Ferizaj

62 vjeçari Adem Mustafa kërkon përkujdesje nga shteti

Published

6 years ago

13 January, 2020

Përpos kushteve të rënda ekonomike, 62 vjeçari Adem Mustafa nga fshati Pleshinë i komunës së Ferizajt, ka probleme edhe me të pamurit. Para se të bëhej rrënimi i objektit të Shoqatës së Pensionistëve, ai qëndronte aty ku edhe gjente përkujdesje, mirëpo tani askush nuk kujdeset për të për shkak të largësisë nga qyteti.

“Shtëpinë e kanë ndërtuar për mua, por shtëpia nuk të jep vetë bukë për të ngrënë. Kam qenë në konvikt të pensionistëve, kam paguar punëtore, është përkujdesur për mua, vet e kam paguar. Ka ardhur kryetari i Shoqatës së Pensionistëve, më ka thënë duhet ta paguaj, dy muaj e kam paguar unë, të tjerat ia ka dhënë dikujt tjetër, një gruas, më ka thënë të mos t’ia jap atij, por asaj gruas. Me pension tim e kam paguar të gjithë unë, e kam paguar qiranë, e kam paguar punëtoren”, tha Adem Mustafa.

Ai tha se ka qenë edhe në shtëpinë e të moshuarve në Prishtinë, mirëpo nuk i kanë bërë zgjidhje, për shkak se ende nuk i ka mbushur 65 vjet.

“Për bukë e marrë këtë vajzën e vëllait, fqinjët më kanë ndihmuar, drunjtë m’i ka dhënë një fqinj pa para. E kam dokumentin unë nga mjeku se duhet pasur përcjellje. Kam qenë në klinikë gjermane, nëpër klinika të Evropës, por nuk ka sukses. Kam qenë në Prishtinë, tek shtëpia e të moshuarve, më kanë thënë do të të pranojmë, vetëm dokumentet na duhen, mirëpo në tjetrën anë më thonë në telefon se më duhet t’i mbush 65 vjeç, nuk e di ku është çështja”, tha Adem Mustafa.

Ndërsa, Ismajl Bekteshi, zyrtar në Qendrën për Punë Sociale në Ferizaj, duke mos dashur të flas para kamerës, përmes telefonit tha se qytetari në fjalë nuk i ka plotësuar kushtet për t’u pranuar në shtëpinë e të moshuarve.

“Ne kemi bërë përpjekje për të vendosur këtë person në shtëpinë për të moshuarit dhe përkujdesje familjare, ia kemi përgatitur dokumentacionin dhe është dërguar lënda për dhënie të mendimit dhe divizioni për vendosje instuticionale në Prishtinë, mirëpo është refuzuar për shkak se nuk e ka plotësuar një kriter që është nën moshën 65 vjeçare”, tha Ismajl Bekteshi.

Ndër kriteret tjera që duhen plotësuar për t’u vendosur në shtëpinë e të moshuarve janë të qenit banor i Kosovës, të mos kenë pasardhës djalë, të jetë në gjendje të mirë psikike dhe të mos ketë sëmundje infektive.

Ferizaj

Ngritët aktakuza e parë për zgjedhjet e 28 dhjetorit

Published

3 days ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

5 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.