Ferizaj

Paralajmërohet padi ndaj rektorit Agron Bajraktari

Published

8 years ago

22 May, 2018

Përfaqësues të organizatës ‘’Demokracia Studentore’’ së bashku me një grup të doktorëve të shkencave dhe profesorë universitar të komunës së Ferizajt, sot janë bërë bashkë për të diskutuar, siç thanë ata, keqpërdorimet që po bëhen në Universitetin e Ferizajt, duke kërkuar edhe njëherë shkarkimin e rektorit të këtij universiteti Agron Bajraktari.

Mexhid Ramusa nga ‘’Demokracia Studentore’’, tha se në Universitetin e Shkencave të Aplikuara në Ferizaj janë duke u bërë shumë shkelje ligjore dhe se për këtë do të ngrisin edhe padi.

“Prezantuam të gjitha shkeljet ligjore që janë bërë deri më tani në Universitetin e Shkencave të Aplikuara në Ferizaj, kemi bërë një përmbledhje dhe tash e tutje do t’i drejtohemi dhe organeve të drejtësisë me një padi ndaj rektorit të Shkencave të Aplikuara në Ferizaj Agron Bajraktarit për gjendjen që e ka shkaktuar në Universitetin e Ferizajt. Në këtë debat kanë qenë të ftuar edhe prokurori dhe policia por nuk kanë marrë pjesë për arsye të tyre personale”, tha Ramusa.

Profesor doktor Muhamet Avdyli, tha se Universiteti i Ferizajt është degraduar aq shumë saqë shumë shpejt, sipas tij, do të mbetet vetëm një kolegj.

“E keqja më e rëndë që unë kam dëgju për këtë universitet dhe më ka thënë vetë profesori Basri Beqiri që dje kam nejt me të, ka thanë që neve vet rektori na ka ofru nga 20-30 indeksa dhe ka thënë duhet t’ua jepni studentëve notën e këtyre profesorëve se punojnë në qeveri dhe nuk munden me ardhë në universitet, merreni me mend një rektor universiteti kur ofron kolegëve të vet dhe në njëfarë mënyrë i kërcënon për me e dhënë notën e atyre se nuk munden me ardhë se janë në qeveri dhe e keqja më e madhe është se të njëjtit profesorë nuk kanë pranu me bë një gjë të tillë dhe u është ndalur hyrja në universitet, ata janë njerëz të Ferizajt është Mehdi Xhokli, Basri Beqiri, pa asnjë procedurë janë larguar nga fakulteti pse s’kanë pranu me hy në shërbimet e rektorit”, tha Avdyli.

Në këtë takim u prezantuan disa të gjetura të organizatës “Demokracia Studentore” që kishin të bënin me profilet e profesorëve të cilët ligjërojnë në Universitetin e Ferizajt për të cilët u tha se janë figura të afërta me PDK-në.

Këtij takimi mbështetje i dhanë edhe asamblisti i Kuvendit Komunal nga Lëvizja Vetëvendosje Dritëro Hyseni dhe anëtari i Nismës Socialdemokrate Fazli Shabani, si dhe një numër i vogël i studentëve të Universitetit të Ferizajt.

Ferizaj

Ndahet nga jeta veterani i UÇK-së, Avdi H. Ahmeti

Published

2 hours ago

03 November, 2026

Redaksia

Është ndarë nga jeta Veterani i Ushtrisë Çlirimtare të Kosovës, Avdi H. Ahmeti nga Ferizaj.

Njoftimi mortor u bë i ditur nga Organizata e Veteranëve të Luftës së UÇK-së, dega në Ferizaj.

Sipas njoftimit, varrimi i të ndjerit do të bëhet të mërkurën, më 04.11.2026 ora 14:15 në varrezat e lagjes Karametaj, të fshatit Greme të Ferizajt.

Ferizaj

Ndalohet për 48 orë një person për rastin e vdekjes të punëtorit në Ferizaj

Published

3 weeks ago

13 October, 2026

Redaksia

Prokuroria Themelore në Ferizaj, ka njoftuar për ndalimin e një personi me inicialet B.T. lidhur me rastin që ka ndodhur dje rreth orës 15:50, në rrugën ”Cen Dugolli” në Ferizaj, ku humbi jetën një punëtor derisa po punonte në një objekt ndërtimi. Viktima dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Sipas prokurorisë, i arrestuari B.T. është ndaluar nën dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Njoftimi i Prokurorisë:

Ndalohet një person për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”

Ferizaj, 13 Tetor 2026– Prokuroria Themelore në Ferizaj, njofton opinionin publik se me vendim të Prokurorit të Shtetit, ka ndaluar një (1) person të dyshuar me iniciale B.T., në kohëzgjatje prej 48-orësh, për shkak të dyshimit të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”nga neni 358 sipas Kodit Penal të Republikës së Kosovës.

Rasti në fjalë ka ndodhur në rrugën ”Cen Dugolli” në Ferizaj, rreth orës 15:50:, ku, një person, i cili po kryente punime në një objekt ndërtimi, dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Vdekjen e viktimës e ka konstatuar mjeku kujdestar i Qendrës Emergjente në Ferizaj, kurse, me urdhëresë të prokurorit të shtetit, trupi i pajetë i vitkimës është dërguar për obduksion në Institutin e Mjekësisë Ligjore në Prishtinë.

Prokurori i shtetit, pas daljes në vendin e ngjarjes, ka udhëzuar Policinë dhe Inspektoratin e Punës, për ndërmarrjen e veprimeve të nevojshme hetimore, me qëllim të zbardhjes së rrethaneve të këtij rasti.

Prokuroria Themelore në Ferizaj, ndaj të dyshuarit të lartëpërmendur, brenda afatit ligjor do të vazhdoj me procedurat e mëtejme ligjore.

Ferizaj

Humb jetën një punëtor në një objekt në ndërtim në Ferizaj

Published

3 weeks ago

12 October, 2026

Redaksia

Një punëtor 54 vjeç ka humbur jetën pasi dyshohet se gjatë punës të jetë rrëzuar në një objekt në ndërtim në Ferizaj.

Rasti është raportuar të ketë ndodhur pasditen e sotme rreth orës 15:40, në rrugën “Cen Dugolli”.

Në vendin e ngjarjes kanë dalë policia dhe ekipet e Emergjencës, të cilat kanë konstatuar vdekjen e tij. Sipas policisë dyshohet se gjatë punimeve ndërtimore viktima është rrëzuar nga kati përdhes në bodrum.

Në vendngjarje kanë dalë edhe hetimet rajonale dhe inspektorët e punës derisa për të gjitha veprimet policore është njoftuar prokurori i shtetit.