Ferizaj

Pas 13 vitesh në pozita udhëheqëse, Naim Ferati lë politikën për t’i përkushtuar drejtësisë

Published

6 years ago

16 June, 2020

13 vite radhazi ishte pjesë e pushtetit lokal të Ferizajt, duke u bërë personi i vetëm që i rezistoi më së gjati ndryshimeve qeverisëse në këtë komunë. Tani, ish-nënkryetari i komunës së Ferizajt Naim Ferati, përfundimisht është larguar nga skena politike ferizajase, për t’iu përkushtuar profesionit të tij, avokaturës.

Ferati i cili deri para disa ditësh ishte nënkryetar i komunës në qeverinë e Agim Aliut, që nga viti 2007 kishte pozita të ndryshme në ekzekutiv. Ai ka udhëhequr me Drejtorinë e Kulturës, atë të Administratës, si dhe ka mbajtur pozitën e zëdhënësit të komunës.

“Ishte një rrugëtim mjaft i gjatë i karrierës sime në jetën publike të qytetit të Ferizajt duke u përfshirë nga jeta mediale në atë kohë nga Radio Tema, shoqëria civile, mandej në Odën Ekonomike të Kosovës e më tutje në jetën politike dhe publike institucionale të komunës së Ferizajt. Kisha mundësinë dhe rastin që m’u dha duke i falënderuar të gjithë kolegët dhe qytetarët e Ferizajt që të mbaj pozita udhëheqëse duke udhëhequr departamente të rëndësishme në komunën e Ferizajt deri në fund në pozitën e nënkryetarit të komunës së Ferizajt. Megjithë kapacitetin intelektual, moral dhe njerëzor jam përkushtuar që t’i kryej këto përgjegjësi me përkushtim dhe ndërgjegje të mirë, dhashë aq sa dita dhe munda dhe besoj se ishte një vetëpërmbushje edhe shpritërore edhe intelektuale, por edhe profesionale dhe vjen një moment që njeri dëshiron të realizoj pjesën që është përgatitur profesionalisht dhe në këtë rast profesioni im dhe përgatitja ime ka qenë pjesa e drejtësisë dhe kështu vendosa të jem në profesionin tim që edhe këtu të shërbej për qytetarët dhe institucionet”, tha Naim Ferati.

Derisa vlerësohet lartë puna dhe kontributi i Feratit dhënë në institucionet lokale ndër vite, ekzekutivi i këtij qyteti tani është duke kërkuar emrin e ri që do ta zëvendësoj Feratin. Albion Sherifi, zyrtar për marrëdhënie me publikun, thotë se javën që vjen do të bëhet publik emri i nënkryetarit të ri të Ferizajt.

“Nënkryetari i komunës së Ferizajt Naim Ferati ka dhënë dorëheqjen e tij për të vazhduar në fushën profesionale dhe ne e falënderojmë Feratin për kontributin e tij në institucionet e Ferizajt, padyshim ishte një vlerë për qeverisjen tonë që shprehim falënderimin tonë publik. Ne jemi në konsultim të vazhdueshëm me partnerët e koalicionit që të propozohet emri i ri i nënkryetarit apo nënkryetares së komunës në mënyrë që mos të mbetet vakante kjo pozitë. Është një proces që do të përmbyllet shumë shpejtë, ndoshta javën e ardhshme”, tha Sherifi.

Naim Ferati ishte pjesë e Aleancës për Ardhmërinë e Kosovës, parti kjo e cila bashkëqeverisë me PDK-në në Ferizaj, andaj edhe emri që do të propozohet për pozitën e nënkryetarit do të jetë nga AAK-ja.

Ferizaj

Ndërroi jetë artisti dhe koreografi i shquar ferizajas, Bajram Tahiri

Published

2 days ago

03 February, 2026

Redaksia

Ka ndërruar jetë Bajram Tahiri, artist, valltar dhe koreografi i shquar i ansamblit “Kastriotët” në Ferizaj.

I ndjeri gjithë jetën e tij artistike ia kushtoi ruajtjes dhe begatimit të traditës dhe trashëgimisë kulturore, fillimisht si valltar pastaj edhe si koreograf i A.K.V ,,Kastriotët” Ferizaj.

Për një periudhë kohore, nga viti 1999-2009, Tahiri ishte Drejtor Operativ në KRM “Pastërtia”, pastaj nga viti 2017 deri në vitin 2020 shërbeu si këshilltar politik në Ministrinë e Tregtisë dhe Industrisë, derisa nga viti 2010 udhëhoqi me kompaninë “Mbrojtja e Ambientit”.

Mbledhja komemorative për artistin e ndjerë, Bajram Tahiri, mbahet më 3 Shkurt 2026, ora 14:00 në Teatrin “Adriana” kurse ceremonia e varrimit nga ora 15:30 në varrezat e reja të qytetit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.