Ferizaj

Asamblisti Muhamet Halili braktis AAK-në, vazhdon i pavarur

Published

8 years ago

01 August, 2018

Përveç LDK-së, për vendimin e djeshëm për shpallje të interesit të përgjithshëm të pronave në Fshatin e Vjetër, kundër votuan edhe dy asamblistë të tjerë. Ishte Nehat Mustafa i PDK-së dhe Muhamet Halili i cili ditë më parë dha dorëheqje nga AAK-ja. Ky i fundit në seancën e djeshme u prezantua si këshilltar i pavarur i Kuvendit, ndërsa tha se pavarësisht ofertave që tashmë ka nga partitë politike, do të qëndroj i pavarur. Madje, Halili tha se secila parti do të dëshironte ta kishte anëtar atë, si një kuadër me bagazh të madh politik.

“Po unë e kam bërë njoftimin tek kryesuesja se do të jem anëtar i pavarur dhe kështu do të vazhdoj. Ndryshe, të gjitha partitë kanë interes të kenë një kuadër të tillë, të kenë një potencial çfarë unë kam pasur më shumë se një dekadë në AAK dhe në bazë të fuqisë politike qe ne kemi pasur si në zgjedhje të 2014 ashtu edhe në 2017, gjithsesi ka kërkesa, por unë do të jem anëtar i pavarur dhe do t’i mbështes interesat e qytetarëve në përgjithësi”, tha Muhamet Halili.

Me këtë rast, Halili tregoi edhe për arsyet e dorëheqjes nga AAK-ja. Tha se si anëtar i kryesisë dhe si një kandidat me numër të konsideruar votash, nuk u shpërblye nga partia.

“Arsyeja dhe qëllimi pse unë jam larguar nga AAK-ja është publike realisht për shkak të mospajtimeve të mija që kanë ndodhë gjatë procesit të nominimit të drejtorëve dhe nënkryetarit të komunës dhe për këtë arsye unë kam dhënë dorëheqje publike edhe me shkrim që e kam dërguar në Kuvend, por edhe në degën e partisë“, tha Halili.

Ndryshe, larg mikrofonit, Muhamet Halili la të kuptohet që së shpejti Kuvendit Komunal të Ferizajt do t’i shtohen edhe dy anëtarë të tjerë të pavarur, që kësisoj pritet të bëhet edhe një grup tjetër parlamentar.

Ferizaj

Ndërroi jetë artisti dhe koreografi i shquar ferizajas, Bajram Tahiri

Published

3 days ago

03 February, 2026

Redaksia

Ka ndërruar jetë Bajram Tahiri, artist, valltar dhe koreografi i shquar i ansamblit “Kastriotët” në Ferizaj.

I ndjeri gjithë jetën e tij artistike ia kushtoi ruajtjes dhe begatimit të traditës dhe trashëgimisë kulturore, fillimisht si valltar pastaj edhe si koreograf i A.K.V ,,Kastriotët” Ferizaj.

Për një periudhë kohore, nga viti 1999-2009, Tahiri ishte Drejtor Operativ në KRM “Pastërtia”, pastaj nga viti 2017 deri në vitin 2020 shërbeu si këshilltar politik në Ministrinë e Tregtisë dhe Industrisë, derisa nga viti 2010 udhëhoqi me kompaninë “Mbrojtja e Ambientit”.

Mbledhja komemorative për artistin e ndjerë, Bajram Tahiri, mbahet më 3 Shkurt 2026, ora 14:00 në Teatrin “Adriana” kurse ceremonia e varrimit nga ora 15:30 në varrezat e reja të qytetit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.