Ferizaj

Fëmijët me sindromën Down marrin dhurata nga kryetari Aliu

Published

8 years ago

29 December, 2018

Në prag të festës së Vitit të Ri, kryetari i komunës së Ferizajt Agim Aliu, ka vizituar shoqatën e personave me sindromën Down në këtë qytet, ku ka shpërndarë dhurata për fëmijët e kësaj shoqate.

Gjatë kohës sa qëndroi atje, Aliu u zotua se në vitin 2019 nuk do të mungoj përkrahja e institucioneve lokale për këtë shoqatë.

“Ne jemi munduar ta mbështesim shoqatën në aktivitetet e tyre, sigurisht se qysh sot i zotohemi shoqatës, por edhe familjarëve dhe fëmijëve se ne edhe në vitin 2019 do t’i mbështesim edhe më fuqishëm, sepse e ndjejmë nevojën që të mbështesim më shumë pikërisht këta fëmijë. Ne do të jemi në detyrën tonë që të ketë sa më shumë mirëqenie dhe sa më shumë përkujdesje e mbështetje për këta fëmijë dhe familjarët e tyre”, tha Aliu.

Ndërsa, menaxherja e Shoqatës ”Down Syndrome Kosova” në Ferizaj, Yllka Mani, tha se presin mbështetje më të madhe nga komuna në vitin që po hyjmë.

“Me hapësirën e re, objektin e ri shërbimet në shoqatën tonë janë rritur. Është rritur numri i shërbimeve terapeutike me fizioterapi, gjuhë dhe komunikim, është hapur kafiteria X21 e cila u ka mundësuar të rriturve të trajnohen dhe të punësohen dhe gjithashtu është rritur numri i vullnetarëve, praktikantëve dhe anëtarëve të shoqatës sonë. Ne kemi pasur një mbështetje nga komuna gjatë vitit 2018, të cilët kanë pranuar, kanë aprovuar projektin tonë, projekt i cili mbështet shërbimet brenda shoqatës sonë, shpresoj që edhe në vitin 2019 të kemi një mbështetje edhe më të madhe nga kryetari i komunës”, tha Yllka Mani.

Sipas të dhënave të kësaj shoqate, në komunën e Ferizajt janë mbi 90 persona me sindromën Down, ndërkaq në këtë qendër marrin shërbime rreth 30 fëmijë.

Ferizaj

Një burrë theret me kaçavidë nga dy persona në Ferizaj

Published

2 days ago

22 September, 2026

Redaksia

Një burrë është therur me kaçavidë nga dy persona të panjohur në Ferizaj.

Rasti është raportuar mbrëmjen e së hënës rreth orës 22:30. Sipas policisë, viktima ka pësuar lëndime të lehta trupore dhe pas trajtimit mjekësor është liruar.

Ferizaj / 21.09.2026 – 22:30.

‘Është raportuar se viktima mashkull kosovar ka kërkuar ndihmë mjekësore, pasi dyshohet se i njëjti është therur me një mjetë të mprehtë (kaçavidë) nga dy persona të panjohur. Pas tretmanit mjekësor i njëjti është liruar”, thuhet në raportin e policisë.

Ferizaj

Javën e kaluar Policia shqiptoi 1205 gjoba dhe pezulloi 30 patenta shoferi në Ferizaj

Published

3 days ago

21 September, 2026

Redaksia

Policia e Ferizajt gjatë javës së kaluar ka shqiptuar 1 mijë e 205 gjoba për kundërvajtje në trafik dhe ka pezulluar 20 patentë shoferi.

Në këtë hark kohor janë regjistruar 30 aksidente përfshirë edhe ato ku mbetën të lënduar 13 persona.

“Gjatë javës së kaluar, nga data 14-20.09.2026 janë shqiptuar 1.205 gjoba kundërvajtëse, si dhe janë pezulluar 20 patentë shoferë për shoferët e mjeteve që kanë kryer shkelje të rënda në trafik. Gjatë kësaj periudhe janë regjistruar gjithsej 30 aksidente, nga të cilat 9 aksidente me lëndime, ku kanë mbetur të lënduar 13 persona 21 aksidente me dëme materiale”- thuhet në komunikatën e së hënës (21.09.2026) të Zyrës për Informim dhe Marrëdhënie me Publikun të Policisë Rajonale të Ferizajt.

Ferizaj

Gjendet në Tiranë 80 vjeçari nga Ferizaj i raportuar i zhdukur që nga 17 gushti

Published

2 weeks ago

07 September, 2026

Redaksia

Shoqata e Kosovës për Kërkim Shpëtim njoftoi se 80-vjeçari Hamëz Ismali nga Ferizaj, i cili ishte raportuar i zhdukur që nga 17 gushti, është gjetur në Tiranë.

Ismaili aktualisht është në trajtim mjekësor në spitalin e Tiranës.

Gjetja e tij u bë e mundur falë kërkimeve intensive dhe bashkëpunimit të Shoqatës për Kërkim Shpëtim me policinë e Kosovës, atë të Shqipërisë, qytetarëve dhe ekipeve të angazhuara në këtë operacion.

Familjarët e Ismailit kishin bërë thirrje publike qytetarëve për informacion për vendndodhjen e tij, pasi për herë të fundit ishte parë më 18 gusht në Stacionin e Autobusëve në Tiranë, ku kishte mbërritur me një kompani transportuese nga Kosova.

“Shoqata e Kosovës për Kërkim Shpëtim njofton se, pas kërkimeve intensive së bashku me Policinë e Kosovës dhe angazhimit të ekipeve, është bërë e mundur gjetja e z. Hamëz Ismali, 80 vjeç, nga Ferizaj, i cili ishte raportuar i humbur që nga data 17 gusht.

Z. Hamëz është gjetur në Tiranë, ku aktualisht po merr trajtim në spital.

Shpresojmë që gjendja e tij të përmirësohet sa më shpejt dhe që së shpejti të rikthehet pranë familjes dhe në shtëpinë e tij. Falënderojmë Policinë e Kosovës, Policinë e Shqipërisë, si dhe të gjithë qytetarët, institucionet dhe personat e tjerë që kontribuuan dhe ndihmuan në gjetjen e z. Hamëz”, thuhet mes tjerash në njoftimin e Shoqatës së Kosovës për Kërkim Shpëtim.