Në nder të kirurgut të njohur ferizajas Safet Beqiri janë mbajtur homazhe dhe mbledhje komemorative për t’i dhënë lamtumirën e fundit.

Ndër të pranishmit e shumtë, sot kishin ardhur nga Gjermania edhe kolegë të doktor Safet Beqirit, Eckhart Mayer koleg dhe Servert Bolukbas. Ata e konsideruan humbje të madhe ndarjen nga jeta të Beqirit.

“Ai ka qenë një kirurg i mrekullueshëm dhe ka qenë në gjendje të operojë në rastet më komplekse të operimeve, shumë me kujdes me pacientin dhe me standardet më të larta që kanë qenë të mundshme dhe vetëm pak kirurg kanë mundur të bëjnë të njëtën punë. Ndjeshmëria dhe përkujdesja për të gjithë pacientët individualisht ka qenë e jashtëzakonshme dhe prandaj është bërë shumë i famshëm, ka fituar shumë respekt nga pacientë tanë dhe të gjithë ne  në spitalin tonë dhe tek spitalet e tjera”,  tha Eckhart Mayer.

“Ai ka qenë një urë në mes njerëzve, vendeve dhe feve. Ai ka ndihmuar të tjerët duke mos pyetur se nga janë. Ai ka “infektuar” të tjerët me mirësinë e tij. Ai ka qenë një humanist i vërtetë, ne e pyesnim se kur mendon se vdesin njerëzit, kur ata të vrahen, ndërsa ai thoshte jo jo, njerëzit vdesin atëherë kur ata harrohen. Ne nuk do ta harrojmë kurrë profesor Safet Beqirin”, tha Servert Bolukbas.

Kirurgu Beqiri u shqua edhe për aktivizëm dhe kontribute bamirëse në Kosovë dhe jashtë saj.

 “Jemi sot këtu për t’i dhënë lamtumirën e fundit profesor doktor Safet Beqirit, bashkëluftëtarit tonë, mjekut të nderuar i cili gjatë kohës së luftës çlirimtare të Kosovës ndihmoi shumë. Humanisti u doli në ndihmë të gjithë atyre që kishin nevojë për ndihmën mjekësore gjatë kohës së luftës për liri. Ne bashkëluftëtarët do ta kujtojmë gjithmonë personalitetin dhe figurën e tij”, tha Hysni Gucati, kryetar i Organizatës së Veteranëve të UÇK-së.

“Dëshira që ne të bëjmë për popullin tonë, për shpëtimin tonë, lindën shtyllat e forta dhe besnike që në çdo kohë mund të them për veprimtarin e shoqatës bamirëse humanitare të Kosovës “Nëna Tereza” ishte doktor Safet Beqiri. I guximshëm, veprimtar i palodhshëm, njeri që me sy sheh, me mendje kupton dhe me zemër dashuron e me duar vepron”, tha Don Lush Gjergji.

Fjalë të mira për doktorin e ndjerë tha edhe kryetari i Ferizajt Agim Aliu.

”Ai ishte atje ku vdekja kaploi pacientët e tij, mijëra herë u përball, i shkuli rrënjët guximshëm së keqes nga gjaku e mishi i pacientëve, sa trim është ai që pa vdekjen në sy e i buzëqeshi pasi e mundi, ishte mjeku duarartë”, tha ai.

I biri i doktorit Safet Beqiri, Jeton Beqiri, falënderoi të gjithë që në këtë mënyrë e nderuan babain e tij.

“Kjo akademi komemorative sot ne familjarëve të ngushtë po na lehtëson dhembjen e pikëllimin nëpër të cilën po kalojmë së bashku, po na bënë të ndihemi shumë krenarë e faqebardhë edhe kjo po na jep forcë që sot bashkërisht ta përcjellim në amshim e cila do të kujtohet edhe tek gjeneratat e tjera”,  tha Jeton Beqiri.

Safet Beqiri ka ndërruar jetë të shtunën në moshën 65 vjeçare, ndërsa varrimi i tij është bërë sot në vendlindjen e tij në Koshare të Ferizajt.