Ferizaj

Rryma u shkakton dëme banorëve të Sojevës

Published

8 years ago

03 November, 2018

Tensioni i lartë i rrymës për pak sa nuk ia dogji shtëpinë familjes Bekteshi nga fshati Sojevë i Ferizajt. Të paktën kështu thotë kryefamiljari Shefqet Bekteshi, i cili tregon për ngjarjen që ndodhi para tri dite në lagjen e tij, për shkak të një defekti në trafon e rrymës.

“Para mëngjesit është zgju nipi dhe e ka parë tymin, mandej i ka thirrë prindërit kur e kanë parë gjithë kuzhinën tym, prej habisë e kanë fikur me ujë, por fati i tyre është ndalë ndërprerësi i rrymës, mandej i kemi thirrë të KEK-ut u kam tregu që është këput zero në shtyllë dhe është duke ardhë rryma 360 ëat, por nuk ka ardhë askush. Si të këputet zero prej trafos rritet rryma 360 dhe prej saj ka ardhë, pajisjet na janë dëmtuar, por ishim tu shku edhe e gjithë familja”, tha Shefqet Bekteshi.

Për dëmtim të pajisjeve shtëpiake ankohen edhe banorët e tjerë të fshatit Sojevë.

“Për shkak të rrymës së fortë më janë djegur makina e larjes së enëve, frizi dhe televizori, kejt kjo për shkak të tensionit të lartë”, tha Nezir Islami.

“Kjo na ka ndodhur në ora 3 të natës, e kemi dëgju një zhurmë dhe kur jemi zgju çka kemi mundur të heqim prej rrymës i kemi shpëtu e çka s’kemi pas mundësi janë dëmtuar. Mua më është djegur kompjuteri i ngrohjes qëndrore, i kam lajmëru në KEDS, më thanë se i kena ndërprerësat, por ato në ato momente nuk qenë shumë të nevojshme, ka qenë rryma afër 400 kilovat, ushtonin kabllot e dritat”, tha Shaban Januzi.

Për problemet që ky fshat po i ka në vazhdimësi me energjinë elektrike, tregon edhe përfaqësuesi i fshatit Sojevë Sylë Syla, i cili thotë se disa herë ka kërkuar ndihmë nga KEDS-i, mirëpo nuk është ndërmarrë asgjë. Ai tha se tensioni i lartë i rrymës u ka shkaktuar dëme 50 familjeve për të cilat do të kërkojnë kompensim nga KEDS-i.

“Kjo që ka ndodhur tani është për shkak të disa telave që janë të lëshuar dhe nuk është nevoja me qenë fare se me një kabllo 250 metra eliminohen diku afër 30 shtylla pasi janë të panevojshme ato shtylla dhe ato kanë rrymë për këtë arsye çdo erë, çdo prishje jo që e dëmton vetëm Sojevën, por edhe Dardaninë, Zllatarin, Mirosalën, e Bibajn. Unë kam bërë kërkesë para një viti se kanë me u heq prej përdorimit, por ende nuk është bërë. Po ashtu edhe lagjet tjera nuk janë në gjendje më të mirë, është lagjja e ”Kronit”, apo siç i themi ne ”Mahalla e Keqe” aty për shkak të zhvendosjes së dy shtyllave madje i kemi përgatitë edhe gropat, aty shtylla e tre fazit apo e tensionit të lartë është e lidhur për shtëpie dhe nëse bjen ajo aty ka me pas fatalitet”, tha Sylë Syla.

Televizioni Tema tentoi të kontaktojë me zyrtarët e KEDS-it lidhur me këtë çështje, mirëpo gjatë ditës kontakti me ta nuk ishte i mundur.

Ferizaj

Gjatë qershorit në Ferizaj janë konfiskuar 74 motoçikleta

Published

2 days ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

5 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

5 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.