Ferizaj

KPF ia procedon Kuvendit propozimin për ndarjen e 200 mijë eurove

Published

6 years ago

01 April, 2020

Anëtarët e Komitetit për Politikë dhe Financa të komunës së Ferizajt, u mblodhën sot për t’ia proceduar Asamblesë komunale pikën e vetme për miratim, e cila ka të bëj me ndarjen e 200 mijë eurove në mbështetje të luftës kundër pandemisë Covid-19.

Drejtoresha e Financave Sebahate Ajeti-Sadiku, tregoi se nga cilat kategori i kanë marrë këto mjete dhe kah do t’i orientojnë ato.

“Duke pasur për bazë situatën emergjente dhe gjendjen ekonomike të banorëve të Ferizajt, lejohen mjete financiare nga kategoria mallra dhe shërbime në shumën prej 200 mijë eurove që ne si komunë i kemi siguruar nga nënprogramet e drejtorive përkatëse. 50 mijë euro janë nga nënprogrami i administratës, 50 mijë euro janë ndarë nga administrimi dhe mbledhja e tatimit në pronë, 50 mijë euro janë ndarë nga nënprogrami i infrastrukturës rrugore, 50 mijë euro janë ndarë nga nënprogrami për shërbime të shëndetësisë primare. Kjo shumë do të shfrytëzohet për sigurimin e artikujve(pakove) ushqimore e hixhienike për familjet me gjendje të rëndë ekonomike, dezinfektimi i hapësirave publike, furnizimi me mjete mbrojtës nga virusi Covid-19 si dhe mbulimin e nevoja tjera që dalin si rezultat i parandalimit të këtij virusi”, tha Ajeti-Sadiku.

Të gjithë anëtarët e Komitetit për Politikë dhe Financa ishin pro miratimit të këtij propozimi, por anëtarja e LDK-së Yllkë Neziri pati një vërejtje. Ajo tha se ndarja e këtyre mjeteve është dashur të përmendet si iniciativë e Asamblesë e jo e ekzekutivit. Neziri kërkoi që një pjesë e kësaj shume t’i ndahet kompanisë “Pastërtia” e cila është duke bërë dezinfektimin e rrugëve dhe hapësirave publike.

“Kjo iniciativë duhet me u vlerësu si iniciativë e anëtarëve të Kuvendit Komunal, pasi kërkesa fillimisht ka filluar nga anëtarët e Kuvendit Komunal dhe ka qenë dashur të specifikohet kjo pasi ka qenë presioni i tyre për ndarjen e këtyre mjeteve. Sidoqoftë qëllimi është human dhe ne do ta mbështesim. Po ashtu, është e paqartë ku do të destinohen këto mjete, me u specifiku sa mjete do të shkojnë për familjet në nevojë, sa për dezinfektim të hapësirave, publike pasi ne e dimë që kompania publike “Pastërtia” ka bërë një punë të madhe këto ditë dhe inkasimi ka qenë shumë i vogël për atë kompani ku e dimë që ka një numër të madh të punëtorëve në atë kompani dhe si kanë me i siguru pagat për këtë muaj, kështu që kisha thënë që kompaninë “Pastërtia” me pas më me prioritet dhe një pjesë të mjeteve me nda për ata”, tha Neziri.

“Kemi thënë se jemi duke menaxhuar situatën dhe momentin që e shohim të arsyeshme patjetër se do të ftojmë një seancë të jashtëzakonshme kështu që kryetari e ka parë të arsyeshme në këtë kohë dhe e ka bërë propozimin, përndryshe unë kërkesë zyrtare nuk kam pas deri tash, megjithatë e di se janë mbledhur nënshkrime, por qëllimi është i përbashkët, me nda mjete dhe me iu ndihmu qytetarëve, ky është qëllimi i përbashkët”, tha Kristina Gashi-Bytyqi.

Mbledhja e jashtëzakonshme e Kuvendit të Komunës do të mbahet nesër në sallën e teatrit të qytetit “Adriana”.

Ferizaj

Gjatë qershorit në Ferizaj janë konfiskuar 74 motoçikleta

Published

5 days ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

1 week ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

1 week ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.