Ferizaj

Pajisjet mjekësore të QKMF-së i jepen në shfrytëzim Spitalit

Published

8 years ago

31 May, 2018

Dhurimi i disa pajisjeve mjekësore të Qendrës Kryesore të Mjekësisë Familjare për Spitalin rajonal të Ferizajt, bëri që mbledhja e Kuvendit Komunal të Ferizajt t’i ngjajë një seminari mjekësor. Kjo pikë e rendit të ditës ngacmoi mjekët anëtarë të këtij Kuvendi, për të dalë në foltore e për t’i paraqitur qëndrimet e tyre lidhur me arsyeshmërinë ose jo të këtij propozimi. Ekzekutivi kishte servuar këtë propozim-vendim me arsyetimin se këto pajisje të blera në vitin 2015, nuk i kanë shërbyer mjekësisë primare në Ferizaj, ndërkaq për to Spitali i Ferizajt ka nevojë të madhe.

“Këtë propozim e kanë dhënë ekspertët e QKMF-së, janë të involvuar në këtë rekomandim rreth 50 mjekë, kështu që qëllimi është i mirë që këto pajisje ta gjejnë vetën aty ku kanë nevojë qytetarët e Ferizajt”, tha drejtori i Shëndetësisë Besnik Berisha.

“Janë harxhuar 55 mijë e 578 euro të qytetarëve të Ferizajt për pajisje të cilat nuk janë shfrytëzuar fare prej momentit që janë blerë”, tha anëtari i PDK-së Arian Imeri.

Në anën tjetër, anëtari nga radhët e LDK-së, ish-drejtori i Shëndetësisë Burim Karameta, tha se pajisjet e blera janë shfrytëzuar gjithmonë, madje kanë shpëtuar edhe jetë.

“Ju mundeni me bë shëndetësinë edhe pa këta aparat, sepse ju jeni duke funksionuar edhe pa mjekë, do të thotë në emergjencë nuk ka asnjë mjek, d.m.th, juve s’po ju mungojnë mjekët e po ju mungon aparatura. Asnjë institucion nuk mund të licencohet pa i pas këto aparatura, kështu që ju jeni duke shkaktuar dëmtime buxhetore të komunës duke i falë këto e duke u detyrua me i ble pas gjashtë muajsh”, tha Karameta.

Por, Karametën e kundërshtoi kolegu i tij mjek, Fitim Goga.

“Mjekësia familjare nuk e ka avancimin e duhur profesional për me u marrë me këto aparate, pasi që në to paraqiten gjendjet e emergjencave akute, të natyrës sidomos kardiake. Ne në spital kemi nevojë shumë për këto pajisje, sepse na kryejnë shumë punë të madhe, do të thotë tek ne do të gjejnë zbatim”, tha Goga nga PDK.

Ndërkaq, Xhavit Zariqi nga AAK-ja, shprehu dilemë që këto pajisje do të shfrytëzohen edhe në Spital.

“Nëse janë të rëndësishme për Spitalin, Spitali ka qenë dashtë me i ble dhe me i vu në funksion të qytetarëve pa përjashtim. Gjithashtu nëse dikush e ka paraparë që u dashtë me u ble ato për qendrën e mjekësisë familjare ka qenë dashtë të vihen në funksion. E vërteta është se jo vetëm këto mjete, por edhe pajisjet më të thjeshta nuk vihen në shërbim të qytetarëve, por mjekët tanë nuk shkojnë aty për të shërbyer në Spital e as në QKMF, por mjekët tanë shkojnë vetëm sa për t’i marrë pacientët e për t’i dërguar nëpër ordinanca private, kjo është e vërteta”, tha Zariqi.

E, kjo deklaratë e Zariqit i ofendoi disa nga anëtarët e Kuvendit që janë edhe mjekë të këtij qyteti.

“Zëvendësministër me një shtet s’po ja përmendi emrin, ministri i shëndetësisë i kish mbledh doktorët dhe ju tha se po flitet qe ju jeni të korruptuar, atëherë një prej profesorëve i tha ministrit a po ju beson këtyre fjalëve, ministri tha po pse jo. Atëherë edhe për juve politikanëve po thonë se jeni të korruptuar, por ne s’po besojmë”, tha Xhevdet Haxhidema i PDK-së.

“Ma gjeni vetëm një mjek që ka dalë brenda orarit të punës në QKMF për të punuar në ordinancë private, atëherë unë jap përgjegjësi. Të lutem mos fol pa bazë zotëri Zariqi, sepse aty punohet me përkushtim, e nëse ju keni fakte atëherë denonconi, mos i gjithëpërfshini mjekët”, tha Heset Shatrolli.

Kësisoj, debati zgjati edhe më shumë, deri në momentin kur edhe u kërkua vota e anëtarëve. Me kërkesë të kuvendarëve pika e rendit të ditës ndryshoi formulimin ku nga dhurimi u mor vendim që këto pajisje Spitalit t’i jepen veç në shfrytëzim deri në 15 vjet. Me shumicë votash ky vendim u miratua.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

1 day ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”