezisë dhe Kadastrit, ajo e Kulturës, Rinisë dhe Sportit, Drejtoria e Shërbimeve Publike, e Zhvillimit Ekonomik dhe e Administratës.