LVV mban tubim me elektoratin në Kaçanik

Lëvizja Vetëvendosje, ka mbajtur tubim elektoral me simpatizantët e saj në Kaçanik. Me këtë rast, kryetari i Lëvizjes Vetëvendosje Albin Kurti, u tha kaçanikasëve se erdhi dita që më 6 tetor të shpenzojnë 15 minuta kohë për të votuar, në mënyrë që të fitojnë 4 vite mirëqenie me dinjitet.

“Të gjithë ju këtu dhe ata të tjerët në Kaçanik që na ndjekin në rrjetet sociale e padyshim që do të na bëjnë fitimtarë më gjashtë tetor, kanë nevojë për edukim e aftësim profesional, për punë të dinjitetshme, e tash erdhi dita që të ndajmë 80 milionë euro për ndërmarrësi, që të përkrahim 8 mijë grupe të rinjësh në mandatin tonë katër vjeçar, sepse të rinjtë e Kaçanikut, sikurse të rinjtë e të rejat në mbarë Kosovën kanë talentin e zgjuarsinë, e me Vetëvendosjen në qeveri do ta kenë edhe mbështetjen edhe mundësinë, erdhi dita ta luftojmë varfërinë e ta mbështesim rininë”, tha mes tjerash Kurti.

Kandidatët për deputetë nga Lëvizja Vetëvendosje në Prishtinë, Ferizaj e Kaçanik, kërkuan votën e kaçanikasëve në zgjedhjet e 6 tetorit, duke premtuar ekonomi më të zhvilluar, arsim më cilësor dhe emancipim të gruas në shoqëri.

“Na ndihmoni ta ndihmojmë të riun e pashpresë, qytetarin e papunë, të varfërin e shkretë, skamnorin e braktisur e të sëmurin e shpërfillur, na ndihmoni ta ndihmojmë studentin e profesorin, pacientin e mjekun, punëtorin e sipërmarrësin, bujkun e fermerin, na ndihmoni ta ndryshojmë Kaçanikun e Kosovën”, tha  Avni Tafili, kandidat për deputet nga Kaçaniku.

“Fitoren e 6 tetorit bashkë me kandidatin tuaj dhe nga e gjithë Kosova sot kemi ardhë këtu me i dhënë mbështetje liderit politik më të pastër, më të dijshëm, më të guximshëm që ka dhënë shqiptaria në dekadat e fundit, kryeministrin në ardhje Albin Kurtin. Tubimi i sotëm qenka madhështor duke iu falënderuar juve qytetarë të Kaçanikut, aktivistë të Vetëvendosjes, djem e vajza që shqiptarinë e keni në zemër, me ju fitorja e VV-së dhe fitorja e Kosovës është shumë më afër se kurrë, programi është thënë qartë dhe qytetarët e Republikës së Kosovës e dinë fare mirë, qytetarët e Kaçanikut dhe tërë populli i Kosovës e meritojnë që ta gëzojnë një shtet me ekonomi të zhvilluar, me demokraci që vepron dhe me institucione që u shërbejnë dhe u japin juve llogari“, theksoi Enver Haliti, kandidat për deputet nga Ferizaj.

“Qeveria Kurti për emancipimin e gruas do të nis me 1 mijë burësa për studentet, për vajzat, sidomos për intelegjencën e tyre në shkencat teknike natyrore brenda dhe jashtë vendit“, u shpreh Vlera Gjakova kandidate për deputete nga Prishtina.

Për t’i dhënë mbështetje liderit të tyre, në këtë tubim elektoral të pranishëm ishin edhe kandidatë të tjerë që garojnë për pozitën e deputetit të Kuvendit të Republikës së Kosovës.

Leave a Comment

Your email address will not be published.

This site uses Akismet to reduce spam. Learn how your comment data is processed.

728X90
728X90