Ferizaj

Nga java e ardhshme nis trajtimi i qenve endacakë

Published

6 years ago

01 April, 2020

Mbyllja e lokaleve në të cilat shërbehet ushqim ka bërë që qentë endacakë mos të gjejnë ushqim siç ka ndodhur ditëve të zakonshme, duke ndikuar kështu në rritjen e agresivitetit të tyre si pasojë e mosushqyerjes.
Drejtori i Bujqësisë në komunën e Ferizajt Burim Bajrami, tha se janë në dijeni për këtë situatë, mirëpo komuna tani nuk ka kompetenca në këtë drejtim.

“Tani shihen edhe lëvizjet e qenve endacakë nëpër qytet dhe nëpër fshatra, është një numër relativisht i lartë i tyre, por ne në vitin 2018 i kemi trajtuar 1500 qen endacakë, por me të marrë një vendim ish-kryeministri Haradinaj që kjo kompetencë t’i takoj AUV-së, ne më nuk kemi pasur të drejtë të merremi me këtë çështje. Jemi në pritje nga ana e Agjencionit që të nënshkruaj kontratën me operatorët ekonomik që janë brenda komunës së Ferizajt për trajtimin e qenve endacakë. Meqenëse është kompetencë e AUV- ne si komunë nuk kemi të drejtë të shpallim më tender edhe pse vitin e kaluar kemi planifikuar që të investojmë rreth 40 mijë euro në këtë drejtim, por pasi kompetenca kaloj në AUV ne ato mjete i kemi drejtuar për probleme të tjera. Me kënaqësi të madhe ne do të merreshim me këtë çështje, por meqë kompetencat kanë kaluar tek ai institucion ne nuk guxojmë të bëjmë projekte duale pasi ndeshemi me ligjin”, tha Bajrami.

Ndërkaq, drejtori i Drejtorisë së Shëndetit dhe Mirëqenies së Kafshëve në kuadër të Agjencisë së Ushqimit dhe Veterinarisë, Sadik Heta, përmes telefonit tha se javën e ardhshme do t’i nënshkruajnë kontratat me operatorët ekonomik të cilët do të merren me trajtimin e qenve endacakë.

“Ne si agjenci kemi filluar qysh para vitit të ri inicimin e procedurave të prokurimit për lidhjen e kontratave me subjektet veterinare të licensura për trajtimin e qenve endacakë. Realisht procedurat kanë përfunduar para gati dy muajve, por duke pasur parasysh buxhetin që s’ka qenë i aprovuar ne nuk kemi arritur me bë nënshkrimin e kontratave dhe pasi është bërë alokimi i buxhetit tek ne, ne po shpresojmë që nga java e ardhshme të lidhim kontratat me veterinarë dhe të nisim projektin për trajtimin e qenve endacakë. Ligjërisht komunat e kanë obligim ligjor me bë trajtimin e qenve endacakë, por duke pasur parasysh që qeveria e kaluar ka obliguar agjencionin të merret me qen endacakë ne për këtë vit dhe vitin e ardhshëm do merremi, pastaj do t’ua lëmë komunave si obligim ligjor që e kanë trajtimin e qenve endacakë, përndryshe ligjet në Kosovë nuk e kanë ndaluar që komunat me u marrë me qen endacakë, por duke pasur parasysh që ne si agjencion e kemi marrë përsipër në nivel vendit atëherë edhe me komunën e Ferizajt kemi arritur një marrëveshje shoqërore që mos të fillohet derisa të lidhen kontratat. Unë po shpresoj që kontratat do të lidhen deri në javën e ardhshme, pastaj puna në terren varet nga situata se si do të sillet, sido që të jetë ne do t’i urdhërojmë veterinarët që me fillu punën me qen endacakë edhe në Ferizaj”,tha Heta.

Heta tha se projekti i trajtimit të qenve endacakë parasheh parandalimin e shumimit të qenve endacakë dhe jo strehimin apo eliminimin e tyre.
“Qëllimi i agjencisë edhe i ligjeve në fuqi është parandalimi i shumimit të qenve, ndërsa jo eliminimi i qenve siç po prolongohet, por është parandalimi i shumimit të qenve, që do të thotë, kastrimi, sterilizimi dhe vaksinimi. Unë e di që ka raste që shumë qenë janë të trajtuar, mirëpo ata munden me qenë edhe agresiv që shumicën e rasteve janë tani si pasojë e ushqimit dhe ngacmimit, por sido që të jetë, qëllimi i projektit është parandalimi i shumimit dhe jo eliminimi i tyre”, tha Heta.

E, derisa të kaloj situata me pandeminë Covid-19, drejtori i Bujqësisë në Ferizaj Burim Bajrami, kërkoi nga qytetarët që t’iu japin ushqim qenve endacakë, pasi kjo është e vetmja mënyrë për të mos i lënë ata të bëhen agresiv.

“Unë e shoh si problematikë ushqyerjen e qenve endacakë për shkak të mbylljes së shumë lokaleve dhe u bëj thirrje njerëzve të vullnetit të mirë, i lus ata që në momentet kur hasin në qen endacakë, të paktën ato mbeturina që i kanë t’ua hedhin qenve, pasi kjo është e vetmja mënyrë që ata të ushqehen dhe të mos bëhen agresiv”,tha Bajrami.

Drejtori i Bujqësisë në Ferizaj Burim Bajrami, tha se në kuadër të rregullimit të tregut të kafshëve kanë paraparë një qendër strehuese për qen endacakë ku janë të planifikuara 70 mijë euro për këtë projekt.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”