Si rëndom, edhe sot një kohë e gjatë e mbledhjes së Kuvendit Komunal të Ferizajt kaloi me reagime e kundër reagime për legjitimitetin e vendimeve që po i miraton ky institucion në Ferizaj. Derisa anëtarët e opozitës kritikonin ekzekutivin, por edhe kryesuesen e Kuvendit se po sjellë vendime të paligjshme, kjo e fundit vlerësoi se ky Kuvend është institucioni që më së paku po bënë shkelje ligjore.

“Sa i përket këtij mandati për një vjet deri më tani nuk është bërë asnjë shkelje, nëse kërkohet që të rishqyrtohen vendimet këto nuk janë shkelje ligjore, ju lutem.  Ne vetëm se po i realizojmë kërkesat e ministrisë, ju si LDK shumë mirë e dini se sa i keni zbatu kërkesat e nivelit qendror“, tha kryesuesja Kristina Gashi-Bytyqi

“Më provokove kryesuese me diskutu rreth këtij vlerësimi që the se nuk janë shkelje ligjore, unë kujtoj që pikërisht vendimi që sot keni sjellë me rishqyrtu ose me anulu është shkelje ligjore“, tha Enver Haliti nga VV.

“Unë dola në foltore se definitivisht e krijova nje përshtypje që m’i fuqizon akoma më shumë dy kualifikime për këtë qeveri që është ambivalente dhe virtuale”, u shpreh Burim Karameta i LDK-së.

Kësisoj, debati zgjati gati një orë, ndërkaq pas miratimit të rendit të ditës, propozim-vendimi për destinimin e një toke bujqësore në atë ndërtimore në fshatin Rakaj, pas kërkesës së Ministrisë së Administrimit të Pushtetit Lokal u anulua për këtë seancë. Një tjetër pikë që pas debatit të gjatë u miratua, ishte themelimi i Muzeut të Kujtesës.

“Arsyet kryesore për themelimin e këtij muzeu kanë të bëjnë me ruajtjen e materialeve të ndryshme që kanë të bëjnë me luftën e Ushtrisë Çlirimtare të Kosovës, por edhe me periudhat e ndryshme historike në mënyrë që këto relikte t’i promovojmë para gjeneratave të tanishme, por edhe në të ardhmen”, tha drejtoresha e Kulturës Xhemile Murati-Shabani.

“Ne nga viti 1999 kemi humbur shumë relikte, shumë foto e materiale për shkak të mungesës së një vendi të tillë, besoj që këtu do të jemi bashkë të gjitha organizatat e luftës dhe do të punojmë në këtë projekt. E kemi parë dhe studiuar objektin e ish-gjykatës për kundërvajtje dhe për momentin kujtojmë se është i përshtatshëm për këtë muze”, tha Luan Jahiri nga PDK .

Por, lokacioni për këtë muze po kundërshtohet ashpër nga anëtari i LDK-së Shkëlzen Selmani.

“Nuk është vendi i duhur për këtë muze, ju lutem ta bëjmë një analizë më të thellë, jam për ta themeluar muzeun, por jo në këtë vend, sepse nuk e  meriton ky institucion atë objekt si zgafellë”, tha Selmani.

Për themelimin e muzeut pati edhe të tjera diskutime,  jo veç për lokacionin, por edhe për rëndësinë e një institucioni të rëndësishëm për këtë komunë.

“E dimë që më së pari kemi probleme me nda buxhet për shkak që shoqatat e dala nga lufta nuk janë institucione që mundesh drejtpërdrejtë me dhënë fonde për to, mënyra e funksionimit ka me qenë shumë e zorshme, e kemi vetëm një punëtor të muzeut të qytetit dhe ligji për financa publike nuk na lejon asnjë punëtor tjetër”, tha Enver Haliti nga LVV.

E, historiani Nehat Mustafa pati një vlerësim më të thellë.

“Nëse e kemi muzeun e qytetit dhe tash dalim edhe me një muze tjetër të kujtesës atëherë i bjen që një pjesë e historisë, sidomos kjo pas Luftës së Dytë Botërore duke përfshirë edhe lëvizjet ilegale edhe endeshenë edhe luftën çlirimtare, faktikisht po i ndajmë prej asaj historisë së muzeut të qytetit”, tha Mustafa.

Ndërkaq, Muhrrem Svarqa nga LDK përmes një fjalimi të gjatë donte që gjithsesi ta qet në pah që ky qytet do të duhej ta ketë një muze të kujtesës, por jo vetëm të luftës së fundit.

“Ne në përgjithësi në tërë historinë tonë vuajmë nga kompleksi që historia fillon me ne, prandaj do të ishte mirë që mos të krijojmë këso mundësie që dikush ta keqkuptoj ndoshta edhe iniciativën më të mirë për themelimin e këtij muzeu të kujtesës, sepse unë mendoj që kujtesa jonë do të duhej të ishte shumë më e thellë sesa kjo kujtesë të cilën ne vetëdijshëm po e kufizojmë, por ta krijojmë një mundësi që të jetë një vazhdimësi e një historie të lavdishme nga e cila është frymëzuar pikërisht UÇK-ja, sepse pa pas një histori të lavdishme me siguri që nuk kishim ardhë në këtë histori triumfuese”, tha Svarqa.

Kuvendi miratoi edhe një varg vendimesh të tjera të cilat kishin të bëjnë kryesisht me këmbim të ngastrave kadastrale, si dhe shpallje të pronave në interes të përgjithshëm. Po ashtu, në këtë mbledhje u miratuan propozimet për draft strategjinë komunale për personat me aftësi të kufizuara, si dhe statutin e teatrit “Adriana”.