Ferizaj

Këshilli i pajtimit të gjaqeve shënon 30 vjetorin e themelimit

Published

6 years ago

26 February, 2020

Këshilli i pajtimit të gjaqeve ka shënuar sot 30 vjetorin e themelimit të tij. Në një ceremoni që u organizua në hapësirat e Universitetit të Ferizajt u kujtua nisma e Anton Çetës dhe e veprimtarëve të tjerë që nisën aksionin atdhetar e humanitar të faljes së gjaqeve, që asokohe si dukuri kishte shtrirë rrënjë shumë thellë anembanë vendit.

Veprimtarë e anëtarë të këshillit të dikurshëm lokal të pajtimit, thanë se aksioni i këshillit të gjaqeve ishte organizimi më frytdhënës i kombit shqiptar, duke e quajtur akt etnokulturor.

“Normalisht fillimet ishin tubimi i djemve dhe vajzave të cilët ndjenin nevojën që të bënin diçka dhe ajo diçka ishte momenti i frymëzimit i ngacmimit të ndjenjave patriotike të njerëzve për t’iu bashkëngjitur këtij aksioni. Ne kemi qenë koshient që do të arrihet ajo që në fund u arrit që në tërë Kosovën dhe trojet shqiptare përfundoi vëlla vrasja dhe gjakmarrja tek shqiptarët të shkoj në kujtesën e keqe historike”, tha Ismail Hasani, veprimtar.

“Fillimi i pajtimit të gjaqeve kishte qëllimin e nisjes së bashkimit të shqiptarëve të pajtohemi mes vete se kishim me kënd të luftojmë, me armikun shekullor dhe filluam me pajtimin e gjaqeve mes popullit dhe ku më pas vie edhe organizimi ushtarak deri tek lufta çlirimtare. Veprimtaria e rinisë së Ferizajt nga 18 marsi deri më 7 maj pajtoi 39 gjaqe në komunën e Ferizajt, 18 plagë dhe 18 ngatërresa”, tha Liman Rushiti, veprimtar.

“Grupi për pajtimin e gjaqeve në ato rrethana të veprimit ishte shndërruar në një institucion shpresëdhënës për popullin shqiptarë. Falja e gjaqeve do të kryhej për hirë të unitetit kombëtar e për hirë të politikës ku kjo lëvizje habiti botën e qytetëruar”, tha Xhevat Kryeziu, veprimtar.

Edhe nikoqiri i kësaj ceremonie, rektori i universitetit të Ferizajt Agron Bajraktari, tha se këshilli i pajtimit të gjaqeve ishte kthesa më e rëndësishme historike që pati populli shqiptarë.

“Nga aspekti historik i ngritjes së vetëdijes së organizimit fillimisht paqësor pastaj ushtarak të vendit tonë do të jetë një nga hapat më të mëdhenjë që i ka ndodhur popullit tonë ndër shekuj” ,tha Bajraktari.

Në përvjetorin e 30 të këshillit të pajtimit të gjaqeve u promovua edhe një libër i titulluar “Kronikë pajtimesh”, të autorëve Raif Musa dhe Valdete Bajrami- Musa, të cilët ishin edhe anëtarë të këtij këshilli.

“Këtë libër që e keni para vetës është një kronikë e përshkruar e secilit nga ne që në shtëpi dhe në odë kemi shkuar në vitet e 90-ta dhe kemi vrapuar dy vite me radhë parreshtuar që të zhdukim gjakmarrjen. Ne jemi nis dhe kemi vepruar nga ajo thënia profetike që falja e gjakut nuk ndryshon të kaluarën, por e ndryshon të ardhmen dhe ne e kemi ndryshuar të ardhmen me veprimin tonë që e kemi bërë në vitet e 90-ta“, tha Raif Musa.

Këshilli per pajtimin e gjaqeve në Kosovë që nga themelimi i tij ka arritur të ndalojë hakmarrjen tek më shumë se 2500 familje dhe të zgjidhë ngatërresat ndërmjet qindra familjeve të tjera.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

4 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

5 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim