Shitja e kurbanëve edhe sivjet është bërë rrugëve të qytetit të Ferizajt. Qysh në orët e mëngjesit rruga “Driton Islami” ishte vërshuar nga shitësit të cilët kishin dalë për t’i shitur kurbanët një ditë para shënimit të festës së Kurban Bajramit, e cila karakterizohet me therjen e kurbanëve. Shitësit thanë se tregtinë po e kryejnë rrugëve, meqë tregu i kafshëve është i mbyllur.

“Policia na pengun po na lirun mandej, nafaka jonë, na thanë që me shku te tregu, mirë e kanë pas po tregu ish kanë i mbylltë, mirë ish kanë në treg se për qeta është, ndërsa këtu i shesim, i therim, varet se si i gjejmë klientë”, tha Fatmir Shaqiri nga Bablaku.

“Mirë ka fillu, na pengoj Polica po mirë kaluam, na thanë të tregu po këtu e kemi shitjen më të mirë”, tha Ismail Gabrica nga Gadimja.

Përveç rrugës ‘’Driton Islami’’, si vend i përshtatshëm për shitjen e kurbanëve u konsiderua edhe rruga ‘’Ahmet Kaçiku’’, përkatësisht hapësira tek nënkalimi.

“Nesër është Kurban Bajrami, sot i kemi pru delet për me i shitë, jau di për nderë hyqmetit që na kanë lanë këtu, jena shumë mirë këtu, nuk na ka pengu kërkush kena shitë mirë, sot në sabah jena vendos, tash i kam edhe 32 pa i shitë se tjerat i kam shitë krejt”, tha Rexhep Mustafa.

Për të marrë një përgjigje rreth masave që ka ndërmarrë komuna e Ferizajt sa i përket shitjes së kurbanëve rrugëve të qytetit, Televizioni Tema provoi të kontaktojë me drejtorin e Bujqësisë dhe atë të Shërbimeve Publike, mirëpo kontakti me ta gjatë gjithë ditës ishte i pamundur.