Ferizaj

Përkundër rritjes së numrit të rasteve me COVID-19, shkollat mbesin të hapura

Published

6 years ago

09 November, 2020

Përkundër rritjes së numrit të të infektuarve me koronavirus në nivel vendi, procesi mësimor nëpër shkolla është duke vazhduar.

Sindikata e Arsimit dhe Këshilli i Prindërve në Ferizaj, janë shprehur kundër ndërprerjes së procesimit mësimor nëpër objektet shkollore.

Visar Islami, nënkryetar i Këshillit të Prindërve në Ferizaj, tha se nxënësit kanë humbur shumë nga mbyllja e shkollave, andaj një mbyllje e dytë thotë se do të kishte pasoja të mëdha.

“Ne si Këshill i Prindërve mendojmë që duhet të vazhdojë mësimi dhe mos të ketë ndërprerje sikur që kemi pasur në fillim të pandemisë dhe sa më shumë që vonohemi shkaktojmë humbje, megjithatë duhet me u mësu me jetu me këtë sëmundje. Ne nuk kemi në plan me i bë kërkesë DKA-së për ta ndërprerë mësimin”, tha Islami.

E, rastet me koronavirus brenda shkollave të Ferizajt po rriten dita ditës.

Drejtori i Arsimit në Ferizaj Afrim Llabjani, tha se vetëm gjatë kësaj fundjave pozitiv me COVID-19 kanë rezultuar 7 mësimdhënës dhe 7 nxënës. Edhe Llabjani thotë se nuk është në plan mbyllja e shkollave.

“Nga rezultatet e fundit që kemi marrë na kanë rezultuar 7 mësimdhënës dhe 7 nxënës pozitiv, ky është raporti i fundit që ka ardhë gjatë vikendit. Ne urojmë që mos të na shtohen rastet dhe të vazhdojmë mësimin siç jemi duke e vazhduar në shkolla, sepse mësimi është më efektiv në krahasim me atë çka e kemi përjetuar në periudhën e parë. Kemi kërkuar në vazhdimësi nga shkollat që të shtohet kujdesi, sepse numri në përgjithësi është duke u rritur nga dita në ditë dhe kemi shpërndarje të infeksionit, por ne duhet t’i shtojmë masat dhe t’i respektojmë ato dhe të jemi në shkolla siç kemi qenë deri më tani”, theksoi Llabjani.

Derisa brenda objekteve shkollore po respektohen masat Anti-Covid, një gjë e tillë nuk po ndodhë edhe jashtë klasave. Pothuajse në secilën shkollë shihet grumbullim i nxënësve në hyrje të objekteve shkollore. Lidhur me këtë, Llabjani thotë se janë duke i shikuar mundësitë për të ndërmarrë veprime.

“Ky ka qenë problemi që e kemi ngritur edhe në ministri, ne po kërkojmë në vazhdimësi nga drejtorë të shkollave dhe personeli tjetër që të bëhet kujdes dhe të mbahet distanca. Ne do ta shohim mundësinë se çka duhet të bëjmë në këtë drejtim në mënyrë që ta evitojmë grumbullimin e nxënësve nëpër shkolla”, u shpreh ai.

Shumica e mësimdhënësve dhe nxënësve të cilët janë konfirmuar pozitiv me virusin COVID-19 gjatë vikendit, janë të shkollës fillore “Astrit Bytyqi” në Ferizaj, ku klasa e gjashtë dhe e nëntë e kësaj shkolle kanë kaluar në mësimin online.

Ferizaj

Ndahet nga jeta veterani i UÇK-së, Avdi H. Ahmeti

Published

1 week ago

03 November, 2026

Redaksia

Është ndarë nga jeta Veterani i Ushtrisë Çlirimtare të Kosovës, Avdi H. Ahmeti nga Ferizaj.

Njoftimi mortor u bë i ditur nga Organizata e Veteranëve të Luftës së UÇK-së, dega në Ferizaj.

Sipas njoftimit, varrimi i të ndjerit do të bëhet të mërkurën, më 04.11.2026 ora 14:15 në varrezat e lagjes Karametaj, të fshatit Greme të Ferizajt.

Ferizaj

Ndalohet për 48 orë një person për rastin e vdekjes të punëtorit në Ferizaj

Published

4 weeks ago

13 October, 2026

Redaksia

Prokuroria Themelore në Ferizaj, ka njoftuar për ndalimin e një personi me inicialet B.T. lidhur me rastin që ka ndodhur dje rreth orës 15:50, në rrugën ”Cen Dugolli” në Ferizaj, ku humbi jetën një punëtor derisa po punonte në një objekt ndërtimi. Viktima dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Sipas prokurorisë, i arrestuari B.T. është ndaluar nën dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Njoftimi i Prokurorisë:

Ndalohet një person për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”

Ferizaj, 13 Tetor 2026– Prokuroria Themelore në Ferizaj, njofton opinionin publik se me vendim të Prokurorit të Shtetit, ka ndaluar një (1) person të dyshuar me iniciale B.T., në kohëzgjatje prej 48-orësh, për shkak të dyshimit të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”nga neni 358 sipas Kodit Penal të Republikës së Kosovës.

Rasti në fjalë ka ndodhur në rrugën ”Cen Dugolli” në Ferizaj, rreth orës 15:50:, ku, një person, i cili po kryente punime në një objekt ndërtimi, dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Vdekjen e viktimës e ka konstatuar mjeku kujdestar i Qendrës Emergjente në Ferizaj, kurse, me urdhëresë të prokurorit të shtetit, trupi i pajetë i vitkimës është dërguar për obduksion në Institutin e Mjekësisë Ligjore në Prishtinë.

Prokurori i shtetit, pas daljes në vendin e ngjarjes, ka udhëzuar Policinë dhe Inspektoratin e Punës, për ndërmarrjen e veprimeve të nevojshme hetimore, me qëllim të zbardhjes së rrethaneve të këtij rasti.

Prokuroria Themelore në Ferizaj, ndaj të dyshuarit të lartëpërmendur, brenda afatit ligjor do të vazhdoj me procedurat e mëtejme ligjore.

Ferizaj

Humb jetën një punëtor në një objekt në ndërtim në Ferizaj

Published

4 weeks ago

12 October, 2026

Redaksia

Një punëtor 54 vjeç ka humbur jetën pasi dyshohet se gjatë punës të jetë rrëzuar në një objekt në ndërtim në Ferizaj.

Rasti është raportuar të ketë ndodhur pasditen e sotme rreth orës 15:40, në rrugën “Cen Dugolli”.

Në vendin e ngjarjes kanë dalë policia dhe ekipet e Emergjencës, të cilat kanë konstatuar vdekjen e tij. Sipas policisë dyshohet se gjatë punimeve ndërtimore viktima është rrëzuar nga kati përdhes në bodrum.

Në vendngjarje kanë dalë edhe hetimet rajonale dhe inspektorët e punës derisa për të gjitha veprimet policore është njoftuar prokurori i shtetit.