Kaluan më shumë se pesë muaj të qeverisjes, e drejtorët komunal të Ferizajt fjalinë e parë të konferencave me gazetarë e kanë të njëjtën. Ata po vazhdojnë të ankohen për borxhin e trashëguar.
Kësisoj, duke u ankuar për borxhet e mëdha që gjeti në Drejtorinë e Infrastrukturës, Arbër Bytyqi tha se brenda kësaj periudhe kohore kanë arritur t’i shlyejnë mbi 4 milionë euro borxhe.
“Nga Drejtoria e Infrastrukturës në pesë mujorin e parë janë paguar rreth 4 milionë e 400 mijë euro borxhe dhe si rezultat i këtyre pagesave bizneset ferizajase e kanë shumë më të lehtë operimin, pasi që shumë operatorë kanë rrezikuar për shkak të borxheve të komunës. Kemi bërë përgatitjen e një plani teknik dhe financiar në përfundimin sa më parë të projekteve të cilat vetëm janë filluar për premtime elektorale nga qeverisja e kaluar dhe që asnjëherë s’kanë përfunduar. E si rezultat i këtij plani të gjitha projektet do të përfundojnë gjatë vitit 2018 dhe 2019. E kemi ndalë edhe dukurinë për lidhjen e kontratave të paarsyeshme 2 e 3 vjeçare”, tha Bytyqi.
Me këtë rast, Bytyqi njoftoi se së shpejti do të nisin së realizuari projektet për të cilat tashmë kanë gjetur fonde nga Qeveria e Kosovës. Si më të rëndësishmin ai përmendi projektin “Bashkimi i Qytetit”, me një kosto prej 6,000.000 milionë euro.
“Projekti “Bashkimi i Qytetit” është një ndër premtimet kryesore të kryetarit Agim Aliu dhe ky projekt tashmë po merr jetë në vitin e parë të qeverisjes. Ka përfunduar projektimi detal dhe jemi në fazën e tenderimit, ndërsa vlera e këtij projekti është rreth 6,000,000 euro dhe parasheh ndërtimin e nënkalimit për vetura nga rruga “Vëllezërit Gërvalla” deri në rrugën “Madeleine Albright” afër rrethit të spitalit, gjithashtu në kuadër të këtij projekti do të bëhet edhe vazhdimi i nënkalimit ekzistues nga rruga “Latif Hasani” në rrugën “Emin Duraku” edhe ky është një projekt shumë i rëndësishëm që do të lehtësojë lëvizjen e veturave në rrugën “Ahmet Kaçiku”, si dhe do të rris sigurinë e lëvizjes për këmbësorë’’, theksoi Bytyqi.
Projektet që sipas Drejtorisë së Infrastrukturës pritet të nisin gjatë këtij muaji janë zgjerimi i rrugës me katër korsi nga varrezat e Nikadinit deri në fshatin Gurëz, nënkalimi për vetura në Nikadin, si dhe ndërtimi i një salle sportive në fshatin Greme.
Ferizaj5 days ago
Kosovë1 week ago
Kosovë1 week ago
Kosovë5 days ago
Kosovë16 hours ago