Në 19 vjetorin e rënies, përfaqësues të institucioneve të Ferizajt, familjarë e qytetarë të shumtë, kanë përkujtuar dëshmorët Ramadan Rexhepin, i njohur gjatë kohës së luftës si “Komandant Adidasi”, dhe Imri Halilin.

Vëllai i heroi të kombit Ramadan Rexhepi dhe babai i dëshmorit Imri Halili, thanë se megjithë dhimbjen që kanë, krenaria për djemtë që ia falën atdheun sa vjen e shtohet.

“Sot është përvjetori i Danit, është edhe 5 maji dita e dëshmorëve, është për neve humbje se Dani ka qenë shtyllë  e shtëpisë, por është edhe krenari për shkak se ne e gëzojmë lirinë, fëmijët e Danit janë të edukuar dhe kjo është mbi të gjitha, Dani ka qenë udhërrëfyes për të gjitha gjeneratat”, tha Shaban Rexhepi, vëllai i dëshmorit Ramadan Rexhepi.

“Mërzi kam edhe unë edhe familja, por ku po i shoh këta që po ecin të lirë jam i kënaqur, lavdi u qoftë të gjithë dëshmorëve, por edhe familjes së Adem Jashari pasi  ai ka dhënë shumë më shumë se ne që e gëzojmë këtë liri”, tha Abit Halili, babai i dëshmorit Imri Halili.

Ndërsa, kryetari i Shoqatës së Familjeve të Dëshmorëve të Ferizajt Gafurr Bytyqi, tha se në këtë ditë krenarinë e familjeve të dëshmorëve e forcon fakti që kosovarët jetojnë lirshëm, për çka edhe u flijuan gjithë dëshmorët.

 “Sot në ditën e dëshmorëve të kombit shqiptar shënuam dhe përkujtuam edhe 19 vjetorin e rënies  në mënyrën heroike në vijën e frontit Ramadan Rexhepin dhe Imri Halilin. Ramadan Rexhepi fytyrë embelmatike kombëtare, intelektuale, e trimërisë, e guximit flijohet për atdheun, asgjë më të rëndësishme në këtë univers nuk kishte për Ramdanin dhe Imriun sesa çështja kombëtare”,tha Bytyqi.

Momente nga jeta me heroin Ramadan Rexhepin, ndau bashkëveprimtari Muhamet Murati.

“Ato janë vite që na kanë lënë mbresa, Dani si personalitet ka qenë një person i veçantë  që gjithmonë ka qenë i pari ka rrezikuar edhe në ato vite kur kemi punuar nëpër shtëpi private, pastaj edhe në luftë kemi qenë bashkë prej fillimit kur ka ardh Dani më 6 dhjetor në Jezerc deri në rënien e tij, më kujtohen shumë fjalë, shumë momente gjatë luftës, por ajo që ai është angazhuar çdo herë ka qenë ajo që ai ka qenë me profesion  profesor i edukatës fizike dhe i shtike ushtarët me ushtru dhe u thoshte më mirë është me derdhë djersë e më vonë mos me derdhë gjak, sepse ushtrimet ushtarake ishin të nevojshme, gjithmonë ka qenë i përpiktë e strateg, i ka kry obligimet ushtarake sikur me pas qenë oficer profesional”, tha Murati.

Më 5 maj të vitit 1999 në fshatin Jezerc ranë heroikisht Ramadan Rexhepi nga fshati Sojevë dhe Imri Halili nga fshati Gaçkë.