Ferizaj

Drejtoria e Zhvillimit Ekonomik shpërndanë pajisje pune

Published

6 years ago

01 November, 2019

Drejtoria e Zhvillimit Ekonomik në Ferizaj, gjatë ditës së sotme ka bërë shpërndarjen e disa pajisjeve dhe mjeteve të punës për bizneset përfituese, projekt ky i implementuar në kuadër të Fondit të Punësimit.

Drejtori i Zhvillimit Ekonomik Zekir Bytyçi, tha se janë gjithsej 38 përfitues të këtij projekti, ndërsa sigurimi i këtyre pajisjeve për prodhuesit do të ndihmoj ne krijimin e vendeve të punës.

” Sot komuna e Ferizajt ka shpërndarë pajisje dhe mjete të punës për 15 biznese nga projekti Fondi i Punësimit, ku me anë të këtyre pajisjeve do të gjenerohen vende të reja të punës. Nga kjo bizneset të cilat kanë aplikuar kanë shprehur gatishmërinë që do të punësojnë mbi 150 punëtorë. Numri i përfituesve është 38 përfitues që kanë marrë pajisje ku sot ka qenë faza e parë, ndërsa faza e dytë do të shpërndahet gjatë këtij muaji“, tha Bytyçi.

Një ndër përfituesit e këtyre pajisjeve është Mehdi Vehbiu nga fshati Prelez i Jerlive, i cili tha se tani do ta zgjeroj biznesin e tij.

“Kam apliku për një kompresor, thithëse për pluhur, një sharrë dhe jam përiftues i këtyre, e falënderoj komunën për këtë. E kam një biznes individual mobileri, por do ta bëj firmë më të madhe, më obligohej që t’i dërgoj diku tjetër me i kry do punë dhe tani i kam të mijat, në pranverë mbaj shpresë me zgjeru”,tha Vehbiu.

Por, jo të gjithë përftuesit e këtij projekti u ndanë të kënaqur. Bajrush Musa nga fshati Varosh, thotë se nuk i pranon këto pajisje meqë, sipas tij, janë jokualitative.

“Kam bërë kërkesë dhe e kam fitu këtë grant, kam bërë kërkesë për një kompresor të ajrit, disa brusalica që janë mjete të punës, e kemi bërë ofertën tek firma “Kneta” dhe jam përfitues i 3.720 euro kurse këta na i kanë pru të gjitha mjetet e Kinës që unë i refuzoj, nuk i marr dhe kisha dashur me i pyetë a na i kanë dhënë me na kry punë a po na i kanë dhënë këto ndihma me na i qorru sytë, unë i refuzova dhe nuk jam i kënaqur asapak, këto nuk na kryejnë punë aspak, unë këto ditë i kam dërgu për hekura disa burmashina që nuk më hynë në punë dhe të këta janë kanë sikur ato që i kam gjuajtur, tha Musa.

Këtij refuzuesi të pajisjeve i’u përgjigj drejtori Bytyçi.

“Sigurisht që të gjithë ata që kanë aplikuar kanë kërkuar pajisje që u janë nevojitur dhe ne u kemi ofruar të gjitha ato pajisje falas, asnjë centë nuk kanë participu, edhe pse në thirrje ka qenë participimi. Gjithmonë ka në mesin e atyre që nuk i përshtatet kërkesa, por ne do ta rishqyrtojmë se a është çështja tek kualiteti i duhur, edhe pse sa kam unë informata të gjitha ato pajisje janë të ofruara me garancione përkatëse“, tha Bytyçi.

Këto pajisje për 38 përfitues, buxhetit të komunës së Ferizajt i kanë kushtuar 150 mijë euro.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim