Një ditë pas mbajtjes së seancës të
Kuvendit Komunal të Ferizajt reaguan asamblistët e Lëvizjes Vetëvendosje, duke
shprehur kritika për mbarëvajtjen e mbledhjes së djeshme, e cila u zhvillua në
mënyrë virtuale.
Ky subjekt politik në Ferizaj thotë
se kërkesa e tyre për shtyerje të seancës së djeshme nuk u mor parasysh me qëllim
të kontrabandimit të disa propozim-vendimeve.
“Kjo seancë ishte skandaloze, ishte e tmerrshme dhe e cila duhet të
përsëritet. Tek pika numër 7 e cila ka të bëj me dhënien në shfrytëzim për
ndërtim të pronave komunale dhe kur e marrim arsyetimin e asaj pike duket si një ese e shkurtër, më pas
neni 2 dhe 3 janë dy nene që ua mundësojnë ndërtimin e egër edhe në prona të
komunës shumë individëve, kemi parasysh rastin e objektit tek “Tefik
Çanga”, kjo po bëhet për t’u legalizuar ai lloj krimi, po ashtu kjo
rregullore është në kundërshtim me ligjin për dhënien në shfrytëzim dhe këmbim
të pronës së paluajtshme të komunës ku bazuar në këtë ligj neni numër 8
procedurat e dhënies për shfrytëzimin e pronës së paluajtshme komunale, pra nuk
mund t’i jepet toka komunale investitorëve privat duke mos përfillur procedurat
e bazuara në legjislaturat në fuqi”, tha Hyseni.
“Gjatë seancës së djeshme shumica e anëtarëve të Kuvendit kemi hasur
në probleme teknike rreth diskutimeve të pikave të rendit të ditës dhe duke u
bazuar në rëndësinë e disa prej tyre ne si Vetëvendosje kemi kërkuar që kjo
seancë të shtyhet deri në plotësimine kushteve të favorshme për mbarëvajtjen e
saj, kërkesë kjo e cila u refuzua dhe
nuk u mor parasysh nga udhëheqësit e Kuvendit Komunal me ç’rast rezultoi me
lëshimin e seancës nga ne, nga kjo shpërfillje e kërkesës sonë shumë nga
anëtarët e Kuvendit nuk arritëm diskutime konstruktive në pika të rëndësishme
si ato të hartimit të akteve statutore juridike siç është rasti i statutit të
Galerisë së Arteve” Ismail Rama”, ku Kuvendi Komunal nuk ka
kompetencë të merret me këtë çështje pasi ato janë të rregulluara me ligje
përkatëse”, tha
Fitore Lipovica -Reshani.
Megjithatë, udhëheqësja e Kuvendit
Komunal Kristina Gashi-Bytyqi, ka një tjetër arsyetim.
“Ne jemi bazuar në ligjin për procedurën e përgjithshme administrative
të nenit 39, gjithashtu kemi shkuar në bazë të ligjit për vetëqeverisje lokale
dhe rregullores së punës së Kuvendit. Seanca konsideroj se ka qenë e rregullt, pasi që është propozuar rendi i ditës ka kaluar me
shumicë votash dhe është proceduar çdo pikë
e rendit të ditës ku ka qenë transparente edhe votimi i secilit ka pasur
mundësi të shihet. Nëse për ata nuk ka qenë diçka në rregull unë besoj se ata
kanë qenë një arsye nëse ka pasur probleme teknike pasi ata kanë qenë së bashku
dhe kanë marrë fjalën nga 2-3 telefona dhe kanë shkaktu fonikë, ndërsa ata kanë
kërkuar që të shtyhet edhe seanca, por me shumicë votash është miratuar të
mbahet seanca dhe të procedohen pikat, kështu ne jemi bazuar në ligjin për vetëqeverisje
lokale dhe rregulloren e punës së Kuvendit ku fillimisht votohet rendi i ditës
i cili ka kaluar përmes KPF-së pastaj prej anëtarëve të Kuvendit veç e veç,
kështu që rendi i ditës ka kaluar me 23 vota dhe nuk ka pas arsye të hedhet në
rend dite që të shtyhet seanca, kështu që kjo ka qenë arsyeja pse s’ka dalë në
rend dite propozimi i tyre“, tha Gashi-Bytyqi.
Dje, për herë të dytë Kuvendi i
Ferizajt mbajti mbledhje online.
————-=