Pas një trajnimi që kishte kryer për përpunimin e pemëve dhe perimeve, Lumturije Maloku  nga Pleshina e Ferizajt, pati guxim dhe vullnet të konkurroj në projekte të  donatorëve për të hapur një mini-fabrikë. Një ëndërr e kahmotshme asaj iu realizua sot. Në shtëpinë e saj ajo përuroi pikën grumbulluese të pemëve dhe perimeve, ku u bë edhe promovimi i këtij biznesi familjar. Ky donacion i cili financohet nga organizata “Brot” e Gjermanisë, po realizohet në kuadër të projektit “Mundësimi i vetëpunësimit të rinisë dhe grupeve të margjinalizuara në vise rurale të Kosovës” dhe zbatohet nga Iniciativa për Zhvillimin e Bujqësisë së Kosovës. Lumturija, duke u shprehur e lumtur që ka arritur të siguroj fonde për këtë projekt, tregon mënyrën se si do të punoj.

“Tash kemi me punu çdo ditë, do të bëjmë ajvar, speca turshi, reçel të kumbullave dhe lloje të tjera. Ne këtu i presim fermerët që t’i sjellin produktet, pastaj i përpunojmë me mjetet që kemi përfituar si donacion, e të cilat janë shumë të avancuara. Ne tash për tash punojmë si familje, por unë në vitin tjetër synoj ta zgjeroj këtë biznes dhe do të angazhoj edhe më shumë punëtorë”, tha Maloku.

Drejtues të organizatës IADK, treguan se gjatë trajnimit që kanë pasur paraprakisht, fitueset e këtyre projekteve kanë mësuar 5 receta të ndryshme të përpunimit dhe konservimit të perimeve si gjithë procesin e përpunimit, duke filluar nga planifikimi, higjiena, standardizimi, ruajtja e deri tek shitja e perimeve.

“Prandaj këtë vendim që e ka marrë Lumturija është mëse i qëlluar, sepse përveç familjes, hajrin do t’ia shohin rrethi këtu, partnerët, por edhe konsumatorët, pasi që nga prodhimet që do të përpunohen këtu besoj që edhe konsumatorët do të kenë prodhime të shëndosha, me më pak pesticide, më pak plehëra, më të shijshme dhe me aromë më të këndshme. Këto produkte të cilat do t’i prodhoj Lumturija janë të licensuara nga IADK dhe e kanë barkodin, logon e vet dhe shumë lehtë gjenden në treg”, tha Zenel Bunjaku.

Mbështetje për këtë projekt u tha se e ka dhënë edhe komuna e Ferizajt. Nënkryetari Naim Ferati, tha se qeverisja aktuale prioritet e ka fushën  e bujqësisë.

“Një vend i cili e ka bujqësinë e pazhvilluar besoj që është një vend i varfër, gjithkund në botë edhe tek ne duhet të jetë parimi i subvencionimit të bujqësisë, sepse ky sektor duhet të subvencionohet për t’u avancuar dhe për t’u mbajtur. Ne jemi të gatshëm që  të bashkëpunojmë me çdo organizatë që ka për qëllim subvencionimin e njerëzve që merren me këtë fushë”, tha Ferati.

U bë e ditur se hapja e kësaj pike grumbulluese të pemëve dhe perimeve, është financuar me rreth 15 mijë euro.