Rimëkëmbja ekonomike pas përfundimit të pandemisë Covid-19, do të jetë sfidë për Kosovën kur merren parasysh dëmet e paraqitura në nivel lokal, por edhe global. Shumica e bizneseve në Kosovë, gati në të gjithë sektorët, kanë raportuar vlera të mëdha të humbjeve financiare dhe zvogëlim të kapaciteteve prodhuese, si rezultat i masave të marra nga Qeveria më 13 mars për parandalimin e përhapjes së pandemisë.

Lulzim Shabani, njohës i ekonomisë, thotë se bizneset në vend mund të rimëkëmben vetëm me ndihmën e institucioneve, të cilat, sipas tij, duhet të hartojnë strategji adekuate dhe atë sa më shpejtë që të jetë e mundur.
“Padyshim se bizneset po jetojnë periudhën më të vështirë të tyre jo vetëm në dekada, por edhe në shekullin e fundit, prandaj pos shëndetit do të duhej të ishte rimëkëmbja ekonomike e bizneseve pas pandemisë, bizneset kanë parashtruar kërkesat e tyre, kanë filluar dialoget mes bizneseve dhe autoriteteve dhe ky dialog duhet të sjellë rezultate konkrete, bizneset kanë raportuar shkurtime të vendeve të punës, humbje të tyre, zvogëlim të kapaciteteve prodhuese dhe në këtë frymë nevojitet strategji zhvillimore e institucioneve për të dizajnuar pakon ekonomike emërgjente e cila do të duhej të ishte në rimëkëmbjen e bizneseve”, tha Shabani.

Shabani thotë se një ndër format e rimëkëmbjes ekonomike është edhe ndryshimi i pakos fiskale.

“Është e vështirë të mendohet se cila do të ishte rruga më e duhur që bizneset ta kalojnë sa më lehtë këtë periudhë, por gjykoj që lehtësimi i politikave fiskale do të ishte hapi i parë për të ndihmuar dhe më pas të dizajnohen pako të tjera, këtu hynë kreditë, subvencionet, pagesat e qirave, grejs-periudha apo shtyerja e kësteve, e kështu me radhë”, tha Shabani.

Sipas Shabanit, edhe niveli lokal nuk duhet të rri duarkryq.

“Padyshim që kryesor është niveli qëndror, por edhe autoritetet lokale kanë përgjegjësitë, detyrimet dhe obligimet e tyre, siç është Drejtoria Zhvillimit, ajo e Bujqësisë, e Financave të bashkëpunojnë me bizneset që të gjejnë rrugë e metoda për të lehtësuar periudhën e pas pandemisë”, tha Shabani.

Deri më tani nuk ka ndonjë shifër të saktë të humbjeve ekonomike, por sipas Ministrisë së Financave dhe Transfereve, vlerësohet se 6 milionë euro në ditë Kosova ka humbur për shkak të pandemisë së koronavirusit.