Ferizaj

QKMF në Ferizaj ofron mamografi falas gjatë muajit tetor

Published

5 years ago

15 October, 2020

Në kuadër të tetorit që njihet si muaji i vetëdijësimit në luftën kundër kancerit të gjirit, në Qendrën Kryesore të Mjekësisë Familjare në Ferizaj edhe këtë vit gjatë këtij muaji ofrohet mamografia pa pagesë.

Në këtë qendër mjekësore thonë se interesimi i grave është mjaft i lartë, edhe pse jo sikur viteve të kaluara.

“Interesimi i grave është më pak se viteve të kaluara për shkak të pandemisë, por nga gjysma e këtij muaji ka filluar më shumë interesimi i grave, diku në këtë muaj janë 52 ekzaminime që i kemi bërë, ndërsa diku 68 janë të lajmëruara që do ta bëjnë mamografinë. Ne sa mundemi me marrë vesh ka dyshime tek disa gra, prandaj sa më shumë që vijnë zbulohen më shumë raste“, tha Latife Krosa, teknike e mamografisë në QKMF.

Krosa u bëri thirrje grave që ta realizojnë mamografinë, meqë është metoda më e përshtatshme për zbulimin e hershëm të kancerit të gjirit.

“Çdo gjë më herët është më mirë, në vazhdimësi e kemi thënë se nëse zbulohet herët me mamografi vazhdon me trajtim dhe mundësitë e shpëtimit janë shumë të mëdha, prandaj i kisha lutur gratë që të vijnë ta bëjnë mamografinë pasi është shpëtim jete”, u shpreh Krosa.

Kanceri i gjirit është kanceri më i shpeshtë tek gratë. Ai mund të gjendet dhe tek burrat, por është shumë më i rrallë.

Ferizaj

Ngritët aktakuza e parë për zgjedhjet e 28 dhjetorit

Published

3 days ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

5 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.