Ferizaj

Mësimdhënësit duan vend meritor në Ligjin e Pagave

Published

8 years ago

08 September, 2018

Sindikata e Bashkuar e Arsimit, e Shkencës dhe e Kulturës, ka mbajtur protestë në Prishtinë për të kërkuar ngritjen e koeficientit për 30% në projektligjin e pagave për punonjësit arsimor dhe të kulturës, si dhe zbatimin e kontratës kolektive për arsimin e Kosovës të nënshkruar nga Ministria e Arsimit dhe SBASHK-u.

Me parullat “Duam vend meritor në ligjin e pagave”, “Ju nuk do të ishit pa ne”, “Deputetë mos lejoni të mbyllen shkollat”, marshi protestues ka filluar nga sheshi “Zahir Pajaziti” dhe ka vazhduar deri tek ndërtesa e Qeverisë së Kosovës, ku protestuesit kanë adresuar kërkesat e tyre.

Kryetari i SBASHK-ut, Rrahman Jasharaj tha se kjo protestë është alarm i fundit drejt qeverisë për ta korrigjuar Ligjin e Pagave.

“Kjo protestë është alarm i fundit drejtuar qeverisë që ta kuptojnë se situata është serioze dhe të veprojnë menjëherë duke tërhequr projektligjin e pagave, për ta kthyer në Ministrinë e Administratës Publike, për ta korrigjuar në mënyrë që sektori i arsimit dhe kulturës të kenë vend meritor. Në të kundërtën, SBAShK-u do të vazhdojë me veprime sindikale, të cilat do të jenë edhe më radikale, e duke mos përjashtuar edhe grevën e përgjithshme”, tha ai.

Kësaj proteste iu bashkua edhe Sindikata e Arsimit në Ferizaj.

Paraditën e sotme dhjetëra mësimdhënës në mënyrë të organizuar u nisën drejt kryeqytetit, për të kërkuar vend meritor në Ligjin e Pagave.

“Ora është shumë simbolike e protestës 11:55, sepse kur do të bëhet 12:00 do të jetë vonë dhe pastaj do të përballen të gjithë me sindikatën e cila do t’i shfrytëzoj mjetet e veta që i ka në dispozicion, jo për megaloni por për barazi me sektorët tjerë, sepse sektorët tjerë janë shumë më të avancuar siç është ai i shëndetësisë dhe të tjerë, ndërkaq ne mbetemi prapa krahasur me shkallët kualifikuese të sektorëve të tjerë, është një e padrejtë që duhet të përmirësohet, prandaj kemi vendosur që zëri ynë të shkoj tek të zgjedhurit tanë që kanë marrë votën tonë që të gjithë të na përkrahin dhe t’i thonë stop një padrejtësie që ka ardhur nga kryeministria”, tha Rexhep Sadiku.

“Jemi duke shkuar me i kërku të drejtat e tona mbi të ardhurat të cilat janë të ulëta, fjala është për koeficientin 1.75 është shumë i ulët dhe po kërkojmë që ajo të jetë 2.5 për shkollat fillore, ndërsa për shkollat e mesme 2.75, kjo është kërkesa jonë”, tha Osman Bytyqi.

“Jemi duke shkuar në Prishtinë për arsye të padrejtësive që po bëhen nga Qeveria, po besoj që duhet të ketë mirëkuptim pasi ne kemi dhënë kontribut gjithmonë”, tha Osman Pira.

Mësimdhënësit protestues akuzuan qeverinë se ka harruar punën e mësuesve në vitet e 90-ta.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

1 day ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.