Ferizaj

Era shkakton dëme në fshatin Zllatar

Published

8 years ago

24 August, 2018

Dhjetëra shtëpi në fshatin Zllatar të komunës së Ferizajt, vazhdojnë të jenë pa çati pas erës së fortë dhe shiut të rrëmbyeshëm që goditi atë katër ditë më parë. Banorët thonë se dëmet janë të konsiderueshme, prandaj kërkojnë nga komuna që t’u dalë në ndihmë.

“Dëme janë bërë mjaftë shumë, ka qenë shumë erë e madhe, i ka hequr kulmet, një dhomë më është bërë e pabanueshme, dëmet janë shumë të mëdha, sot kemi bërë ankesë në komunë, ndërsa pas sotit çfarë masa marrin ata nuk e dimë”, tha Nuhi Kurti.

“Janë shkatu dëme shumë, era e ka hequr kulmin, sa do të marrin masa komuna nuk e dimë, por ndoshta na ndihmojnë, me ardh askush s’ka qenë deri tash, ndërsa vetë nuk kemi mundësi me i rregullu”, tha Xhemajl Sallahu.

“Dëme ka bërë mjaftë shumë, vëllaun e kam të sëmurë, rrymë nuk kemi, nëse ka mundësi dikush me na ndihmu, dëme ka bërë shumë, ende askush nuk na ka vizitu”, tha Kimete Qerimi-Kurti.

Përfaqësuesi i fshatit Zllatar Xhevat Sallahu, tha se i janë drejtuar me një kërkesë Drejtorisë së Shërbimeve Publike dhe Emergjencës për t’i vlerësuar dëmet që janë bërë.

“Dëme të mëdha janë bërë në çati, por edhe në rrugë nga reshjet dhe uji i fuqishëm që ka ardhur, ne i’u kemi drejtuar organeve kompetente me një kërkesë për të dalë në terren dhe për të bërë vlerësimin e dëmeve që janë shaktuar nga era dhe shiu dhe po presim tani. Drejtoria e Infrastrukturës dje ka reaguar me një vizitë të vlerësimit të rrugëve tani po presim edhe Drejtorinë e Shërbimeve Publike e cila do të bëj vlerësimin e dëmve që janë shkaktuar nëpër çatitë e shtëpive”, tha Sallahu.

Mirëpo për kërkesën e përfaqësuesit të fshatit Zllatar nuk është në dijeni drejtori i Shërbimeve Publike dhe Emërgjencës Arben Halili. Ai përmes telefonit tha se nuk ka marrë ndonjë kërkesë të tillë dhe se nuke di se çfarë dëme janë shkaktuar atje.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim