Ferizaj

Përkujtohet dëshmori Rexhep Aliu

Published

6 years ago

29 January, 2020

Në teatrin “Adriana” të Ferizajt është mbajtur akademi përkujtimore me rastin e 30 vjetorit të rënies së dëshmorit të UÇK-së Rexhep Aliu. Familjarë, miq, të afërm dhe drejtues të institucioneve lokale përkujtuan të ndjerin për sakrificën dhe punën e bërë për vendin. Kryetari i Ferizajt Agim Aliu, tha se liria që gëzojmë sot është falë atyre që u flijuan gjatë luftës në Kosovë.

“Edhe Rexhepi si çdo martir e hero i këtij vendi, lirisë i dhanë shije tjetër, dhanë gjakun e tyre me shpresën se të gjithë do të gëzojnë lirinë. Qindra e mijëra martirë, dëshmorë e heronjë të kombit ishin lajmëtarët se liria është afër, se Kosova do të çlirohej, se në mejdanin e lirisë po dilnin tash zotësit e Kosovës, trimat e trimëreshat e Ushtrisë Çlirimtare të Kosovës. Lavdi e përjetshme gjithë dëshmorëve të kombit, lavdi të rënëve për lirinë që e gëzojmë sot”, tha Agim Aliu.

Kryetari i Shoqatës së Familjeve të Dëshmorëve të UÇK-së në Prishtinë, Xhavit Jashari dhe ish-komandanti i UÇK-së, Hamdi Ndrecaj, i njohur si komandant ”Panteri”, thanë se vendi duhet t’i kujtoj përherë ata që ranë për liri.

“Ne do të vazhdojmë çdoherë t’i kujtojmë, t’i nderojmë, t’iu japim vendin meritor gjithë brezave sepse ata ishin që mbajtën gjallë idealin e të parëve tanë dhe e vërtetuan se lirinë nuk e sjellë askush, por ajo fitohet me veprime, me aktivitete e sidomos me luftëra dhe me rënie. Sot e kemi lirinë falë sakrificës, falë përpjekjeve të mëdha e cila kulmoi me luftën e lavdishme të Ushtrisë Çlirimtare të Kosovës”, tha Xhavit Jashari.

“Sot në 30 vjetorin e rënies ne kujtojmë me admirim Rexhepin, me të gjithë respektin dhe nderimet më të mëdha që i kemi për të dhe për të gjithë ata që sakrifikuan për lirinë e Kosovës, pavarësinë e vendit, në këtë kohë ata ishin kolosët e kombit tonë, ishin kolosët më të mëdhenjë sepse kështu e kemi kryer një obligim shumë të vogël krahasuar gjatë periudhave historike çfarë bënë ata për ne”, tha Hamdi Ndrecaj.

Rexhep Aliu vdiq më 29 janar të vitit 1990 në moshën 43 vjeçare.

Ferizaj

Ngritët aktakuza e parë për zgjedhjet e 28 dhjetorit

Published

1 week ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.