Kosovë

Komuniteti ashkali pa përfaqësues në qeveri

Published

6 years ago

04 February, 2020

Për herë të parë që nga paslufta komuniteti ashkali nuk do të jetë i përfaqësuar në Qeverinë e Kosovës.

Ishte dje deputeti i Partisë së Ashkalinjve për Integrim, Etem Arifi, i cili është edhe kryetar i kësaj partie, ai që nuk e votoi qeverinë e re të Albin Kurtit, duke mbetur kështu në opozitë.

Qazim Rrahmani, kryetari i PAI-së në Ferizaj, thotë se deri në momentin e fundit ishin në bisedime me koalicionin qeverisës, mirëpo nuk arritën marrëveshje duke bërë kështu që të mbesin në opozitë.

“Pas certifikimit të zgjedhjeve ne kemi ofruar kërkesat tona për t’u bërë pjesë e ekzekutivit me partitë fituese LVV-LDK, normalisht parimi i PAI-së ka qenë që të kemi një pjesëmarrje më të madhe në ekzekutivin e qeverisë dhe një përfaqësim më të mirë pasi komunieti ashkali është i shkelur nga të gjitha qeveritë në aspektin e përfaqësimit në ekzekutiv për arsye që gjithmonë pozitat ministrore dhe zëvendësministrat kanë pasur më shumë komunitetet e tjera krahasuar me komunitetin tonë. Për ne nuk ka qenë edhe shumë parim pozita sa ka qenë parim që të përmirësohet gjendja e komunitetit tonë dhe normalisht ata kanë pasur zotime në mënyrë deklarative, por nuk ka pasur diçka me shkrim që do të ishte bindëse për ne që të jami pjesë e qeverisë, ne edhe në ditën e fundit të seancës jemi munduar në momentet e fundit që të gjejmë një gjuhë të përbashkët, por në fund nuk arritëm të gjejmë atë dhe tani jemi pjesë e opozitës momentalisht”, tha Rrahamani.

Rrahmani, beson se mandatari i ri nuk do të lë anash komunitetin ashkali, përkundër që përfaqësuesi i tyre në Kuvend nuk e votoi qeverinë e re.

“Unë besoj që ata e njohin mirë gjendjen e komunitetit tonë dhe për shkak se ka ndarje në ideologji politike nuk besoj se duhet t’i dënojnë qytetarët pse ne nuk jemi pjesë e pozitës dhe mos të kenë qasje më të mirë për këtë komunite, unë shpresoj dhe besoj se ata do të kenë qasje të drejtë me të gjithë qytetarët pavarësisht se liderët tanë janë pozitë apo opozitë, shteti i Kosovës është formuar në bazë të etnicitetit dhe në Kushtetutën e saj për të drejta të barabarta për të gjithë dhe besoj se kjo do të respektohet“, tha Rrahmani.

Kryetari i PAI-së në Ferizaj dhe ish-zëvendësministri në tri mandate qeverisëse, u shpreh se do të ngrisin zërin e tyre për të përmirësuar mirëqenien e këtij komuniteti.

Kosovë

Sot nis numërimi i votave të kandidatëve për deputetë

Published

2 hours ago

08 June, 2026

Redaksia

Në Qendrat Komunale të Numërimit sot pritet të nisë procesi i numërimit të votave të kandidatëve për deputetë.

Zëdhënësi i KQZ-së Valmir Elezi, ka thënë se paraprakisht do të bëhet verifikimi i rezultateve të subjekteve politike nga formularët e plotësuar në vendvotime.

Elezi gjithashtu bëri të ditur se sot në ora 16:30, do të mbajnë konferencë për media ku edhe do të njoftojnë për fillimin e verifikimit /numërimit në të gjitha komunat si dhe për të gjitha aktivitetet e KQZ-së në ditët e ardhshme.

Nga publikimi i fundit i rezultateve preliminare të zgjedhjeve të 7 qershorit, nga 99.44% të votave të përpunuara, Lëvizja Vetëvendosje ka marrë në 42.91 % të votave pasuar nga Partia Demokratike e Kosovës me 21.08% dhe Lidhja Demokratike të Kosovës me 17.60% të votave. Ndërkaq Aleanca për Ardhmërinë e Kosovës fitoi 7.17 % të votave.

Kjo përqindje nuk përfshin votat nga vendvotimet me kusht, votat e personave me nevoja të veçanta dhe ato të votimit jashtë Kosovës.

Kosovë

Mbeten edhe 14 kuti votimi të pa numëruara

Published

3 hours ago

08 June, 2026

Redaksia

Nga publikimi i fundit i rezultateve preliminare të zgjedhjeve të 7 qershorit, vërehet se nga 2498 kuti kanë mbetur të numërohen edhe 14 sosh.

Sipas faqes së Komisionit Qendror të Zgjedhjeve nga 99.44% të votave të përpunuara, Lëvizja Vetëvendosje ka marrë në 42.91 % ose 297.363 vota. E dyta renditet Partia Demokratike e Kosovës me 21.08% apo me 146.108 vota. Lidhja Demokratike të Kosovës ka marrë 17.60 % apo 121.987 vota, ndërkaq Aleanca për Ardhmërinë e Kosovës me 7.17 % apo 49.712 vota.

Kjo përqindje nuk përfshin votat nga vendvotimet me kusht, votat e personave me nevoja të veçanta dhe ato të votimit jashtë Kosovës.

Diasporë

Mërgata voton në përfaqësitë diplomatike në zgjedhjet parlamentare të Kosovës

Published

2 days ago

06 June, 2026

Redaksia

Mijëra shtetas të Kosovës që jetojnë jashtë vendit po votojnë të shtunën fizikisht në përfaqësi diplomatike të Kosovës për zgjedhjet e parakohshme parlamentare të 7 qershorit, njoftoi Komisioni Qendror i Zgjedhjeve (KQZ).

Mbi 27.000 shtetas të Kosovës me të drejtë vote janë regjistruar për të votuar në 30 përfaqësi diplomatike të Kosovës në 18 shtete të ndryshme të botës.

Në të gjitha këto përfaqësi është duke u zhvilluar votimi, tha të shtunën zëdhënësi i KQZ-së, Valmir Elezi, në një konferencë për media në Prishtinë.

Deri në orën 13:00 kanë votuar 38.97 për qind apo 10.804 votues, bëri të ditur Elezi.

Vendvotimet në përfaqësi diplomatike dhe konsullore do të jenë të hapur prej orës 07:00 deri në ora 19:00, sipas kohës lokale në vendet përkatëse.

Ky numër votuesit është vetëm një pjesë e një rekordi prej mbi 110.000 votuesve nga mërgata që janë regjistruar për të votuar në zgjedhjet e 7 qershorit.

Votimi po zhvillohet në vende si Gjermani, Zvicër, SHBA, Kanada, Itali, Francë, Britani e Madhe, Belgjikë, Suedi, Austri, Norvegji, Slloveni, Danimarkë, Turqi, Kroaci, Holandë, Hungari, Çeki etj.

Votimi në përfaqësi diplomatike ishte mundësuar për herë të parë në zgjedhjet parlamentare të 9 shkurtit të 2025, ndërsa më herët kishte qenë i mundur vetëm votimi përmes postës.

Zgjedhjet e parakohshme parlamentare në Kosovë po mbahen pasi Kuvendi i Kosovës nuk arriti ta zgjedhë presidentin e ri brenda afateve kushtetuese.

Partitë politike nuk arritën konsensus rreth zgjedhjes së presidentit pasi Vjosa Osmanit i përfundoi mandati pesëvjeçar në fillim të prillit.

Këto do të jenë zgjedhjet e treta parlamentare në 18 muajt e fundit në Kosovë, pas zgjedhjeve të mbajtura në shkurt dhe dhjetor të vitit 2025.

| Radio Evropa e Lirë