Komuna e Ferizajt siç duket është rikthyer në vatër të virusit COVID-19. Vetëm gjatë ditës së djeshme kanë rezultuar pozitiv 21 persona, prej tyre 7 janë drejtorë të drejtorive komunale dhe 3 zyrtarë të kabinetit të kryetarit. Ndërkohë, kryetari i kësaj komune Agim Aliu, pas rezultateve ka dalë negativ.

Drejtori i Shëndetësisë në Ferizaj Bekim Ademi, i cili ka rezultuar pozitiv me COVID-19, thotë se gjendja shëndetësore e drejtorëve është stabile.

“Nga IKSHP-ja në komunën e Ferizajt janë konfirmuar 21 persona dhe të gjithë janë persona kontakti që kanë qëndruar në vendin e punës bashkërisht dhe si pasojë e saj ka ardhur tek infektimi. Momentalisht janë 10 persona me detyrë zyrtare që janë të konfirmuar që të gjithë janë në vetizolim dhe iu kisha rekomanduar që të qëndrojnë të vetëm në familjet e tyre siç po e bëj edhe unë ku jam duke qëndruar i vetëm larg familjes“, tha Ademi.

Ademi thotë se moskryerja e testeve për rastet e kontaktit do të paraqes shumë telashe, pasi nuk dihet numri i të infektuarve.

“Me kohë nuk jam pajtuar me këtë formë, pasi derisa e kemi pas listën e kontaktit gjendja ka qenë më e kontrolluar ndërsa me ndalimin e listës së kontaktit është gabim, pasi marrë shembull ne drejtorët iu kemi përmbajtur rregullave, por kemi pasur shumë kontakte me palë dhe kjo mund të paraqes një rrezik më të shtuar”, tha Ademi.

Në mesin e të infektuarve nga Ferizaj janë dy gjinekolog, një infektolog, një pediatër dhe dy infermiere.