Moti i mirë ka bërë që punët e investimeve kapitale në terren të vazhdojnë edhe këtë muaj. Sot në fshatin Komogllavë të Ferizajt, qeverisja lokale ka nis të asfaltojë rrugë me gjatësi të ndryshme. Njëra ndër to është edhe rruga “Mulla Ademi”, ku për ta parë nga afër cilësinë e punimeve aty ishte edhe kryetari i komunës me ekipin e tij. U vlerësua se ky investim kësaj pjese të Komogllavës do t’ia kthej rëndësinë si njëra ndër zonat më të bukura dhe të pasura me drunj dekorativ.

“Bëhet fjalë për asfaltimin e rrugëve në fshatin Komogllavë, një projekt me vlerë rreth 380 mijë euro ku do të bëhet asfaltimi i mbi 20 rrugëve në fshatin Komogllavë. Sot po fillojmë në rrugën “Mulla Ademi” e cila ka një gjatësi prej 880 metra dhe gjerësi 4.5 metër. Në ditët në vijim do të vazhdohet asfaltimi edhe i rrugëve të tjera në këtë fshat. Për fshatin Komogllavë, përveç këtyre rrugëve që i kemi paraparë në projektin e këtij viti, gjithashtu në buxhetin e vitit 2019, kemi paraparë edhe një projekt të ri për rrugët e fshatit Komogllavë dhe besoj që me atë projekt do të përmbyllen të gjitha rrugët e fshatit Komogllavë dhe nuk do të mbetet pa u asfaltuar asnjë rrugë më në fshatin Komogllavë pas përfundimit të këtij projekti të cilin e kemi paraparë në vitin e ardhshëm”, tha drejtori i Infrastrukturës, Arbër Bytyqi.

Këto investime në rrugë, banorët i vlerësuan si tepër të nevojshme.

“Ky projekt është i një rëndësie të veçantë për lagjen tonë dhe gjithë komunitetin që i bien këndej, pasi që fshatin po  e bënë tamam si periferi të qytetit. Prandaj kujtoj që migrimi më nuk është as i nevojshëm, pasi që këtu e kemi gjithë infrastrukturën e duhur. Megjithatë Komogllava ka edhe nevoja të tjera, sepse është një fshat i shkapërderdhur dhe ka nevojë për parqe, për fusha sportive e të tjera”, tha Aziz Rexhepi.

Përveç në Komogllavë, ditëve të ardhshme, sipas Drejtorisë së Infrastrukturës, me buxhet të komunës do të realizohen edhe një numër i konsideruar i projekteve kapitale gjithandej qytetit dhe fshatrave të kësaj komune.