Ferizaj

Policët e Ferizajt dhurojnë gjak

Published

7 years ago

27 August, 2018

Pjesëtarët e Policisë së Kosovës në rajonin e Ferizajt, i janë përgjigjur thirrjes së Qendrës Kombëtare të Transufuzionit të Gjakut për të dhuruar gjak.

Zëdhënësi i Policisë për rajonin e Ferizajt Agim Gashi, tha se kjo nuk është hera e parë që policët i bashkohen këtij aksioni humanitar.

“Sot nga ora 11:00 ka filluar dhënia vullnetare e gjakut nga pjesëtarë të Policisë së Kosovës të Drejtorisë Rajonale të Ferizajt, ku janë të përfshira edhe 5 nënstacione. Nuk është hera e parë që pjesëtarë të policisë dhurojnë gjak, çdo vit i jemi përgjigjur këtij aktiviteti dhe ka pasur numër të konsiderueshëm të policëve që kanë dhuru gjak po ashtu edhe sivjet presim që ky numër të rritet”, tha Gashi.

Përfaqësues të Qendrës Kombëtare të Transfuzionit të Gjakut, thanë se aksionet e tilla ndërmerren me qëllim të grumbullimit të sasive të gjakut për pacientët në nevojë.

“Sot kemi filluar aksionin e dhurimit vullnetar të gjakut në Stacionin Policor në Ferizaj, qëllimi i këtyre aksioneve është grumbullimi i sasive të gjakut të cilat shkojnë në ndihmë të atyre pacientëve që kanë nevojë për gjak, vullneti është i mirë, përkundër që Policia është e angazhuar përsëri vullneti i tyre për të dhuruar gjak është i madh”, tha Melania Gjocaj, menaxhere për marketing dhe informim në Qendrën Kombëtare të Transfuzionit të Gjakut.

Ndërsa, policët të cilët po dhuronin gjak, thanë se është kënaqësi që përmes dhurimit të gjakut të shpëtosh jetë.

“Është kënaqësi shumë e madhe me dhuru gjak me u ndihmu atyre që kanë nevojë, jam dhurues i rregullt i gjakut, kam dhënë mbi 8 herë gjak, po ashtu ua preferoj edhe të tjerëve, po ashtu kam dëgju që është e shëndetshme për trupin e njeriut me dhuru gjak, por edhe u ndihmon të tjerëve që kanë nevojë”, tha Nexhat Ramusholli.

“Jam dhurues i rregullt i gjakut, po ashtu e kam gjakun i cili është më i kërkuari, kam pas raste që kam shku direkt në spital kur kam parë që po kërkohet gjak dhe natyrisht është mirë kur gjaku yt mund të shpëtoj një jetë”, tha Shyqeri Salihu.

Aksioni i Qendrës Kombëtare të Tranfuzionit të Gjakut, “Dhuro gjak, shpëto jetë”, do të vazhdojë në të gjitha Stacionet Policore në Kosovë.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.