Ferizaj

11 të vdekur në aksidente trafiku që nga janari në Ferizaj

Published

8 years ago

01 August, 2018

Që nga janari e deri në korrik, në rajonin e Ferizajt kanë humbur jetën 11 persona si pasojë e aksidenteve në trafik. Megjithatë, bazuar në të dhënat e Policisë së Ferizajt, numri i aksidenteve këtë vit ka shënuar rënie, krahasuar me vitin paraprak. Në uljen e numrit të aksidenteve, shefi i Njësisë së Trafikut Rrugor, kapiten Gani Pajaziti, thotë se ka ndikuar shqiptimi i gjobave.

“Ne i kemi shifrat për gjashtë mujorin e parë dhe ato tregojnë se gjendja aktuale e jona në krahasim me vitin e kaluar nuk është edhe aq keq, me fatalitet vitin e kaluar kemi pas 13 persona të vdekur, ndërsa sivjet 11, mandej me lëndime vitin e kaluar kemi pas 487 të lënduar, sivjet 514, me dëme materiale 195, 133 i kemi sivjet, ndërsa për rastet me lëndim dua të them se tek ne është bërë një shprehi se nëse e paraqet rastin si i lënduar ka gjasa që kompania e sigurimeve e bën ndonjë kompensim, pra ka raste kur dëmet janë aq të vogla sa që mund të kalohet edhe me raport evropian, disa raste janë qesharake, pra nëse përmblidhen të gjitha këto kemi një rënie të aksidenteve, që do të thotë se gjendja është e mirë, një prej atyre që e ka mundësuar këtë është se numri i tiketave është rritur, në krahasim me vitin e kaluar kemi mbi 2 mijë tiketa më shumë, kemi pas 18 mijë tiketa vitin e kaluar, sivjet i kemi 20 mijë tiketa dhe kjo është një ndër parametrat se Policia ka ndërmarrë masa’’, tha Gani Pajaziti.

Sa i përket shqetësimeve të qytetarëve për shpejtësinë e lëvizjes së automjeteve nëpër qendër të qytetit dhe mungesën e patrullave policore aty, Pajaziti thotë se po veprojnë me të gjitha mundësitë që kanë.

“Ne jemi duke dhënë maksimumin tonë, mirëpo është vështirë t’i mbulojmë të gjitha pikat, por me ato mundësitë që i kemi jemi duke dhënë maksimumin, qytetarët nuk i njohin problemet tona që kemi, mungesën e personelit, të veturave dhe një njësi patrulluese nuk mundet me qenë në të njëjtën kohë në 5 vende, por ne po mundohemi dhe kjo është maksimumi që mundemi me bë, po flas edhe për motrat e vëllezërit tanë që na vijnë, disa prej tyre është e rëndë të them, por disa prej tyre vijnë të shfrenohen këtu, unë jam çdo ditë në terren dhe disa prej tyre na thonë nuk po na leni me u kënaq”, shprehet kapiten Pajaziti.

Pajaziti kërkoi nga shoferët që të tregohen më të kujdesshëm në komunikacion, në mënyrë që të mos rrezikojnë jetën e tyre dhe të pjesëmarrësve të tjerë në trafik.

“Qytetari ta ketë parasysh që të vetëdijesohemi njëherë e përgjithmonë që të kemi një kulturë në komunikacion, pasi gjithmonë kemi arsyetime dhe arsyeja është jam vonu në punë, nëse kemi nivel të kulturës aksidentet do të zvogëlohen, çdo polic i imi është ai që është i pari në kontakt me një trup të pajetë në komunikacion, ne jemi njerëz kur i shohim na u dhimbsen, prandaj apelojmë gjithmonë kujdes shpejtësinë, janë minutat në pyetje”, tha Pajaziti.

Në rajonin e Ferizajt për 7 muaj kanë ndodhur rreth 660 aksidente në trafik.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

1 day ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”