Ferizaj

Homazhe për Heronjtë e Koshares në 20 vjetorin e flijimit për atdhe

Published

7 years ago

30 May, 2019

Pasi u bënë homazhe dhe u vendosën lule tek Varrezat e Dëshmorëve në Ferizaj, në fshatin Zaskok të Ferizajt, është mbajtur manifestim në nderim të jetës dhe veprës së Dëshmorëve të Kombit, Ramadan Salihu dhe Hasan Çerkini, të rënë në kufirin shqiptaro – shqiptar.
Në shënimin e 20 vjetorit të rëniës së dy Dëshmorëve të Kombit, i pranishëm ishte udhëheqësi i betejës së Koshares
Rrustem Berisha, komandant i brigadës “Agim Ramadani”, i cili tha se shumë të rinj e burra nga Ferizaj i’u bashkuan asaj beteje.

“Sot këta heronj që po i përkujtojmë dhe suksesi i betejës së Koshares është i lidhur ngushtë me kontributin e këtyre dëshmorëve që sot po i përkujtojmë. Jam shumë krenar që Ferizaj me një numër të madh të luftëtarëve, diku 390 ushtarë nga Ferizaj kanë marrë pjesë në Betejen e Koshares, edhepse nëpër qytete tjera thonë se Ferizaj nuk ka kontribuar në luftë, kjo nuk është e vërtetë, Ferizaj ka dhënë një kontribut të jashtëzakonshëm, unë di vetëm për betejën e Koshares por ka edhe në beteja të tjera” – tha në fjalimin e tij Rrustem Berisha.

Kryesuesja e Kuvendit Komunal të Ferizajt, Kristina Gashi-Bytyqi, tha se dëshmorët kanë vënë gurët e themelit të lirisë që e gëzojmë, derisa përmendi se kjo qeveri lokale themeloi Muzeun e kujtesës i cili do të ruajë vlerat e luftës.

“Dua të përmend edhe vendimin për themelimin e Muzeut të Kujtesës, ku më në fund familjet e dëshmorëve dhe veteranët do të kenë mundësi t’i ruajnë kujtimet dhe të prezantojnë vlerat e luftës, ku do të mund t’u ofrojnë qytetarëve të njohin të kaluarën dhe luftën e lavdishme të UÇK-së“,- tha Kristina Gashi- Bytyqi.

Nënkryetari i Organizatës së Veteraneve të Luftës, Luan Jahiri, në fjalën e tij të rastit, tha se gjeneratat e reja duhet të dijnë gjithmonë se liria e tyre u pagua shtrenjtë.

“Triumfi i luftëtarëve nga mbarë trojet e Kosovës në këtë betejë hisotrike bëri që të shembet muri i krijuar në mes Kosovës dhe Shqipërisë. Humbëm shumë shokë në beteja, por krenaria që na lanë dëshmorët mund dhimbjen që e kemi“- tha Jahiri.

Rrugëtimin e dëshmorëve Ramadan Salihu dhe Hasan Çerkini deri në altarin e lirisë e tregoi drejtori i shkollës së Zaskokut, i cili tha se këta dy dëshmorë lanë jetën e mirë në perëndim për t’iu bashkangjitur UÇK-së, dhe për të bërë sakrificën sublime për atdheun e tyre.
Gjatë ditës së sotme, në 20 vjetorin e rënies, tek varrezat e dëshmorëve të Ushtrisë Çlirimtare të Kosovës në Ferizaj janë përkujtuar dëshmorët e kombit Fatmir Ratkoceri, Lutfi Haxhidema, Sylejman Haxhidema, Ramadan Salihu dhe Hasan Çerkini.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.