Ferizaj

7 mijë doza vaksina kundër gripit afër përfundimit

Published

5 years ago

12 December, 2019

Nga e hëna nëpër qendrat e mjekësisë familjare në Ferizaj, ka nisur vaksinimi kundër gripit sezonal. Përgjegjësja në Shërbimin e Vaksinimit Drita Nazifi-Emini, tha se 7 mijë doza të vaksinave janë shpërndarë nëpër të gjitha institucionet shëndetësore publike që funksionojnë në Ferizaj dhe varësisht prej nevojave do të bëjnë kërkesë për shtim të numrit të tyre.

“Deri më tani i kemi marrë 7000 doza të vaksinave dhe ne sipas planprogramit që e kemi në raportin e pacientëve që duhet të trajtohen apo të mjekohen nëpër rajone të ndryshme duke e ditur që në qytetin tonë i kemi 3 qendra të mjekësisë familjare kryesore dhe që janë të mëdha atëherë e kemi ndarë edhe numrin e vaksinave që të jenë sa më afër pacientëve në bazë të rajoneve të tyre. Në kuadër të kësaj sasie ne i kemi edhe punktet, fshatrat përreth ku i kemi edhe ambulantat, njësinë e ambulantës dhe aty ku është e lejuar që të jepet vaksina edhe për fëmijë edhe aty i kemi ndarë në numër të përafërt me banorët të cilët janë të planifikuar të cilët do të vaksinohen. Kemi filluar nga dita e hënë dhe deri tani jemi thuajse në dozat e fundit të vlerave që i kemi marrë, që jemi furnizuar nga dita e hënë nga Instituti Kombëtar i Shëndetit Publik në Prishtinë”, tha Drita Nazifi-Emini.

Ajo tha se vaksinat kundër gripit sezonal janë ndarë edhe për personat me aftësi të kufizuara.

“Ekipi jonë ka shkuar të vaksionojë edhe pacientët të cilët janë në ”Hendifer” dhe në ”Handikos”, aty ka qenë një numër deri në 30 pacientë që i kemi vaksinuar dhe ajo besoj që është një afërsi shumë e mirë për pacientë që edhe ata me një mënyrë të mos jenë në konfrontim të numrit të pacientëve tanë që vijnë çdo ditë”, tha Drita Nazifi-Emini.

Të moshuarit që prisnin për të marrë vaksinën kundër gripit, u shprehën të kënaqur për këtë shërbim.

“Këto vaksina janë të mira. Faleminderit që kujdesen për ne, për shëndetin tonë që jemi në këtë moshë, ka edhe më të moshuar edhe disa kanë shumë sëmundje të ndryshme”, u shpreh Sabrije Goca.

“Po kemi ardhë të marrim vaksina të pleqërisë, diçka për gripin. Me bashkëshorten kam ardhë, i falënderoj të gjithë ata që i kanë dërgu këto vaksina dhe ju që po na shërbeni. Ju faleminderit shumë”, tha Ragip Hashani.

Për dallim nga vitet e kaluara, sipas rekomandimeve të Organizatës Botërore të Shëndetësisë, vaksina këtë vit ka qenë katër shtamëshe që e rrisin fuqinë mbrojtëse ndaj virusëve më agresiv në qarkullim të gripit sezonal.

Ferizaj

Policia në Kaçanik me aktivitet sensibilizues për Ditën Ndërkombëtare të Fëmijëve të Prekur nga Sindroma Down

Published

2 days ago

21 March, 2025

Redaksia

Policia e stacionit në Kaçanik organizoi një aktivitet për Ditën Ndërkombëtare të Fëmijëve të Prekur nga Sindroma Down

Në Ditën Ndërkombëtare të Fëmijëve të Prekur nga Sindroma Down, policia e stacionit në Kaçanik organizoi një aktivitet të përbashkët me shoqatën Hendikos, si pjesë e aktiviteteve të planifikuara.

Gjatë aktivitetit, morën pjesë eprorë dhe disa zyrtarë policorë, të cilët udhëhoqën dhe mbikëqyrën disa fëmijë me Sindromën Down.

Fëmijët ishin të veshur me uniforma të policisë junior dhe u mbikëqyrën nga drejtoresha e Hendikos në Kaçanik.

Aktiviteti përfshiu një parakalim të fëmijëve nëpër qytet, ku u shpërndanë fletushka informative për rregullat e trafikut dhe u realizua një kontroll i përbashkët i automjeteve në rrugë.

Kjo ngjarje theksoi rëndësinë e integrimit dhe mbështetjes së individëve me aftësi të kufizuara në shoqëri, të cilët gëzojnë të drejta të plota dhe të barabarta me të gjithë të tjerët, thuhet në njoftimin e policisë.

Ferizaj

Kërkohet paraburgim për të dyshuarit për trafikim të 4 vajzave

Published

6 days ago

17 March, 2025

Redaksia

Prokuroria Themelore në Ferizaj, ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj të dyshuarve E.S., nga Lipjani dhe V.H. nga Ferizaj, për shkak të dyshimit se kanë kryer veprën penale “trafikimi me njerëz”.

“Sipas Prokurorisë, ekziston dyshimi i bazuar se nga muaji gusht i vitit 2024 e deri me datën 15.03.2025, në magjistralen Ferizaj-Prishtinë, të pandehurit në bashkëkryerje me dashje dhe me qëllim të përfitimit të kundërligjshëm pasuror për vete, në vazhdimësi, marrin pjesë në trafikimin e njerëzve, në atë mënyrë që e pandehura V.H., në koordinim të plotë edhe me të pandehurin E.S., përmes kanosjes apo përdorimit të forcës, duke bashkëpunuar me pronarin faktik të vilave, sipas kërkesave të klientëve të tyre iu ofronin femra për shërbime seksuale, saktësisht duke u siguruar të njëjtave klientë të ndryshëm me të cilët bën marrëveshje që të kryejnë marrëdhënie seksuale në këmbim të parave, e të cilat para të pandehurit i përvetësojnë për vete”, thuhet mes tjerash në njoftim.

Të pandehurit që nga data 15 mars 2025, me vendim të Prokurorit të Shtetit gjenden nën masën e ndalimit 48 orësh për veprën penale të trafikimit me njerëz.

Ferizaj

Goditet me veturë një këmbësor në Dardani – Shoferi largohet nga vendi i ngjarjes

Published

1 week ago

13 March, 2025

Redaksia

Një person nga fshati Zllatar i Ferizajt, ka pësuar lëndime trupore pasi që dyshohet se u godit nga një veturë që ishte në lëvizje në afërsi të fshatit Dardani, në magjistralen Ferizaj – Gjilan.

Policia ka njoftuar se vozitësi i cili dyshohet se e goditi këmbësorin është larguar nga vendi i ngjarjes.

Në raportin 24 orësh, policia bëri të ditur se viktima është dërguar për trajtim mjekësor në Qendrën Klinike Universitare të Kosovës (QKUK).