12 maji njihet si Dita Ndërkombëtare e Infermierisë. E, pikërisht këta muaj angazhimi i tyre është ekspozuar edhe më shumë. Për shkak të pandemisë globale koronavirus, shumë njerëz janë mbyllur nëpër shtëpi duke ndalur edhe punën, por një gjë të tillë nuk patën mundësi ta bëjnë mantelbardhët.
Për t’i duartrokitur dhe falënderuar për punën e tyre paraditën e sotme në oborrin e Qendrës Kryesore të Mjekësisë Familjare në Ferizaj ishte organizuar një aktivitet simbolik.

Këtu i pranishëm ishte edhe kryetari i komunës së Ferizajt Agim Aliu, i cili tha se heroizmi i mantelbardhëve është dëshmuar në secilën rrethanë.

“Sot jemi në pamundësi t’i shtrëngoj duart e secilit prej jush për t’iu falëndeuar për të gjithë punën dhe angazhimin që keni bërë. Pranojeni një dorështrëngim të secilit ferizajas që sot është e pamundur t’u shprehet falënderimi juve. Hero në luftë dhe hero në paqe dhe kush më mirë e bën këtë sesa detyra, përgjegjësia dhe angazhimi i një mantelbardhi. Pra, angazhimi i një mantelbardhi është angazhim mes jetës dhe vdekjes, ju jeni ata nga të cilët varet jeta e çdo qytetari”, tha Aliu.

Angazhimi i infermierëve u vlerësua edhe nga drejtues të institucioneve e udhëheqës të departamenteve të ndryshme shëndetësore.

“Dua të falënderoj gjithë punëtorët shëndetësor për punën e palodhshme të tuajën që keni qenë në çdo kohë të gatshëm për të kryer punën me përpikëri”, tha Nadire Ymeri, drejtoreshë e QKMF-së.

“Në këtë pandemi e tërë bota është mbyllur në shtëpi si arma e vetme efikase për ndalimin e përhapjes së infeksionit, por ne mantelbardhët nuk e kemi këtë mundësi, sepse neve kësaj radhe fati na e caktoi që të jemi ushtarë të vijës së parë të përballjes me këtë armik të ri dhe të panjohur. Kësaj radhe ora historike ra mbi ne, or ne nuk do të ndalemi dhe do të qëndrojmë stoik edhe më tutje, sepse kur të përfundoj kjo pandemi ne duhet të dalim ballëhapur para qytetarëve. Të tjerët po na vlerësojnë si heronj, por ne po i kryejmë obligimet që kemi marrë nga qytetarët tanë dhe po përmbushim një premtim që kemi dhënë”, tha Selim Bega, kryeinfermier.

Në këto ditë pandemie dikush është përkujdesur që infermierëve t’iu kushtoj edhe këngë. Është 12 vjeçari Erti Dervishi nga Ferizaj, i cili pikërisht sot e publikoi atë para mantelbardhëve.

“Nëna ime është frymëzimi im që unë kam fillu me këndu dhe jam i lumtur që i këndova këngë nënës sime. Ajo e ka zbuluar talentin time, por edhe më parë nuk u është kushtuar infermierëve këngë. Derisa në këtë situatë nëna ka punuar në fillim ka qenë frika, por tani edhe nëse e kemi virusin besoj se e tejkalojmë pa problem. Secili fëmijë që e ka prindin mantelbardhë do të ndjehet më krenarë tani”, tha Derivishi.

Dita Ndërkombëtare e Infermierëve përkon me 200-vjetorin e lindjes së Florence Nightingale, e cila njihet edhe si themeluesja e infermierisë në botë.