Ferizaj

Bizneset ferizajase: Ndihma e Qeverisë minimale në krahasim me humbjet

Published

6 years ago

14 October, 2020

Bizneset të cilat kanë pësuar humbje si pasojë e pandemisë COVID-19 nga dita e djeshme kanë filluar të ndihmohen përmes Fondit për Rimëkëmbje Ekonomike, në bazë të listës së numrit të punëtorëve që kompanitë i kanë të regjistruar.

Për këto biznese, nga ky Fond, i cili kap vlerën e mbi 350 milionë euro, pritet të ndahen 60 milionë euro, ku mbi 37 milionë euro veçse u janë ndarë disa bizneseve, ndërsa pjesa tjetër e tyre do të marrin ndihmën nga qeveria pasi të bëjnë përditësimin e të dhënave në Administratën Tatimore të Kosovës.

Ministrja e Financave Hykmete Bajrami gjatë ditës së djeshme ka bërë të ditur se bizneset janë mbështetur me rreth 290 euro për punëtor.

Por, pavarësisht kësaj ndihme, bizneset ferizajase thonë se kjo shumë është minimale në krahasim me humbjet që ua ka shkaktuar situata pandemike.

“Si në të gjithë botën edhe tek ne ka ndikuar negativisht, deri tani jemi munduar që të paktën mos ta reduktojmë numrin e punëtorëve, por këtu tek ne pothuajse çdo gjë lidhet me ndërtime, mosardhja e mërgimtarëve ka ndikuar tek mosshitja e banesave dhe kjo ka ndikuar direkt tek biznesi im prodhues“, tha Azem Guta, pronar i kompanisë së styroporit ”KosovaPor”.

“Ka disa muaj që po përballemi me pandeminë COVID-19 dhe biznesi ynë është i lidhur direkt me pandeminë pasi u ndaluan dasmat, ahengjet dhe kjo ndikoi tek ne shumë. Kemi aplikuar për pako të shtetit, por ndihmat po janë shumë minimale, ne jemi munduar me i ikë reduktimit të punëtorëve, por kjo ka qenë e pashmangshme, urojmë që kjo situatë të përfundoj sa më parë”, tha Vlora Neziri, pronare e atelesë ”Vora & Kaltrina”.

Bizneset prodhuese thonë se qeveria mund t’iu ndihmoj duke ua ulur Tatimin mbi Vlerën e Shtuar.

“Në krahasim me rajonin e mos të flasim për Evropën se çfarë stimulimi kanë, në Gjermani ua kanë rregulluar çështjen e kredive, e kanë zbritur TVSH-në nga 19% në 9%, 6 muaj ua paguajnë pagat e punëtorëve, mos të shkojmë më larg, në Maqedoni disa kolegë atje më kanë treguar se shteti ka marrë vendim që për 6 muaj do t’ua paguaj pagat punëtorëve, në krahasim me rajonin këto pako janë thuajse hiç”, tha Guta.

Qeveria e Kosovës ka paralajmëruar se në pjesën e dytë të muajit tetor dhe nëntor do të ndahen edhe ndihma të tjera financiare për bizneset.

Ferizaj

Kosova paralajmërohet për mot të ashpër me shi, rrufe dhe breshër

Published

5 days ago

21 July, 2026

Redaksia

Instituti Hidrometeorologjik i Kosovës (IHMK) dhe Organizata Evropiane për Parashikimin e Stuhive (ESTOFEX) kanë lëshuar paralajmërime për reshje intensive, stuhi, breshër dhe erëra të forta.

Instituti Hidrometeorologjik i Kosovës ka njoftuar se gjatë ditës së sotme do të mbajë mot me diell dhe vranësira të pjesshme, por gjatë orëve të pasdites pritet ndryshim i kushteve atmosferike me vranësirave konvektive, të cilat vende-vende do të shoqërohen me reshje lokale shiu dhe shkarkesa rrufesh.

Temperaturat maksimale parashihen të sillen prej 31°C deri në 33°C.

Ndërkaq, Organizata Evropiane për Parashikimin e Stuhive (ESTOFEX), e cila monitoron motin e ashpër në Evropë, ka lëshuar një alarm të nivelit 3 të rrezikut për Kosovën dhe disa vende të rajonit.

Sipas ESTOFEX, përfshirja e Kosovës në zonën me nivelin 3 të rrezikut nënkupton një potencial të lartë për mot ekstrem, me mundësi për breshër shumë të madh dhe erëra të forta me fuqi shkatërruese.

Ferizaj

Arrestohen katër të dyshuar për kanosjen e një personi në Ferizaj

Published

2 weeks ago

14 July, 2026

Redaksia

Policia Rajonale në Ferizaj ka arrestuar 4 persona në dyshimet për kanosje dhe armëmbajtje pa leje.

Në njoftim bëhet e ditur se më datën 13.07.2026, në stacionin policor në Ferizaj është paraqitur një ankues, M.B, i cili ka deklaruar se ishte kanosur nga disa persona.

Pas ndërmarrjes së veprimeve operative-hetimore nga njësitet reaguese dhe njësia e hetimeve, janë identifikuar dhe lokalizuar personat e dyshuar në një lokal në Ferizaj, ku gjatë kontrollit janë sekuestruar katër armë zjarri dhe sasi municioni.

Të dyshuarit: H.TH. ( 50 vjeç), SH.TH. (27 vjeç). E.B. ( 37 vjeç) dhe E.H. (27 vjeç), me vendim të prokurorit të shtetit janë ndaluar në mbajtje për 48 orë, ndërsa ndaj tyre janë iniciuar raste për veprat penale “Kanosja”, “Mbajtja në pronësi, kontroll ose posedim të paautorizuar të armëve dhe “Asgjësimi apo dëmtimi i pasurisë”.

Ferizaj

Brenda një jave konfiskohen 15 motoçikleta në Ferizaj

Published

2 weeks ago

13 July, 2026

Redaksia

Policia Rajonale e Ferizajt ka njoftuar se brenda periudhës nga 6 – 12 korrik ka shqiptuar 26 gjoba për shkelje të rregullave të trafikut dhe ka konfiskuar 15 motoçikleta.

Kjo pasi policia ka shtuar kontrollet në qarkullimin dhe drejtuesit e motoçikletave dhe skuterëve.

Shumica e gjobave janë shqiptuar për shkelje të rregullave të komunikacionit, përfshirë drejtimin e motoçikletës pa regjistrim, pa patentë shoferi ose pa helmetë mbrojtëse, si dhe kundërvajtje të tjera.

Gjatë kësaj periudhe janë konfiskuar edhe 15 motoçikleta/skuterë, kryesisht për mungesë të dokumentacionit të rregullt.