Ferizaj

Për një vit 14 të vdekur nga aksidentet në trafik në Ferizaj

Published

8 years ago

31 December, 2018

14 persona kanë humbur jetën si pasojë e aksidenteve në komunikacion gjatë vitit 2018 në rajonin e Ferizajt. Në këtë vit që po lëmë pas, u shënuan tri vrasje. Kështu u bë e ditur në një konferencë për media të Policisë së Kosovës në Ferizaj.

Zëvendësdrejtori i Policisë për rajonin e Ferizajt Basri Shabani, tha se këtë vit është ulur dukshëm numri i aksidenteve dhe grabitjeve krahasuar me vitin 2017.

“Kemi pasur 3 vrasje gjatë këtij viti dhe që të 3 rastet janë zbuluar, ndërsa në vitin 2017 kemi pasur 2 vrasje. Tek grabitjet kemi pasur një rënie prej -10% dhe sa i përket grabitjeve në përgjithësi në Kosovë edhe tek ne kemi pasur si sfidë, megjithatë fatmirësisht krahasuar me vitin 2017 kemi pasur një rënie dhe shumica e grabitjeve janë të zbuluara. Po ashtu, objektiv ka qenë ulja e aksidenteve të trafikut që është sfidë në përgjithësi për Policinë e Kosovës. Kemi arritur që aksidentet me fatalitet t’i ulim nga 16 në 9, aksidentet me lëndime kemi –2.4%, aksidentet me dëme materiale -28.3%, ndërsa gjithsej aksidentet i kemi me -20%, ndërsa kur jemi tek personat e vdekur në vitin 2017 kemi pasur 18 persona të vdekur, ndërsa 14 persona të vdekur apo -22.2%”, tha Shabani.

Shabani tha se në vitin 2019 planifikojnë të vendosin radarë statik përmes së cilëve synojnë parandalimin e aksidenteve në trafik. Si sfidë që po i përcjell ndër vite, ai theksoi veturat e parkuara nëpër trotuare të cilat po ua vështirësojnë lëvizjen qytetarëve.

“Sa i përket parkingjeve është goxha sfidë edhe për ne kjo për shkak edhe të infrastrukturës nëpër qytetet tona duke e ditur se mungojnë hapësirat publike për parking të automjeteve, megjithatë nuk është arsyetim që të bllokohen trotuaret dhe të rrezikohen këmbësorët dhe kjo mbetet një sinjal për ne që t’i kushtojmë rëndësi më shumë parkingjeve të parregullta dhe lirimin e trotuareve. Ndërsa sa i përket monitorimit të kamerave dhe shfrytëzimit të tyre mund të them me përgjegjësi se ne përpiqemi në maksimum t’i shfrytëzojmë. Ato kanë ndikuar diku për 10% në parandalim të rasteve dhe kanë ndihmuar në zbulueshmëri të rasteve, ndërsa për të monitoruar dhe për të parandaluar përmes kamerava diçka është problem derisa nuk kemi radarë statik të vendosur, vetëm në atë mënyrë do të kishte efekt pozitiv edhe parandalim kur i kemi radarët statik, por unë mund të them se në janar të vitit të ardhshëm është një donacion nga shteti hunagrez dhe fillon montimi dhe vendosja e radarëve statik në të gjitha rrugët magjistrale dhe në ato rajonale”, tha Shabani.

Policia e Ferizajt apeloi tek qytetarët që të kenë kujdes në përdorimin e mjeteve piroteknike gjatë festimit të ndërrimit të moteve.

Ferizaj

Bëhet i ditur identiteti i viktimave të aksidentit tragjik në Gjermani

Published

3 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

3 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

5 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.