Ferizaj

Diskutohet për përfshirjen e parimeve të zhvillimit të qëndrueshëm në Kosovë

Published

8 years ago

13 July, 2018

“Përfshirja e parimeve të zhvillimit të qëndrueshëm në Kosovë”, ishte tema që sot u diskutua në një debat publik mes qytetarëve, asamblistëve dhe njohësve të sektorit të energjisë, mjedisit e ekonomisë.

Ky debat i organizuar nga Konsorciumi Kosovar i Shoqërisë Civile për Zhvillim të Qëndrueshëm, u tha se synon zhvillimin e sektorit të energjisë në pajtim me parametrat e respektimit mjedisor dhe zhvillimit ekonomik.

Përfaqësuesja e KOSID-it, Dajana Berisha, tha se po bëjnë përpjekje që të ndalojnë ndërtimin e termocentralit të ri me qymyr në Kosovë, pasi një termocentral i tillë do të ishte i dëmshëm për mjedisin.

“Kemi luftu shumë dhe kemi shkuar me kampanja evokimi deri në nivele edhe më të larta globale, në takimet e përvitshme me zyrtarë të Bankës Botërore dhe kemi paraqit opsionet tona se Kosova nuk e ka të nevojshëm një termocentral të ri qymyri, për shkak të problemeve me shëndet, me mjedis që qymyri shkakton dhe njëkohësisht në kontestin e zhvillimeve globale që gjithçka po shkon drejt energjisë alternative dhe investimet në qymyr po vinë çdo ditë drejt vdekjes”, tha Berisha.

Kurse, analisti financiar Hekuran Murati, tha se ndërtimi i termocentralit të ri me qymyr i cili është bërë me marrëveshje e fshehtë, do ta rëndoj xhepin e qytetarëve.

“Është publiku kontrata për marrëveshjen për investim në ndërtimin e termocentralit, edhe pse ka pasur të angazhuar ekspertë dhe janë paguar 8 milionë euro për konsulent, kjo është dëmshme, pasi kostoja e saj është shumë e lartë, vetëm kostoja e shpenzimit të kamatës është 200 milionë euro në vit dhe këto para do t’i paguaj qeveria, ku pagesa do të bëhet përmes taksave të qytetarëve dhe në vend se këto 200 milionë euro të shkojnë në shëndetësi ato do të shkojnë për me pagu një kontratë shumë të keqe e cila kontratë është bërë fshehtas”, tha Murati.

Drejtori i Zhvillimit Ekonomik në Ferizaj Zekir Bytyqi, tha se komuna e Ferizajt është duke hartuar strategji për zhvillim ekonomik, duke përmendur këtu fondin e punësimit.

“Ne si qeverisje lokale planifikojmë të bëjmë një strategji të zhvillimit ekonomik e cila u përshtatet të gjitha nevojave të qytetarëve, për me fuqizu zhvillimin ekonomik të qëndrueshëm në Ferizaj kemi planifiku që të konsolidojmë fondin e punësimit i cili parasheh subvencionimin e bizneseve, kamatave dhe të jetë urëlidhëse mes bizneseve dhe komunës”,tha Bytyqi.

Në këtë diskutim publik, pjesëmarrësit ngritën shqetësime që kanë të bëjnë me arsimin, sigurinë e çështje të tjera.

“Shumë herë iniciohen strategji dhe rregullore nga shoqëria civile por shumë pak nga grupet parlamentare brenda institucioneve dhe kjo është një shqetësim i madh pasi fryma e partive politike për të nxjerr një koncept të ri është në natyrën e tyre”, tha Kenan Gashi.

Në këtë takim u bë e ditur se Ministria e Mjedisit i ka pezulluar lejet e lëshuara për ndërtimin e mini-hidrocentraleve mbi lumin ‘’Lepenc’’ në fshatin Firajë.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim