Ferizaj

Hapen restorantet dhe kafeteritë në Ferizaj

Published

6 years ago

18 May, 2020

Sot ka filluar të zbatohet faza e dytë e lehtësimit të masave për rikthim në normalitet pas gjendjes së krijuar nga pandemia COVID-19.
Në këtë fazë është përfshirë edhe hapja e kafeterive dhe e restoranteve në formën “Merre me vete”.

Pas dy muaj mbyllje të plotë, sot nisi punën edhe restorant “Ballkani”. Rikthimit në punë iu gëzuan punëtorët e këtij biznesi.
Arben Vishi, i cili është i punësuar në këtë restorant, thotë se mezi ka pritur që të rinisë punën.

“Për fat të mirë nga sot veç filluam pas dy muajve. Ta them të drejtën u gëzuam shumë pasi ne kemi nevojë me punu, por edhe klientët na kanë thirrë vazhdimisht, por falë Zotit po duket se jemi në fund të pandemisë dhe do t’i përmbahemi çdo rekomandimi deri në hapjen totale që do të bëhet”, tha Vishi.

Sa i përket shërbimit “Merre me Vete”, Vishi thotë se do të jetë sfidues, por edhe një eksperiencë e re.

“Është pak i vështirë ky shërbim krahasuar me atë që kemi punuar gjatë ditëve normale, por pasi filluam sot është mirë që së paku bizneset që janë afër me pas mundësi me ardhë me marr me vete ushqimin. Po na vjen pak interesant, por kjo pandemi ka pasur edhe anën e saj pozitive, kemi kaluar më shumë kohë me familje dhe ishte një eksperiencë në vete”, tha Vishi.

Për t’iu përmbajtur rekomandimeve të Ministrisë së Shëndetësisë, në hyrje të restorantit janë vendosur dezinfektues për klientët. Përveç kësaj, Vishi tha se ambientet e restorantit po dezinfektohen pas çdo hyrje dhe dalje të klientëve.

“Jemi pajisur me dezinfektues, kemi dezinfektues për tavolina dhe karrige dhe dezinfektues që është adekuat për duar, kemi maskat, dorëzat, por kujdesi më i shtuar është në kuzhinë, edhe pse gjithmonë ka qenë kujdesi në kuzhinë”, tha Vishi.

Përveç kafeneve dhe restoranteve, nga sot janë rihapuar edhe floktarët dhe sallonet e bukurisë, stomatologët dhe fizioterapeutët, tregtarët me pakicë dhe tregjet e gjelbra, transporti hekurudhor, transporti urban dhe ndërurban me leje të veçanta, qendrat e thirrjeve telefonike me lista të stafit esencial, si dhe galeritë dhe muzetë.

Të gjitha këto biznese pa qytetarë nuk mund të funksionojnë, e këta të fundit nga sot mund të dalin dy herë në ditë nga 2 orë, sipas shifrës së parafundit në numrin e kartës së identitetit.

Ferizaj

Bëhet i ditur identiteti i viktimave të aksidentit tragjik në Gjermani

Published

2 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

4 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.